Bulus di tegzirt n Malṭa
TAQSIṬ TIS 112
Bulus di tegzirt n Malṭa
MUQEL kan! Waqila teḍra twaɣit di lbabuṛ-ihin! Cwiṭ i mazal ad iṛuḥ d iceqfan! Twalaḍ lɣaci-yinna i gḍeggren iman-nsen ɣer waman? Kra seg-sen atnan wwḍen ɣer rrif n lebḥeṛ. Tɛeqleḍ dagi Bulus? A nwali tura d acu i t-yessawḍen ɣer liḥala-yagi.
Tecfiḍ? Bulus yeţwaḥbes ɛamayen di temdint n Qiṣarya. Umbeɛd neţţa d kra n imeḥbas nniḍen sserkben-ten di lbabuṛ ara ten-yawin ɣer temdint n Ṛuma. Mi ɛeddan tama n tegzirt n Kritus, tekker-ed yiwet n tbuciḍant annect-ila-ţ. Aḍu iţsuḍu s lǧehd-is meṛṛa armi ur zmiren ara yergazen ad ḥekmen di lbabuṛ-nni. Ula d iṭij d yetran ɣaben ɣef wallen-nsen am yiḍ am wass. Ɣer taggara, mi ɛeddan waṭas n wussan, wid akk yellan di lbabuṛ-nni qeḍɛen layas.
Bulus ibedd ihi gar-asen yenna: ‘Ula d yiwen deg-wen ur iţmeţţat; anagar lbabuṛ-agi ara iɣerqen. Iḍ iɛeddan, lmelk n Ṛebbi ibedd-ed ɣur-i yenna-yi-d: “A Bulus, ur ţţagad ara! Ilaq aţ-ţbeddeḍ zdat n Qayṣer, aneḥkam n Ṛuma. Ṛebbi ad isellek wid akk yellan yid-ek.”’
Aql-aɣ tura di ţnaṣfa n yiḍ n wass wis ṛbeɛṭac segmi i tebda tbuciḍant-nni. Ibeḥṛiyen walan belli skud leḥḥun, skud ur lqayit ara waman. Imi ugaden ad iḥaz lbabuṛ-nni iceṛfan di ṭṭlam, ḍeggren kra n imextafen ɣer lebḥeṛ. Azekka-nni ṣṣbeḥ, walan yiwen wemkan anda i d-iban ṛṛmel. Ɛerḍen ihi ad nehṛen lbabuṛ-nni ɣer din.
Lameɛna mi qerben ɣer lberr, lbabuṛ-nni iwet aɛemmuṛ n ṛṛmel, dɣa yeṛkeɛ daxel-is. Lemwaji kkatent-eţ ssya wesya armi yebda yeţruẓu. Imiren lqebṭan n lbabuṛ-nni yefka lameṛ i wid yessnen ad ɛumen, ad ḍeggren iman-nsen d imezwura ɣer waman iwakken ad leḥqen ɣer rrif n lebḥeṛ. Ma d wiyaḍ, ilaq-asen ad ckunṭḍen deg iceqfan n lbabuṛ akken ad sellken iman-nsen. D ayen i xedmen irkulli. Swakka, wid akk yellan dinna, yeɛni 276, wwḍen bxiṛ ɣer rrif n lebḥeṛ akken i t-id-yenna lmelk-nni.
Tigzirt-agi ideg i menɛen isem-is Malṭa. Imezdaɣ-is ḥninit yerna xedmen lxiṛ d ameqran i wid yeţţusellken. Yuɣal, asmi geqɛed lḥal, Bulus yerkeb di lbabuṛ nniḍen iteddun ɣer temdint n Ṛuma.