Iḥbes yiṭij deg igenni
TAQSIṬ TIS 49
Iḥbes yiṭij deg igenni
MUQEL Yacuɛa. Atan la yeqqar: ‘Ay iṭij, ḥbes!’ Dɣa yeḥbes yiṭij. Yeqqim di tlemmast n igenni ass kamel. D Yahwa i gxedmen lbeṛhan-a! Lameɛna a nwali tura acuɣer ur yebɣi ara Yacuɛa ad yeɣli yiṭij.
Mi ṛuḥen xemsa igelliden-nni imcumen n Kanɛan ad ẓedmen fell-asen, At Gibɛun ceggɛen yiwen wergaz ɣer Yacuɛa akken a ten-iɛiwen. Yenna-yas: ‘Ɣiwel ṛuḥ-ed a ɣ-tsellkeḍ! Igelliden meṛṛa yellan deg idurar n tmurt-a usan-d ad nnaɣen yid-nneɣ.’
Din din Yacuɛa d yergazen n ṭṭrad ṭṭfen abrid. Lḥan iḍ kamel. Asmi i wwḍen ɣer temdint n Gibɛun, iɛsekṛiwen n xemsa igelliden-nni tekcem-iten tugdi, dɣa bdan regglen. Mbeɛd, Yahwa yebda yesseɣlay-ed fell-asen tikurin n webruri seg igenni, wid yemmuten seg-sent ɣelben wid i nɣan yergazen n Yacuɛa s ujenwi.
Yacuɛa iwala qrib ad yeɣli yiṭij. Ma yeɣli-d ṭṭlam, aṭas n iɛsekṛiwen n xemsa igelliden-nni ara irewlen. Dɣa, Yacuɛa yeẓẓull Yahwa, mbeɛd yenna: ‘Ay iṭij, ḥbes!’ Imiren iṭij iqqim yeţceɛciɛ di tlemmast n igenni, At Isṛayil kemmlen imenɣi armi ɣelben iɛdawen-nsen.
Aṭas n igelliden nniḍen n tmurt n Kanɛan i gkeṛhen agdud n Ṛebbi. Ilaq-asen azal n seţţa iseggasen i Yacuɛa d lɛeskeṛ-is akken ad ɣelben 31 igelliden n tmurt-agi. Asmi i tekfa lgirra, Yacuɛa yefreq tamurt n Kanɛan i leɛṛac mazal ur nesɛi akal neɣ lweṛt.
Ɛeddan aṭas iseggasen, dɣa yemmut Yacuɛa asmi i gesɛa 110 iseggasen di leɛmeṛ-is. Agdud yuɣ awal i Yahwa di lweqt meṛṛa ideg iɛac Yacuɛa d yeḥbiben-is. Lameɛna asmi i mmuten yergazen-agi n lɛali, At Isṛayil bdan xeddmen ayen ifesden yerna sseɣlayen-d lhemm ɣef yiman-nsen. D lawan ideg i ḥwaǧen lemɛawna n Ṛebbi.
Yacuɛa 10:6-15; 12:7-24; 14:1-5; Inezzurfa 2:8-13.