Aqiḍun i leɛbada
TAQSIṬ TIS 37
Aqiḍun i leɛbada
TEẒRIḌ d acu-t lebni-yagi? D aqiḍun ur necbi wayeḍ yeţwaɛezlen i leɛbada n Yahwa. Yeţţusemma diɣen aqiḍun imqeddes neɣ tanezduɣt n Ṛebbi. Agdud ifukk-it s lebni aseggas segmi i d-yeffeɣ si Maṣer.
D Yahwa i gebɣan lebni-yagi. M’akken yella Musa ɣef wedrar n Sinay, Yahwa yessefhem-as amek yebɣa lebni n uqiḍun-agi. Inna-yas a t-xedmen akken a sen-yishil a t-fessin. Akka, ad izmiren ad refden iḥricen n uqiḍun s amḍiq nniḍen anda ara t-sbedden. Ihi, m’ara ţḥerriken wat Isṛayil seg wemḍiq ɣer wayeḍ deg uneẓruf, ţţawin-t yid-sen.
Aqiḍun-agi llant deg-s snat n texxamin. Ma tmuqleḍ zdaxel n texxamt-inna tamecṭuḥt, tzemreḍ aţ-ţwaliḍ yiwen usenduq, yeţţusemman asenduq n leɛqed. Llant snat n lmalayek neɣ ikerruben n ddheb nnig-es. Ṛebbi yura abrid wis sin Ɛecṛa Lumuṛ-nni ɣef snat n teblaḍin nniḍen axaṭer yerẓa Musa timezwura. Tiblaḍin-agi ţwaxeznent zdaxel n usenduq n leɛqed nutenti d yiwet n tecmuxt yeččuṛen ţ-ţamana. Tecfiḍ d acu i ţ-ţamana?
Imdanen i gqeddcen deg uqiḍun-agi ţţusemman lmuqeddmin. D Haṛun, gma-s n Musa, i gextaṛ Yahwa akken ad yili d lmuqeddem ameqran. D neţţa i gesskanayen i wegdud amek ara yeɛbed Yahwa. Arraw-is llan daɣen d lmuqeddmin.
Tura muqel taxxamt tameqrant n uqiḍun. Tugar meṛtayen taxxamt-nni tamecṭuḥt. Twalaḍ tasenduqt-agi iseg i d-iteffeɣ dduxxan (abbu)? D ayen iwumi i nsemma aɛalṭar. Fell-as i sserɣayen lmuqeddmin lḥaǧa yesɛan rriḥa yelhan iwumi neqqar lǧawi (lebxuṛ). Dinna i gella lmeṣbaḥ yesɛan sebɛa n teftilin. Lḥaǧa tis tlata yellan di texxamt-agi, d ṭṭabla iɣef i srusuyen daymen tnac iɣerman.
Deg wefrag (webṛaḥ) n uqiḍun, tella lḥila tameqrant yeččuṛen d aman ideg i ssiriden lmuqeddmin. Yella daɣen uɛalṭar ameqran anda sserɣayen lmal imezlen i ţţaken d lweɛda i Yahwa. Aqiḍun-agi yers di tlemmast n wegrur; At Isṛayil zzin-as-d s iqiḍunen-nsen.
Tuffɣa 25:8-40; 26:1-37; 27:1-8; 28:1; 30:1-10, 17-21; 34:1, 2; Iɛebṛaniyen 9:1-5.