Azrem n nnḥas
TAQSIṬ TIS 41
Azrem n nnḥas
AYEN akka i gdewwṛen i tgejdit-agi d azrem n ṣṣeḥ, neɣ ala? Xaṭi. Azrem-agi yeţwaxdem s nnḥas. Yahwa yenna i Musa a t-yessali ɣef tgejdit akken a t-imuqel wegdud w’ad yidir. Lameɛna wigi yellan ɣef lqaɛa d izerman n ṣṣeḥ. Qqsen At Isṛayil yerna helken-ten. Teẓriḍ acuɣer?
Axaṭer At Isṛayil kkaten di Ṛebbi akk-d Musa, ţcetkin: ‘Acimi i ɣ-d-tewwim si Maṣer akken a nemmet deg uneẓruf-agi? Ur yelli weɣrum, ur llin waman dagi, yerna neɛya si tmana-yagi.’
Xuḍi tamana d lqut yelhan. S lbeṛhan i sen-ţ-id-yefka Yahwa. S lbeṛhan nniḍen yefka-yasen-d daɣen aman. Lameɛna ur yesteɛṛef ara wegdud s tikciwin n Ṛebbi. Ɣef waya i d-iceggeɛ Yahwa izerman-agi iteqqsen akken ad iɛaqeb At Isṛayil. Izerman-agi qqsen-ten, dɣa aṭas i gemmuten seg-sen.
Ɣer taggara agdud yusa-d ɣer Musa, yenna-yas: ‘Nedneb axaṭer nlumm ɣef Yahwa, nlumm fell-ak. Dɛu tura ɣer Yahwa iwakken ad issebɛed izerman-agi fell-aɣ.’
Musa iẓẓull ihi ɣef wegdud, dɣa Yahwa yenna i Musa ad yexdem azrem-agi n nnḥas. Inna-yas a t-iɛelleq ɣef tgejdit, akka kra n win yeţwaqqsen ilaq-as a t-imuqel. Musa yexdem swaswa akken i d-yenna Ṛebbi. Ihi, wid akk yeţwaqqsen, mkul m’ara muqlen azrem-nni n nnḥas, ḥellun.
Nezmer a nestenfeɛ mliḥ s teqsiṭ-agi. Akken ma nella necba At Isṛayil, amzun neţwaqqes s izerman-agi. Neţmeţţat akken ma nella. Muqel wid akk i k-d-izzin, aţ-ţwaliḍ belli medden meṛṛa ţţimɣuren, hellken yerna ţmeţţaten. Yella wannect-agi axaṭer imawlan-nneɣ imezwura, Adam d Ḥewwa, kksen-d afus-nsen di Ṛebbi. Lameɛna ifka-d Yahwa ţţawil swayes i nezmer a nɛic i lebda.
Yahwa iceggeɛ-ed Mmi-s, Ɛisa Lmasiḥ, ɣer lqaɛa. Ɛisa yeţwaɛelleq ɣef tgejdit (ajgu) axaṭer aṭas i gɣilen belli d argaz n diri i gella. Lameɛna, di tin n ṣṣeḥ d Yahwa i t-id-yefkan akken a ɣ-isellek. Ma nmuqel ɣur-es, ma netbeɛ lateṛ-is, imiren a nesɛu tudert n dima. A nwali akteṛ n leḥwayeǧ ɣef wayagi ɣer zdat.
Aneẓruf 21:4-9; Yuḥenna 3:14, 15.
