Tira ɣef lḥiḍ
TAQSIṬ TIS 78
Tira ɣef lḥiḍ
ACU akka iḍerrun dagi? Agellid n Babil iɛreḍ-ed alef n yemdanen mechuṛen ɣer yiwet n tmeɣra tameqrant. Atnan ssexdamen tiqbucin n ddheb d lfeṭṭa akk-d ifenǧalen i d-ddmen si lemqam n Yahwa, yellan di Yarucalim. Di teswiɛt kan, ffɣen-d iḍudan n ufus n wemdan, bdan ţţarun ɣef lḥiḍ. Lɣaci meṛṛa iffeɣ-iten leɛqel.
D Belcatsar, mmi-s n mmi-s n Nabuxadnuẓur, i gellan d agellid di zzman-nni. Iɛeggeḍ s ṣṣut ɛlayen a s-d-awin iseḥḥaren-is meṛṛa. Yenna-yasen: ‘Win ara d-iɣren tira-yagi yerna ara iyi-d-yefken lmeɛna-s a t-ɣnuɣ s tikciwin w’ad yuɣal d amḍebber wis tlata di tgelda-w (lḥukuma-w).’ Lameɛna ula d yiwen seg iseḥḥaren-is ur yezmir a d-iɣer tira-nni neɣ a d-yefk lmeɛna-s.
Yemma-s n ugellid tesla i lḥess, dɣa tekcem ɣer wanda akken i tella tmeɣra. Tenna i ugellid: ‘Ur ţţagad ara. Yella yiwen wergaz di lḥukuma-k i gessnen iṛebbiten iqedsen. Asmi i gella jeddi-k Nabuxadnuẓur d agellid, yerra-t d aqerru ɣef iseḥḥaren-is meṛṛa. Isem-is Danyil. Ini a k-t-id-awin akken a k-d-yefk lmeɛna n tira-yagi.’
Imiren-nni kan wwin-d Danyil. Lḥaǧa tamezwarut i gexdem: yugi tikciwin-nni i s-fkan. Mbeɛd yessefhem i Belcatsar acuɣer yekkes zik-nni Yahwa tageldit (leḥkem) i jeddi-s Nabuxadnuẓur. Danyil yenna-yas: ‘Yeččuṛ d zzux, ɣef waya i t-iɛuqeb Yahwa.’
Danyil yenna i Belcatsar: ‘Kečč teẓriḍ d acu yeḍran d jeddi-k, lameɛna teččuṛeḍ d zzux am neţţa. Tewwiḍ-d tiqbucin d ifenǧalen si lemqam n Yahwa yerna teswiḍ deg-sen. Tḥemdeḍ iṛebbiten n wesɣar d iṛebbiten n weẓru, lameɛna ur tɛuzzeḍ ara Axellaq-nneɣ ameqran. Ɣef waya i d-iceggeɛ Ṛebbi afus-agi akken ad yaru imeslayen-a.’
Danyil yenna diɣen: ‘Atah wayen yuran: MENA, MENA, TEQAL d FARSIN.’
‘Aţah lmeɛna n wayen akka yuran. MENA: Ṛebbi yeḥseb ussan n lḥukuma-k yerna yessaweḍ-iţ ɣer lḥedd-is. TEQAL: teţwawezneḍ di lmizan, yerna ufan-k txuṣṣeḍ. FARSIN: lḥukuma-k teɣli ger ifassen n wat Faras d wat Maday.’
Werɛad yekfi Danyil ameslay mi d-ẓedmen wat Faras d wat Maday ɣef Babil. Steɛmṛen tamdint-nni yerna nɣan Belcatsar. Ayen akk yuran ɣef lḥiḍ yeḍra-d deg yiḍ-nni! Ihi, d acu ara yeḍrun tura d wat Isṛayil? Ur neţɛeṭṭil ara a t-nwali. Lameɛna, a nẓer uqbel ayen yeḍran d Danyil.