TAQSIṬ TIS 40

Ffɣen-​d waman seg weẓru

ASEGGAS iṭṭafar wayeḍ armi ɛeddan 10, 20, 30, 39 iseggasen! At Isṛayil mazal-​iten deg uneẓruf. Lameɛna iseggasen-​agi meṛṛa, Yahwa yelha-​d dima d wegdud-​is. Issečč-​iten s tmana. Deg wass iţwellih-​iten s tgejdit n tagut, deg yiḍ s tgejdit n tmes. Leɛwam-​agi meṛṛa, ur teqqerṣ llebsa-​nsen, ur bzigen iḍarren-​nsen.

Tura d aggur amezwaru n useggas wis 40 seg wasmi i d-​ffɣen si Maṣer. At Isṛayil sbedden iqiḍunen-​nsen tikkelt nniḍen di Qadic. Yufa-​ten-​id lḥal dinna asmi i gceggeɛ Musa, 40 n sna uqbel, 12 n yexbaṛǧiyen ɣer tmurt n Kanɛan. Meryem, weltma-​s n Musa, temmut di Qadic. Am zik, atan tura yekker ccwal dinna.

Agdud ur yufi ula ţ-​ţiqit n waman. Dɣa yebda yeţcetki i Musa: ‘Ah lemmer nemmut axiṛ. Acuɣer i ɣ-​d-​tewwim si Maṣer s amḍiq-​agi yessewḥacen anda ur d-​iţţemɣi wacemma? Ur telli nneɛma, ur llint tbexsisin, ur yelli waḍil, ur llint tṛemmanin. Ulac ula d aman i tissit.’

Musa d Haṛun ṛuḥen ɣer uqiḍun imqeddes akken ad ẓẓallen. Yahwa yenna i Musa: ‘Snejmaɛ-​ed agdud meṛṛa. Imiren, hdeṛ zdat-​sen i weẓru-​yinna. A d-​ffɣen seg-​s waman i wat Isṛayil d lmal-​nsen.’

Ihi Musa isnejmaɛ-​ed agdud, yenna-​yas: ‘Ḥesset-​ed a wid ur neţkil ara ɣef Ṛebbi! A wen-​d-​nessufeɣ nekk d Haṛun aman seg weẓru-​yagi?’ Musa iwet aẓru-​nni sin iberdan s uɛekkaz-​is, dɣa feggḍen-​d waman d leɛwanṣer. Qadden meṛṛa agdud d lmal.

Lameɛna yerfa Yahwa ɣef Musa d Haṛun. Teẓriḍ ayɣer? Axaṭer nnan d nutni ara d-​issufɣen aman seg weẓru-​nni. Lameɛna di tin n ṣṣeḥ, d Yahwa i gxedmen annect-​a. Ihi imi ur d-​nnin ara tideţ, Yahwa a ten-​iɛaqeb. Yenna: ‘Ur tessekcamem ara agdud-​iw ɣer tmurt n Kanɛan.’

At Isṛayil ur ɛeṭṭlen ara ǧǧan Qadic. S lemɣawla leḥqen ɣer wedrar n Hur. Haṛun yemmut dinna ɣef yixef n wedrar, yesɛa 123 iseggasen di leɛmeṛ-​is. At Isṛayil ḥeznen aṭas, ţrun fell-​as 30 n wussan. Mmi-​s Ilɛaẓar yuɣal deg wemkan-​is d lmuqeddem ameqran n wat Isṛayil.

Aneẓruf 20:1-13, 22-29; Asmekti 29:5.