Ɛisa ţ-ţmeṭṭut n wat Cumrun
TAQSIṬ TIS 90
Ɛisa ţ-ţmeṭṭut n wat Cumrun
DI TMURT n Cumrun, Ɛisa yeqqim ɣer tama n lbir akken ad yesteɛfu. Inelmaden-is ṛuḥen ɣer temdint a d-aɣen ayen ara ččen. Aţţan tusa-d yiwet n tmeṭṭut aţ-ţagem, akken i teţwaliḍ di ţţeswiṛa. Ɛisa yenna-yas: ‘Efk-iyi-d ad sweɣ.’
Tameṭṭut-nni tewhem aṭas. Teẓriḍ ayɣer? Axaṭer Ɛisa yella d Uday, ma d neţţat n wat Cumrun. Yuɣ lḥal azgen ameqran n Wudayen keṛhen At Cumrun yerna ɣunzan-ten ula d aɣunzu. Lameɛna Ɛisa iḥemmel imdanen n mkul ccetla. Yenna-yas ihi: ‘Lemmer teẓriḍ anwa i m-d-yessutren aman, tili d kemm ara s-yessutren a m-d-yefk aţ-ţesweḍ; neţţa, d aman yessidiren ara m-d-yefk.’
Tameṭṭut-nni tenna-yas: ‘A sidi, lbir-agi lqay yerna ur tesɛiḍ ula d abidun s wacu ara d-tagmeḍ. Ansi ara k-d-kken ihi waman-agi yessidiren?’
Ɛisa yessefhem-as: ‘Lemmer aţ-ţesweḍ seg waman n lbir-agi, aţ-ţuɣaleḍ aţ-ţfadeḍ. Lameɛna aman ara fkeɣ nekkini zemren ad fken tudert n dayem.’
Tameṭṭut-nni terra-yas: ‘A sidi, efk-iyi-d seg waman-agi iwakken ur ţţuɣaleɣ ara ad fadeɣ, iwakken ur d-ţţuɣaleɣ ara yakk ɣer dagi ad agmeɣ.’
Tameṭṭut-nni tɣil belli Ɛisa iheddeṛ-ed ɣef waman n ṣṣeḥ. Lameɛna Ɛisa, neţţa, iţmeslay-ed ɣef tideţ yeɛnan Ṛebbi ţ-ţgelda-s. Tideţ-agi tecba aman yeţţaken tudert. Tezmer aţ-ţessider imdanen i dima.
Mbeɛd, Ɛisa yenna-yas: ‘Ṛuḥ ssiwel i wergaz-im umbeɛd tuɣaleḍ-d ɣer dagi.’
Tameṭṭut-nni terra-yas: ‘Ur sɛiɣ ara argaz.’
Ɛisa yenna-yas: ‘Ţ-ţideţ i d-tenniḍ, meɛna xemsa iberdan i tzewǧeḍ ma d win yellan yid-em ass-a mačči d argaz-im.’
Tameṭṭut-nni tewhem xilla axaṭer ayen akk i d-yenna Ɛisa d ṣṣeḥ. Amek i geẓra Ɛisa leḥwayeǧ-agi meṛṛa? Tecfiḍ, d Ṛebbi i d-iceggɛen Ɛisa ɣer lqaɛa. D neţţa ihi i s-d-yemlan lumuṛ-agi meṛṛa. Di teswiɛt-nni kan wwḍen-d inelmaden n Ɛisa. Mi t-id-ufan yeţmeslay neţţa ţ-ţmeṭṭut n wat Cumrun, wehmen aṭas.
Acu i nezmer a neḥfeḍ si teqsiṭ-agi? Ɛisa ixeddem lxiṛ i yemdanen n mkul ccetla. Ula d nekni ilaq a nxeddem am neţţa. Ur ilaq ara a s-nini belli kra n lɛibad diri-ten axaṭer llan si ccetla nniḍen. Ɛisa yebɣa imdanen meṛṛa ad issinen tideţ yeţţawin ɣer tudert n dayem. Ula d nekni, nebɣa a nɛiwen imdanen ad issinen tideţ.