Yeldi webrid deg wasif
TAQSIṬ TIS 45
Yeldi webrid deg wasif
MUQEL! At Isṛayil atnan la zeggren asif n Uṛdun. Lameɛna, anda i ddan waman-is? Kra n ddqayeq kan uqbel, asif n Uṛdun yeččuṛ d aman axaṭer di lawan-nni yekkat waṭas n ugeffur. Lameɛna tura ulac aman deg-s! At Isṛayil zegren ɣef lqaɛa yekkawen, akken i zegren yakan lebḥeṛ Azeggaɣ. Teẓriḍ sani i ṛuḥen waman-nni? D ayen ara nwali tura.
Mi d-yewweḍ lawan ad zegren asif n Uṛdun, Yahwa yumeṛ i Yacuɛa ad yini i wat Isṛayil: ‘Lmuqeddmin ad refden asenduq n leɛqed w’ad zwiren zdat-wen. M’ara ssekcmen iḍarren-nsen ɣer wasif n Uṛdun, imiren kan ad ḥebsen waman-is.’
Lmuqeddmin refden asenduq n leɛqed, zwaren zdat n wegdud. Mi wwḍen ɣer wasif n Uṛdun, lmuqeddmin kecmen s aman mebla akukru. Yuɣ lḥal aman n wasif ǧehden yerna lqayit. Lameɛna, akken kan i ssekcmen iḍarren-nsen ɣer daxel, aman bdan ḥebbsen! Wagi d lbeṛhan ameqran! Yahwa igzem abrid i waman i d-iţṣubbun sufella. S lemɣawla yekkaw meṛṛa wasif!
Lmuqeddmin ireffden asenduq n leɛqed, ḥebsen di tlemmast n wasif yekkawen. Bedden dinna armi yezger wegdud meṛṛa i wasif. Twalaḍ-ten di ţţeswiṛa-ya?
Mi yezger meṛṛa wegdud, Yahwa yumeṛ i Yacuɛa ad yini i 12 n yergazen iǧehden: ‘Ṛuḥet ɣer wemkan anda bedden lmuqeddmin s usenduq n leɛqed. Ddmet-ed 12 n yeẓra, tsersem-ten d aɛemmuṛ deg wemkan anda ara tensem iḍ-agi. Ɣer zdat, asm’ara kkun-id-steqsin warraw-nwen ɣef lmeɛna n yeẓra-yagi, ass-nni a sen-teḥkum amek i ḥebsen waman n wasif n Uṛdun asmi i gezger usenduq n leɛqed n Yahwa. Iẓra-yagi ad ilin d ccfawa n lbeṛhan-agi!’ Yacuɛa yesbedd diɣen 12 n yeẓra anda i bedden lmuqeddmin deg wasif.
Ɣer taggara, Yacuɛa yenna i lmuqeddmin ireffden asenduq n leɛqed: ‘Ffɣet-ed seg wasif!’ Akken kan i d-ffɣen, bdan ţţuɣalen-d waman am zik.