Ugin ad knun
TAQSIṬ TIS 77
Ugin ad knun
TECFIḌ ɣef tlata yelmeẓyen-agi? D iḥbiben-nni n Danyil i gugin ad ččen ayen ur sen-nlaq ara. At Babil semman-asen Cadrax, Micax akk-d Ɛabdnaɣu. Lameɛna muqel-iten tura. Acuɣer ur knin ara am medden meṛṛa zdat n lmeṣnuɛ-agi ameqran? D ayen ara nwali tura.
Tecfiḍ ɣef leqwanen i gura Yahwa s yiman-is iwumi qqaren Ɛecṛa n Lumuṛ? Lameṛ amezwaru yenna-d: ‘Ur ilaq ara aţ-ţɛebdeḍ iṛebbiten nniḍen siwa nekkini.’ Ɣas yewɛeṛ fell-asen, ilmeẓyen-a tebɛen lameṛ-agi.
Nabuxadnuẓur yellan d agellid n Babil, yessawel i waṭas n yemdanen imeqranen a d-asen ad ɛebden lmeṣnuɛ i gesbedd. Mi d-nnejmaɛen meṛṛa, yenna-yasen: ‘M’ara teslem i ṣṣut n lbuq, n snitra d dduzan n lmusiqa nniḍen, ilaq aţ-ţeknum yerna aţ-ţɛebdem lmeṣnuɛ-agi n ddheb. Win ur nkennu ara zdat-es yerna ur t-neţɛebbid ara, ad yeţţuḍegger imiren kan ɣer ufurnu n uḥeǧǧaǧu n tmes.’
Mi gesla belli Cadrax, Micax akk-d Ɛabdnaɣu ur knin ara zdat n lmeṣnuɛ-nni, Nabuxadnuẓur yezɛef aṭas. Yessawel i yelmeẓyen-nni, dɣa yumeṛ-asen tikkelt nniḍen ad knun. Lameɛna, ilmeẓyen-nni ţeklen ɣef Yahwa. Nnan i Nabuxadnuẓur: ‘Ṛebbi-nneɣ iɣef i nqeddec yezmer a ɣ-isellek. Lameɛna, ɣas ur ɣ-isellek ara, ur neţɛebbid ara lmeṣnuɛ-ik n ddheb.’
Mi gesla i imeslayen-agi, Nabuxadnuẓur yezɛef akteṛ. Deg wemḍiq-nni anda llan, yella yiwen ufurnu. Dɣa yefka ugellid lameṛ: ‘Sseḥmut afurnu-yinna sebɛa iberdan akteṛ ɣef zik.’ Mbeɛd, yenna i yergazen iǧehden n lɛeskeṛ-is ad cudden yerna ad ḍeggren Cadrax, Micax akk-d Ɛabdnaɣu ɣer tmes. Afurnu-nni yerɣa nezzeh, armi i tendeh tmes deg yergazen-nni iǧehden. Lameɛna, amek i teḍra d yelmeẓyen-nni yeţţuḍeggren ɣer daxel?
Agellid imuqel zdaxel n ufurnu-nni, dɣa teṭṭef-it tugdi tameqrant. Isteqsa iqeddacen-is: ‘Mačči tlata yergazen icudden i nḍegger ɣer tlemmast n tmes?’
Iqeddacen-is rran-as: ‘Ih, swaswa.’
Agellid yenna-yasen: ‘Lameɛna aql-i ţwaliɣ ṛebɛa yergazen i gleḥḥun di tlemmast n tmes. Ur cudden ara yerna ur ten-yuɣ wara. Argaz wis ṛebɛa yeţţak ccbiha ɣer lmelk.’ Imiren, agellid iqerreb ɣer tewwurt n ufurnu-nni, dɣa iɛeggeḍ: ‘A Cadrax, a Micax, a Ɛabdnaɣu, ay iqeddacen n Ṛebbi Ɛlayen, ffɣet-ed ɣer beṛṛa!’
Mi d-ffɣen ɣer beṛṛa, medden meṛṛa walan belli ur ten-yuɣ wara. Dɣa yenna ugellid: ‘Ad yeţţubarek Ṛebbi n Cadrax, n Micax akk-d Ɛabdnaɣu! Iceggeɛ-ed lmelk-is i ten-isellken axaṭer ur knin ara yerna ur ɛbiden ara ṛebbi nniḍen siwa Ṛebbi-nsen.’
Ur ɣ-d-ǧǧin ara Cadrax, Micax akk-d Ɛabdnaɣu lemtel yelhan deg wayen yeɛnan tuṭṭfa di Yahwa?
