Buṭrus yerza ɣef Kurnilyus
TAQSIṬ TIS 109
Buṭrus yerza ɣef Kurnilyus
ARGAZ-A ibedden dagi d amceggeɛ Buṭrus, ma d wid yellan deffir-es d sin ger yeḥbiben-is. Lameɛna acuɣer yekna wergaz-agi zdat-es? Yelha wayen akka yexdem? Teẓriḍ wi t-ilan?
Argaz-agi d Kurnilyus. D lqebṭan n temdint n Ṛuma. Kurnilyus ur yessin ara Buṭrus, lameɛna yeţţunefk-as-d lameṛ akken a t-yeɛreḍ s axxam-is. A nwali amek i d-yeḍra wannect-a.
Inelmaden imezwura n Ɛisa d Udayen, lameɛna Kurnilyus, neţţa, mačči d Uday. Acu kan iḥemmel Ṛebbi, yezga ideɛɛu ɣur-es, yerna ixeddem aṭas n lxiṛ i lɣaci. Yiwet n tmeddit, iwala yiwen n lmelk i s-d-yennan: ‘Tɛeǧbeḍ i Ṛebbi, yerna tiẓilla-inek a tent-issiweḍ akk ɣer lebɣi-k. Tura ceggeɛ irgazen ɣer yiwen iwumi qqaren Buṭrus yellan di temdint n Yafu (Jafa). A t-tafeḍ deg wexxam n yiwen wergaz yeţţusemman Semɛun izedɣen ɣer rrif n lebḥeṛ.’
Imiren kan Kurnilyus iceggeɛ irgazen ɣer Buṭrus. Azekka-nni, mi qrib ad awḍen ɣer temdint n Yafu, yuɣ lḥal Buṭrus yuli ɣef ṣṣdeḥ n wexxam n Semɛun. Dinna, Ṛebbi iweḥḥa-yas-d taẓerbit tameqrant i d-yeţṣubbun seg igenni. Deg-s llan lḥiwan n mkul ṣṣenf ur neṣfi ara i gḥeṛṛem i wučči lqanun n Ṛebbi. Xuḍi, Buṭrus yesla i yiwet n taɣect i s-d-yennan: ‘A Buṭrus, kker. Zlu teččeḍ.’
Buṭrus yerra-yas: ‘Ala! Di leɛmeṛ ur ččiɣ ayen ur neṣfi.’ Lameɛna taɣect-nni tenna-yas: ‘Ur k-id-iṣaḥ ara aţ-ţḥesbeḍ ur yeṣfi ara ayen iḥseb Ṛebbi yeṣfa.’ Tlata iberdan i d-yeḍra wannect-a. Mazal yeţxemmim Buṭrus ɣef lmeɛna n leḥwayeǧ-agi meṛṛa, mi d-wwḍen yergazen-nni i d-iceggeɛ Kurnilyus akken ad steqsin fell-as.
Buṭrus iṣubb-ed ɣur-sen, yenna-yasen: ‘Aql-i! D nekk i teţqellibem. D acu akka i kkun-id-yewwin ɣur-i?’ Mi s-d-ssefhmen yergazen-nni belli d lmelk i gennan i Kurnilyus a t-iɛreḍ s axxam-is, Buṭrus yeqbel ad iddu yid-sen. Azekka-nni, Buṭrus d kra n leḥbab-is ṛuḥen ɣer temdint n Qiṣarya, anda akken yella Kurnilyus.
Yuɣ lḥal Kurnilyus isnejmaɛ-ed wid akk i s-iţţilin d yeḥbiben-is. Mi gelḥeq Buṭrus, Kurnilyus iṛuḥ immuger-it. Yeɣli ɣer iḍarren-is, yekna zdat-es akken i t-teţwaliḍ dagi. Meɛna Buṭrus yenna-yas: ‘Kker s ibeddi! D amdan kan i lliɣ.’ Adlis Iqedsen inna-d belli ur ilaq ara a neknu zdat n wemdan akken a t-neɛbed. Ḥaca Yahwa i ɣ-ilaq a neɛbed.
Buṭrus iberreḥ i wid akk yennejmaɛen dinna. Yenna: ‘Walaɣ belli Ṛebbi yeqbel imdanen meṛṛa i gebɣan a s-qedcen.’ Werɛad ifukk ameslay mi d-issers Ṛebbi ṛṛuḥ-is iqedsen ɣef wid akk yellan dinna, dɣa bdan heddṛen s tmeslayin nniḍen. Annect-a yessewhem aṭas inelmaden-nni i d-yeddan d Buṭrus. Ǧeɛlen siwa wid yellan d Udayen am nutni ara yafen lemzeyya ɣer Ṛebbi. Lameɛna tura fehmen belli Ṛebbi ur ixeddem ara lxilaf ger yemdanen. Ɣur-es ulac ccetla neɣ agdud yugaren wayeḍ. Mačči d lḥaǧa yelhan i glaq a d-nemmekti?
Lecɣal 10:1-48; 11:1-18; Aweḥḥi 19:10.