Yiwen umaker di Isṛayil
TAQSIṬ TIS 47
Yiwen umaker di Isṛayil
MUQEL d acu akka iteffer wergaz-agi deg uqiḍun-is! D aqendur ireqmen, lqaleb n ddheb d kra n iṣurdiyen n lfeṭṭa. Iddem-iten-id si temdint n Yariḥu. Lameɛna d acu i glaq ad xedmen i leḥwayeǧ meṛṛa yellan di Yariḥu? Tecfiḍ?
Lukan d lebɣi, mḥan akk ayen yellan dinna. Ma d ddheb d lfeṭṭa, ilaq-asen a ten-awin ɣer ugerruj yellan deg uqiḍun n Yahwa. Ihi imdanen-agi i teţwaliḍ, ur uɣen ara awal i Ṛebbi. Ukren ayen yellan d ayla n Yahwa. Isem n wergaz-a d Ɛaxan, ma d wid yellan ɣer tama-s d iɛegallen n wexxam-is. A nwali tura d acu ara yeḍrun.
Mi tɛedda tukerḍa n Ɛaxan, Yacuɛa iceggeɛ kra n yergazen ad ẓedmen ɣef temdint n Ɛay. Lameɛna imezdaɣ n Ɛay rnan At Isṛayil deg imenɣi. Kra deg-sen mmuten, wiyaḍ rewlen. Ul n Yacuɛa idub aṭas. Yeɣli ɣef wudem ɣer lqaɛa, dɣa yeẓẓull Yahwa: ‘A nnaɣ a Yahwa, acuɣer i teǧǧiḍ annect-agi a d-yeḍru?’
Yahwa iǧuweb-as: ‘Kker! At Isṛayil denben. Ddmen seg wayen i glaq ad ssengren neɣ ad ɛezlen i uqiḍun n Yahwa. Ukren aqendur urqim yerna ṭṭfen imawen-nsen. Tura ur ţţuɣaleɣ ara a kkun-barkeɣ alamma temḥam aqendur-a d win yukren leḥwayeǧ-agi.’ Yahwa yenna i Yacuɛa belli d neţţa ara s-d-isseknen yir bnadem-agi.
Yacuɛa ijmeɛ-ed agdud meṛṛa, imiren Yahwa iwehha-yas-d Ɛaxan. Ɛaxan yenna: ‘Denbeɣ. Mi walaɣ aqendur-nni urqim, lqaleb-nni n ddheb d kra n iṣurdiyen-nni n lfeṭṭa, yewwi-yi ṭṭmeɛ, dɣa ddmeɣ-ten. A ten-tafem neṭleɣ-ten di tlemmast n uqiḍun-iw.’
Mi s-d-wwin ayen akk ufan, Yacuɛa yenna i Ɛaxan: ‘Acimi i ɣ-d-tewwiḍ lhemm? Tura a d-yesseɣli Yahwa tawaɣit ɣef uqerru-k.’ Imiren, At Isṛayil meṛṛa bdan ṛejjmen Ɛaxan ţ-ţwacult-is armi mmuten. Tamsalt-agi tbeggen-ed belli ur ilaq ara a neddem ayen ur nelli ara d ayla-nneɣ.
Mbeɛd ayagi meṛṛa, At Isṛayil ṛuḥen ad nnaɣen tikkelt nniḍen nutni d wat Ɛay. Abrid-agi Yahwa iɛawen agdud-is, dɣa rebḥen lgirra.