Stifan yeţwaṛjem
TAQSIṬ TIS 107
Stifan yeţwaṛjem
ARGAZ-AGI yeɣlin ɣef tgecrar d Stifan. D anelmad unṣiḥ n Ɛisa. Lameɛna muqel acu akka iḍerrun yid-es! Irgazen-agi atnan la t-ṛejjmen s yeblaḍen imeqranen. Teẓriḍ acuɣer i t-keṛhen armi wwḍen a s-xedmen tawaɣit-agi? D ayen ara nwali tura.
S tezmert n Ṛebbi, Stifan yella ixeddem lbeṛhanat issewhamen. Annect-a ur yeɛǧib ara i yergazen-agi, dɣa bdan ţţemjadalen yid-es ɣef tideţ yesɣaray i lɣaci. Lameɛna Ṛebbi yefka i Stifan lekyasa tameqrant is i d-ibeggen belli irgazen-agi sselmaden leḥwayeǧ n lekdeb. Annect-agi isserfa-ten akteṛ, dɣa ṭṭfen-t yerna wwin-d kra n inagan iwakken a d-cehhden fell-as s ẓẓur.
Lmuqeddem ameqran isteqsa Stifan, yenna-yas: ‘Ţ-ţideţ ayen akka i d-nnan?’ Stifan yerra-yas lǧawab s yiwet n lxeṭba ifazen i greṣṣan ɣef Wedlis Iqedsen. Ɣer taggara, ihdeṛ-ed ɣef kra n yergazen n diri i gqehren zik lanbeyya n Yahwa. Mbeɛd yenna-yasen: ‘Kunwi tecbam irgazen-agi. Tenɣam Ɛisa, aqeddac n Ṛebbi, yerna ur tuɣem ara awal i lumuṛ n Ṛebbi.’
Mi slan i imeslayen-agi, lɛulama n ddin qercen tuɣmas-nsen si zzɛaf! Lameɛna Stifan yerfed allen-is s igenni, yenna: ‘Atan ţwaliɣ Ɛisa ibedd ɣer tama tayeffust n Ṛebbi deg igenni.’ Mi slan i lehduṛ-agi, qeflen imeẓẓuɣen-nsen, dɣa ddehmen ɣer Stifan, zzuɣren-t beṛṛa n temdint.
Kra n yergazen yellan dinna kksen ibeṛnyas-nsen, ǧǧan-ten ɣer yiwen wergaz yeţţusemman Caɛul iwakken a ten-iɛass. Twalaḍ Caɛul dihin? Mbeɛd bdan ṛejjmen Stifan armi yeɣli ɣef tgecrar. Dɣa Stifan yedɛa ɣer Ṛebbi akken i teţwaliḍ di ţţeswiṛa-yagi, yenna: ‘A Yahwa ur ten-ţɛaqab ara ɣef ddnub i xedmen.’ Stifan yeẓra belli d lɛulama n ddin i gɣedṛen kra seg yergazen-agi. Akken kan i gfukk ameslay, yemmut.
Yella wasmi i k-iḍurr walbeɛḍ? Acu i txedmeḍ? Tnudaḍ a d-terreḍ ţţaṛ neɣ tessutreḍ i Ṛebbi a t-iɛaqeb? Mačči d ayen i xedmen Stifan d Ɛisa. Xedmen lxiṛ ula i wigad i sen-ixedmen cceṛ. Ilaq ihi a neɛreḍ a netbeɛ lemtel-nsen.