Timeṛǧiwt di Yarucalim
TAQSIṬ TIS 105
Timeṛǧiwt di Yarucalim
IMDANEN i teţwaliḍ dagi d inelmaden n Ɛisa. Atnan qqimen di temdint n Yarucalim akken i sen-t-yumeṛ Ɛisa. Llan ţṛaǧun akk deg yiwen wexxam, mi d-yeɣli yiwen n lḥess d ameqran am waḍu iǧehden. Iččuṛ akk axxam-nni anda i qqimen. Imiren ḍehren-d yilsawen n tmes ɣef uqerruy n yal yiwen deg-sen. Twalaḍ annect-a di ţţeswiṛa-yagi? Teẓrid d acu i d lmeɛna n waya?
D lbeṛhan! Ɛisa atan tura deg igenni i gella, ɣer tama n Baba-s. Issers-ed ṛṛuḥ iqedsen n Ṛebbi ɣef inelmaden-is. D acu yeḍran umbeɛd? Inelmaden meṛṛa bdan ţmeslayen s lluɣat nniḍen.
Ass-nni di Yarucalim, aṭas n lɣaci i geslan i ṣṣut-nni iǧehden. Uzzlen ihi akken ad ẓren d acu yeḍran. Yuɣ lḥal, kra seg-sen usan-d si tmura tibeṛṛaniyin iwakken ad ḥedṛen i lɛid n wat Isṛayil iwumi qqaren Lɛid n wass wis xemsin. Imṣufar-agi wehmen ayendin mi slan i inelmaden ţmeslayen s lluɣat-nsen ɣef leḥwayeǧ ifazen yexdem Ṛebbi.
Bdan qqaren wway gar-asen: ‘Imdanen-agi yeţmeslayen, mačči n tmurt n Jlili? Amek ihi i zemren ad mmeslayen s lluɣat n tmura-nneɣ?’
Buṭrus ibedd zdat-sen akken a sen-yessefhem. S taɣect ɛlayen yemla i lɣaci amek i nɣan Ɛisa d wamek i t-id-yesseḥya Yahwa si ger lmeggtin. Yenna-yasen: ‘Ɛisa atan tura deg igenni ɣer tama tayeffust n Ṛebbi. Iceggeɛ-aɣ-d syenna ṛṛuḥ iqedsen akken i gefka lemɛahda. Ɣef wayagi i teslam yerna i twalam lbeṛhanat-agi meṛṛa.’
Mi gekfa Buṭrus ameslay, aṭas n lɣaci i gḥeznen mliḥ ɣef wayen i xedmen i Ɛisa. Steqsan Buṭrus: ‘D acu i glaq a nexdem?’ Buṭrus yerra-yasen: ‘Ilaq aţ-ţbeddlem tikli yerna aţ-ţeţwaɣeḍsem.’ Ass-nni, azal n 3000 n yemdanen i geţwaɣeḍsen. Uɣalen akk d inelmaden n Ɛisa.
