TAQSIṬ TIS 91

Ɛisa ɣef wedrar

TWALAḌ argaz-​agi yeqqimen dagi? D Ɛisa. Atan la yesɣaray lɣaci ɣef wedrar n tmurt n Jlili. Wigad-​agi yeqqimen ɣer tama-​s d inelmaden-​is. Ɛisa yextaṛ 12 gar-​asen iwakken ad uɣalen d imceggɛen. Imceggɛen d inelmaden iwumi yefka Ɛisa ccɣel isɛan azal ameqran. Tessneḍ ismawen-​nsen?

Yella Semɛun, iwumi qqaren daɣen Buṭrus, akk-​d gma-​s Andriyus. Llan diɣen sin watmaten nniḍen iţţusemman Yeɛqub d Yuḥenna. Sin yemceggɛen nniḍen ţţusemman ula d nutni Semɛun akk-​d Yeɛqub. Sin nniḍen sɛan isem n Yudas. Yiwen d Yudas n Qeryut, ma d wayeḍ d Yudas iwumi qqaren daɣen Taddi. Atnah tura yismawen n ṛebɛa yemceggɛen ineggura: Filbas, Natanahil (iţţusemman daɣen Bartelmay), Matta akk-​d Ṭuma.

Mi d-​yuɣal si tmurt n Cumrun, Ɛisa yebda yeţberriḥ tikkelt tamezwarut lexbaṛ-​agi: ‘Tagelda n igenwan teqreb-​ed.’ Teẓriḍ d acu i ţ-​ţagelda-​yagi? D lḥukuma n ṣṣeḥ n Ṛebbi. Ɛisa yella d agellid n lḥukuma-​yagi. A d-​yeḥkem seg igenni yerna a d-​yawi lehna ɣef lqaɛa. Ddaw n Tgelda n Ṛebbi, lqaɛa meṛṛa aţ-​ţuɣal d lǧennet.

Di ţţeswiṛa-​yagi, Ɛisa yesɣaray lɣaci ɣef waṭas n leḥwayeǧ yeɛnan Tagelda n Ṛebbi. Issefhem-​asen: ‘Atah wamek i glaq aţ-​ţeţẓallam: A Baba-​tneɣ yellan deg igenni, isem-​ik ad iţwaqeddes, tagelda-​k a d-​tas, lebɣi-​k ad iḍru di lqaɛa akken yeḍra deg igenni.’ Aṭas n yemdanen i gsemman i tẓallit-​agi “Taẓallit n Baba-​tneɣ”. Yella wass ideg i tesliḍ i tẓallit-​agi?

Ɛisa imla daɣen i lɣaci amek i glaq aţ-​ţili tikli-​nsen ɣer wiyaḍ. Inna-​yasen: ‘Xedmet i wiyaḍ ayen i tebɣam a wen-​t-​xedmen.’ Yeɛǧeb-​ak lḥal m’ara k-​xeddmen lxiṛ wiyaḍ? Ɛisa yenna-​d belli ula d nekni ilaq-​aɣ ihi a nxeddem lxiṛ i wiyaḍ. Acḥal ara telhu temɛict ɣef lqaɛa di lǧennet asm’ara tebɛen lɣaci ayen akka i d-​yenna Ɛisa!

Matta ixef wis 5 alamma d wis 7; 10:1-4.