Lemɛahda n Iftaḥ
TAQSIṬ TIS 53
Lemɛahda n Iftaḥ
YELLA wasmi i txedmeḍ lemɛahda, yuɣal iwɛeṛ-ak aţ-ţeṭṭfeḍ deg wawal-ik? Akka i s-teḍra i wergaz-agi yellan di ţţeswiṛa, daymi i geḥzen. Argaz-agi d yiwen lqaḍi iẓewren n tmurt n Isṛayil. Isem-is Iftaḥ.
Iftaḥ iɛac di zzman ideg i ǧǧan wat Isṛayil leɛbada n Yahwa. Uɣalen armi d cceṛ-nni i xeddmen zik. Ihi Yahwa yeǧǧa At Ɛamun a ten-qehren. Annect-a yewwi At Isṛayil ad ɛeggḍen ɣer Yahwa, nnan-as: ‘Nedneb zdat-ek. Di leɛnaya-k sellkeɣ!’
At Isṛayil nedmen di cceṛ akk i xedmen. Beggnen-d belli nedmen mi uɣalen ɣer leɛbada n Yahwa. Yahwa iɛawen-iten ihi tikkelt nniḍen.
Agdud yextaṛ Iftaḥ akken ad yennaɣ akk-d wat Ɛamun. Iftaḥ yessarem a ten-iɛiwen Yahwa deg umenɣi-yagi, dɣa iwɛed i Yahwa: ‘Ma tsellmeḍ At Ɛamun ger ifassen-iw, asm’ara d-uɣaleɣ si lgirra, win ara d-yefk wemnaṛ n wexxam-iw ɣer beṛṛa a yi-d-immager, a k-t-fkeɣ d lweɛda.’
Yahwa iḥess i lemɛahda n Iftaḥ, iɛawen-it ad yerbeḥ lgirra. Mi guɣal s axxam-is, teẓriḍ anwa i d-yeffɣen a t-immager? D yelli-s. Ţ-ţin kan i gesɛa d dderya. Iftaḥ issuɣ, yenna: ‘A nnaɣ a yelli! Acḥal i yi-terḥiḍ. Ɛuhdeɣ Yahwa, ur zmireɣ ara ad ḥenteɣ.’
Mi tesla yelli-s n Iftaḥ s lemɛahda n baba-s, teḥzen ula d neţţat di tazwara. Tefhem belli ilaq-as aţ-ţeǧǧ baba-s ţ-ţeḥbibin-is akken aţ-ţṛuḥ aţ-ţeɛbed ṭṭul n leɛmeṛ-is Yahwa deg uqiḍun imqeddes yellan di Cilu. Dɣa tenna i baba-s: ‘Imi tɛuhdeḍ Yahwa, ilaq aţ-ţeṭṭfeḍ deg wawal-ik.’
Ihi yelli-s n Iftaḥ tekker, tṛuḥ s aqiḍun imqeddes yellan di Cilu akken aţ-ţeqdec ɣef Yahwa ṭṭul n leɛmeṛ-is. Mkul aseggas, tilawin n Isṛayil ţṛuḥunt ṛebɛa wussan ɣur-es, sɛeddayent akken lewqat yelhan. Agdud iḥemmel mliḥ yelli-s n Iftaḥ axaṭer tqeddec akken ilaq ɣef Yahwa.