TAQSIṬ TIS 44

Raḥab teffer ixbaṛǧiyen

ATNAN yergazen-​agi di ccedda tameqrant. Ilaq-​asen ad rewlen neɣ m’ulac ad mmten. Irgazen-​a d ixbaṛǧiyen n wat Isṛayil. Tameṭṭut-​a i ten-​iţɛawanen, isem-​is Raḥab. Raḥab tezdeɣ deg yiwen wexxam yellan ɣef ṣṣur n temdint n Yariḥu. A nwali acu yessawḍen irgazen-​a ɣer yir liḥala-​yagi.

At Isṛayil, yufan-​ten-​id lḥal kkren ad zegren asif n Uṛdun akken ad leḥqen ɣer tmurt n Kanɛan. Lameɛna uqbel ad ṭṭfen abrid, Yacuɛa iceggeɛ ɣer dinna sin yexbaṛǧiyen, yenna-​yasen: ‘Ṛuḥet aţ-​ţessenqdem tamurt akk-​d temdint n Yariḥu.’

Mi wwḍen yexbaṛǧiyen-​nni ɣer Yariḥu, rran ɣer wexxam n Raḥab. Lameɛna yiwen wergaz ixebbeṛ agellid n Yariḥu, yenna-​yas: ‘Iḍ-​agi usan-​d sin yergazen n wat Isṛayil iwakken ad ssenqden tamurt-​nneɣ.’ Mi gesla ugellid i wannect-​agi, iceggeɛ kra n yergazen ɣer Raḥab, nnan-​as: ‘Ssufeɣ-​ed irgazen-​nni yellan deg wexxam-​im!’ Lameɛna Raḥab teffer ixbaṛǧiyen-​nni sufella n ssqef n wexxam-​is. Dɣa tenna-​yasen: ‘Ţ-​ţideţ, usan-​d ɣur-​i yergazen, lameɛna ur ẓriɣ ara ansi-​ten. Mi d-​yeɣli yiḍ, mi qrib aţ-​ţeɣleq tewwurt n temdint, irgazen-​nni ffɣen. Ma tuzzlem, ahat a ten-​tqeḍɛem!’ Din din, irgazen-​nni tebɛen-​ten.

Akken kan ṛuḥen, Raḥab tuzzel ɣer ssqef, tenna i yexbaṛǧiyen-​nni: ‘Ẓriɣ belli a wen-​yefk Yahwa tamurt-​agi. Nesla amek i gesskew aman n lebḥeṛ Azeggaɣ mi d-​teffɣem si Maṣer, d wamek i tenɣam igelliden Siḥun akk-​d Ɛug. Aql-​i xedmeɣ-​awen leḥsan, ihi di leɛnaya-​nwen ggallet-​iyi a yi-​txedmen lxiṛ ula d kunwi. Sellket baba d yemma, atmaten-​iw d yessetma.’

Ixbaṛǧiyen-​nni ggullen i Raḥab ad xedmen ayen i sen-​teḍleb, lameɛna ilaq-​as aţ-​ţexdem yiwet n lḥaǧa. Nnan-​as: ‘Ddem-​ed amrar-​agi azeggaɣ, cudd-​it ɣer ṭṭaq-​im. Jmeɛ-​ed ɣur-​em iɛeggalen meṛṛa n wexxam-​im. Akka, asm’ara d-​nuɣal a nesteɛmeṛ tamdint n Yariḥu, a nwali amrar-​agi azeggaɣ, imiren ur nneqq ula d yiwen si twacult-​im.’ Mi uɣalen yexbaṛǧiyen-​nni ɣer Yacuɛa, ḥkan-​as akk ayen yeḍran.

Yacuɛa 2:1-24; Iɛebṛaniyen 11:31.