TAQSIṬ TIS 81

Ţeklen ɣef Ṛebbi

D LULUF n yemdanen i geṭṭfen abrid iḍulen si Babil ɣer Yarucalim. Mi wwḍen ɣer din, ufan tamdint n Yarucalim tuɣal d aɛemmuṛ n wakal yerna ulac win izedɣen deg-​s. At Isṛayil ilaq-​asen ad ɛiwden lebni swadda.

Yiwet n lḥaǧa tamezwarut ger tiyaḍ i xedmen mi wwḍen, d lebni n yiwen uɛalṭar. Aɛalṭar d yiwen wemkan ideg i ţţaken iseflawen n lmal neɣ tikciwin i Yahwa. Mi ɛeddan kra n wagguren, At Isṛayil bdan lebni n lemqam. Meɛna iɛdawen n tmura i sen-​d-​izzin ur bɣin ara ad bnun wat Isṛayil lemqam-​agi. Ihi, ɛerḍen a ten-​ssigden akken ad ḥebsen lxedma. Ɣer taggara, wwin ula d agellid ajdid n Faras a d-​yessufeɣ lqanun ara iḥebsen lebni n wexxam n Yahwa.

Tura ɛeddan 17 n sna segmi i d-​uɣalen wat Isṛayil si Babil. Yahwa iceggeɛ nnbi Ḥagay d nnbi Zaxaryah akken ad necden agdud n Ṛebbi ad yuɣal ɣer lebni n lemqam. At Isṛayil ţeklen ɣef lemɛawna n Ṛebbi yerna uɣen awal i lanbeyya. Daɛneţţa, uɣalen ɣer lebni ɣas akken yugi ugellid n Faras.

Tatnay, yiwen lewkil n Faras, yusa-​d ad iẓer anwa i sen-​yefkan ţţesriḥ akken ad bnun lemqam n Yahwa. At Isṛayil ssefhmen-​as belli asmi i llan di Babil, d agellid Sirus i sen-​yennan ad ṛuḥen ɣer Yarucalim ad bnun lemqam n Yahwa Ṛebbi-​nsen.

Tatnay iceggeɛ yiwet n tebṛaţ ɣer Babil akken ad iẓer ma yella Sirus, yemmuten tura, yefka zik lameṛ-​agi neɣ ala. Agellid ajdid n Faras yerra-​yas-​d lexbaṛ s lemɣawla. Yenna-​yas-​d belli d ṣṣeḥ Sirus yefka lameṛ-​agi. Imiren agellid adjid n Faras yumeṛ: ‘Ǧǧet At Isṛayil ad bnun lemqam n Ṛebbi-​nsen yerna ɛiwnet-​ţen.’ Ɛeddan wazal n ṛebɛa iseggasen d wamek i kfan lebni n lemqam. At Isṛayil feṛḥen mačči d kra.

Iɛedda acḥal d aseggas. Tura 48 n sna ayagi segmi i gekfa lebni n lemqam. Imezdaɣ n Yarucalim d igellilen yerna tamdint akk-​d lemqam ur cbiḥen ara aṭas. Ɛazra yellan di Babil yewweḍ-​it lexbaṛ belli lemqam n Ṛebbi yeḥwaǧ a t-​zewqen. Teẓriḍ d acu yexdem?

Ɛazra iṛuḥ ɣer Artaḥcasta yellan d agellid n Faras. Agellid-​agi igerrzen mliḥ yefka-​yas aṭas n tikciwin ara yawi ɣer Yarucalim. Lameɛna anwa ara t-​iɛiwnen akken a tent-​yawi? Ɛazra yeḍleb lemɛawna i wat Isṛayil yellan di Babil. Seţţ alaf seg-​sen i geddan yid-​es. Aṭas n lfeṭṭa, n ddheb ţ-​ţɣawsiwin ɣlayen ara ɛebbin wat Isṛayil yid-​sen.

Ɛazra ikcem-​it lxuf axaṭer abrid ara yeṭṭef yeččuṛ d yir lɛibad. Lɛibad-​agi zemren a sen-​kksen lfeṭṭa akk-​d ddheb-​nsen yerna zemren a ten-​nɣen. Dɣa, Ɛazra isnejmaɛ-​ed agdud n Isṛayil akken i teţwaliḍ di ţţeswiṛa-​yagi. Imiren, dɛan ɣer Yahwa akken ad iḥareb fell-​asen deg webrid-​agi iḍulen ara ṭṭfen si Babil ɣer Yarucalim.

Yahwa iḥureb fell-​asen. Mi ɛeddan ṛebɛa wagguren n tikli, agdud n Isṛayil yewweḍ bxiṛ ɣer Yarucalim. Annect-​a isbeggen-​ed belli Yahwa yeţḥarab dima ɣef wid iţeklen fell-​as.

Ɛazra ixef wis 2 alamma d wis 8.