TAQSIṬ TIS 80

Tekfa lɣerba fell-​asen

QRIB ad awḍen tura ɛamayen seg wasmi i teɣli temdint n Babil ger ifassen n wat Maday d wat Faras. Wali tura d acu akka iḍerrun! Atan At Isṛayil ǧǧan Babil! Amek i d-​ţţuserrḥen? Anwa i ten-​yeǧǧan ad ṛuḥen?

D Sirus, agellid n Faras. Aṭas n lweqt uqbel talalit n Sirus, Yahwa yenna-​d s yimi n nnbi Icɛaya belli ger ifassen n ugellid-​agi ara teɣli temdint n Babil axaṭer tiwwura-​ines ad qqiment ldint. Ayen i d-​yenna meṛṛa Yahwa yeḍra. D Sirus i gezwaren zdat n wat Maday d wat Faras akken ad steɛmṛen Babil. Kecmen deg yiḍ ɣer Babil si tewwura-​ines yeqqimen ldint.

Lameɛna Icɛaya, nnbi n Yahwa, yenna-​d daɣen belli Sirus ad yefk lameṛ akken ad ɛiwden lebni n Yarucalim d lemqam-​is. Sirus yefka lameṛ-​agi? Ih. Atah wayen i gumeṛ i wat Isṛayil: ‘Ṛuḥet ɣer Yarucalim yerna bnut lemqam n Yahwa Ṛebbi-​nwen.’ D ayen i ṛuḥen ad xedmen wat Isṛayil akken i teţwaliḍ di ţţeswiṛa-​yagi.

At Isṛayil yellan di Babil ur zmiren ara ad uɣalen irkulli ɣer Yarucalim imi iḍul webrid (800 kilumitrat). Aṭas deg-​sen i teǧǧa ṣṣeḥḥa, ma d wiyaḍ uɣalen d imɣaren. Lameɛna, kra, d ssebbat nniḍen i ten-​yeṭṭfen. I wid yeqqimen, agellid Sirus yefka lameṛ-​agi: ‘Fket lfeṭṭa, ddheb ţ-​ţikciwin nniḍen i wid ara yuɣalen ad ɛiwden lebni n Yarucalim d lemqam-​is.’

Fkan ihi tikciwin i wid yekkren ad ṛuḥen ɣer Yarucalim. Sirus yerra-​yasen ifenǧalen ţ-​ţeqbucin i d-​yewwi ugellid Nabuxadnuẓur si lemqam n Yahwa, di zzman-​nni ideg i ghudd Yarucalim. Akka, At Isṛayil ur ţţuɣalen ara ifassen d ilmawen.

Mi ɛeddan wazal n ṛebɛa wagguren, At Isṛayil leḥqen ɣer Yarucalim di lawan iɣef i d-​ihdeṛ Ṛebbi. Ih, tamdint n Yarucalim ɛeddan fell-​as swaswa 70 iseggasen segmi i teɣli. Di leɛwam-​agi meṛṛa tamurt teqqim texla, ur teţwazdeɣ ara. Tura m’akka i d-​uɣalen wat Isṛayil, ţ-​ţiswiɛin iweɛṛen i ten-​iţṛaǧun. D ayen ara nwali.

Icɛaya 44:28; 45:1-4; Ɛazra 1:1-11