TAQSIṬ TIS 108

Lbeṛhan deg webrid

TEẒRID anwa-​t wergaz-​agi yeɣlin ɣer lqaɛa? D Caɛul, win akken i gɛussen ibeṛnyas n yergazen-​nni i gṛejmen Stifan. Twalaḍ tafat-​agi yeţfeǧǧiǧen? Acu akka yeḍran?

Mbeɛd timenɣiwt n Stifan, Caɛul yebda iţqehhir inelmaden n Ɛisa di temdint n Yarucalim. Ikeččem ɣer yexxamen-​nsen, izzuɣur-​iten ɣer beṛṛa, mbeɛd issekcam-​iten ɣer lḥebs. Aṭas n inelmaden i grewlen ɣer temdinin nniḍen. Dinna bdan ţberriḥen “lexbaṛ n lxiṛ”. Lameɛna, Caɛul iţṛuḥu ula ɣer temdinin-​nni iwakken ad inadi inelmaden n Ɛisa. Yiwen wass yella iteddu ɣer temdint n Dimecq mi d-​yeḍra yiwen leɛǧeb.

Taswiɛt kan, tecceɛceɛ-​ed tafat seg igenni, tezzi-​yas i Caɛul. Din din yeɣli ɣer lqaɛa, akken i t-​teţwaliḍ di ţţeswiṛa. Mbeɛd yesla i yiwet n taɣect i s-​d-​yennan: ‘A Caɛul, a Caɛul! Acuɣer i yi-​teţqehhireḍ?’ Irgazen yeddan d Caɛul walan tafat-​nni yerna slan i taɣect-​nni i d-​ineṭqen, lameɛna ur fhimen ara d acu i d-​tenna.

Caɛul isteqsa: ‘Anwa-​k a Sidi?’

Taɣect-​nni terra-​yas: ‘Nekk d Ɛisa, win akken i teţqehhireḍ.’ Ɛisa inna-​d imeslayen-​agi axaṭer mkul m’ara yeţqehhir Caɛul inelmaden-​is amzun d neţţa i geţqehhir.

Caɛul isteqsa-​t ihi: ‘A Sidi, acu i glaq a t-​xedmeɣ?’

Ɛisa yerra-​yas: ‘Kker tṛuḥeḍ ɣer temdint n Dimecq. Dinna ara k-​d-​inin ayen akk ara txedmeḍ.’ Caɛul yekker, yeldi-​d allen-​is, lameɛna ur iwala tigert. Yuɣal d aderɣal! Ihi, irgazen-​nni yeddan yid-​es ṭṭfen-​as afus, wwin-​t ɣer temdint n Dimecq.

Di temdint n Dimecq, Ɛisa yenna i yiwen seg inelmaden-​is, iwumi qqaren Ananyas: ‘Kker tṛuḥeḍ ɣer wexxam n Yudas yellan deg webrid iţţusemman “Qbala”. Dinna steqsi ɣef yiwen wergaz iwumi qqaren Caɛul. Xtaṛeɣ-​t iwakken ad yili d aqeddac-​iw ur necbi wayeḍ.’

Ananyas yuɣ-​as awal. Mi gufa Caɛul, issers ifassen-​is fell-​as, yenna-​yas: ‘Ɛisa iceggeɛ-​iyi-​d ɣur-​ek iwakken a k-​id-​yuɣal yeẓri yerna aţ-​ţeččaṛeḍ d ṛṛuḥ iqedsen.’ Imiren kan ɣlin-​d seg wallen-​is am wakken d iqecran, dɣa yuɣal-​it-​id yeẓri.

Mbeɛd Cawul iţţuwekkel ɣef yiwen n ccɣel ameqran, yeɛni ad iberreḥ i waṭas n leǧnas. D neţţa i guɣalen ɣer zdat d amceggeɛ Bulus. A nuɣal a nwali aṭas n leḥwayeǧ fell-​as. Lameɛna uqbel, a nẓer d acu i geḍleb Ṛebbi i Buṭrus a t-​ixdem.

Lecɣal 8:1-4; 9:1-20; 22:6-16; 26:8-20.