Leṣwar n Yariḥu
TAQSIṬ TIS 46
Leṣwar n Yariḥu
ACU yesseɣlin leṣwar-agi n Yariḥu? A s-tiniḍ teṭṭerḍeq lbumba tameqrant di tlemmast-nsen. Lameɛna di zzman-nni ulac lbumbat, ur sɛin ula ţ-ţimgeḥlin. Wagi d lbeṛhan nniḍen n Yahwa! Amek i d-yeḍra waya?
Ḥess i wayen yenna Yahwa i Yacuɛa: ‘Kečč d yergazen meṛṛa yessawḍen i lgirra ṛuḥet aţ-ţezzim i temdint. Zzit-as tikkelt i wass, xedmet annect-a seţţa n wussan. Awit yid-wen asenduq n leɛqed. Sebɛa n lmuqeddmin ad lḥun zdat-es w’ad ssendhen lbuqat-nsen.’
‘Ass wis sebɛa, a d-tezzim i temdint sebɛa tikkal. Imiren, ssendhet mliḥ lbuqat-nwen yerna ɛeggḍet s ṣṣut ɛlayen. Dɣa leṣwar n temdint ad hudden din din!’
Yacuɛa d wegdud xedmen akk ayen i sen-yenna Yahwa. M’akken i leḥḥun, ssusmen meṛṛa. Yiwen ur t-id-yuli lmenṭeq. Ala ṣṣut n lbuq d yerkasen-nsen imi sellen. Ahat iɛdawen n wegdud n Yahwa di Yariḥu tekcem-iten tugdi. Twalaḍ amrar-inna azeggaɣ i d-yeffɣen si ṭṭaq? Menhu i d bab n ṭṭaq-inna? D Raḥab. Raḥab texdem ayen akk i s-nnan sin yexbaṛǧiyen-nni. Tawacult-is meṛṛa tella yid-es zdaxel, ţɛassan lwaḥid acu ara yeḍrun.
Ɣer taggara, deg wass wis sebɛa, mi d-zzin i temdint sebɛa tikkal, irgazen ssendhen lbuqat-nsen yerna ɛeggḍen, dɣa ɣlin leṣwar-nni. Mbeɛd, Yacuɛa yenna: ‘Nɣet imezdaɣ meṛṛa, tesserɣem tamdint d wayen akk yellan deg-s. Ɛezlet kan ddheb, lfeṭṭa, nnḥas d wuzzal, terrem-ten s agerruj n uqiḍun n Yahwa.’
Yacuɛa yenna i sin yexbaṛǧiyen-nni: ‘Ṛuḥet ɣer wexxam n Raḥab, ssufɣet-ţ-id neţţat ţ-ţwacult-is meṛṛa.’ Raḥab d wexxam-is ţţusellken akken i s-weɛden yexbaṛǧiyen-nni.
