Aɛejmi n ddheb
TAQSIṬ TIS 36
Aɛejmi n ddheb
A TAWAƔIT! Acu akka ixeddem wegdud? Ideɛɛu ɣer uɛejmi! Acimi ixeddem aya?
Imi gɛeṭṭel Musa deg wedrar, agdud yenna: ‘Ur neẓri ara acu yuɣen Musa. Ihi eyyaw a nexdem yiwen uṛebbit ara ɣ-issufɣen si tmurt-agi!’
Haṛun, gma-s n Musa yenna: ‘Yirbeḥ, kkset-ed timengucin n ddheb seg imeẓẓuɣen-nwen, tawim-iyi-tent-id.’ Haṛun iṭṭef ddheb i s-d-yewwi wegdud, issefsi-t, issufeɣ-ed yis aɛejmi n ddheb. Dɣa yenna wegdud: ‘Atah Ṛebbi-nneɣ i ɣ-d-issufɣen si Maṣer!’ Umbeɛd At Isṛayil xedmen tameɣra, ɛebden aɛejmi-nni n ddheb.
Mi gwala Yahwa annect-agi, yerfa s wurrif d ameqran. Ɣef wayagi i genna i Musa: ‘Ɣiwel, ṣubb ɣur-sen! Atan wegdud ixeddem ḥaca ayen ifesden. Yeţţu leqwanen-iw yerna iţseǧǧid zdat n uɛejmi n ddheb.’
S lemɣawla i d-iṣubb Musa seg wedrar. Mi qrib ad yaweḍ, iwala At Isṛayil zzin meṛṛa i uɛejmi-nni n ddheb, cennun, ceṭṭḥen. Din din tecɛel tmes di Musa, yerfa aṭas. Ɣef wayagi, iḍegger ɣer lqaɛa tiblaḍin-nni iɣef uran leqwanen n Ṛebbi, irẓa-tent, ṛuḥent akk d iceqfan. Umbeɛd, iddem-ed aɛejmi-nni n ddheb, issefsi-t, inɣed-it armi yuɣal d aɣebbar.
Agdud ixdem ayen ifesden nezzeh. Ɣef waya, Musa yumeṛ i kra n yergazen a d-ddmen isekkinen-nsen (lessyuf-nsen). Yenna-yasen: ‘Imdanen meṛṛa i gɛebden aɛejmi-nni n ddheb, ilaq ad mmten.’ Telt alaf n yergazen i gemmuten! Taqsiṭ-agi tessken-aɣ-d belli ilaq a nexḍu i iṛebbiten n lekdeb w’a neɛbed ala Yahwa.
