Ɛisa di lemqam
TAQSIṬ TIS 87
Ɛisa di lemqam
MUQEL aqcic-agi amecṭuḥ yeţmeslayen d yemɣaren. Imɣaren-agi d lecyux n lemqam n Ṛebbi yellan di temdint n Yarucalim, ma d aqcic-a d Ɛisa. Tura atan yesɛa 12 n sna di leɛmeṛ-is.
Lecyux-agi wehmen axaṭer aṭas n leḥwayeǧ i gessen Ɛisa ɣef Ṛebbi d wayen yuran deg Wedlis Iqedsen. Lameɛna acuɣer ur llin ara yid-es imawlan-is? Anida-ten? D ayen ara nwali tura.
Mkul aseggas, Yusef ţ-ţwacult-is ţṛuḥun ɣer temdint n Yarucalim iwakken ad ḥedṛen i yiwen lɛid ur necbi wayeḍ yeţţusemman Lɛid n Usuref (iwumi qqaren kra Tafaska). Abrid si Naṣaret ɣer temdint n Yarucalim iḍul aṭas axaṭer ulac tikeṛṛusin neɣ timacinin di zzman-nni. Azgen ameqran n yemdanen teddun ɣef uḍar. Ilaq-asen telt eyyam iwakken ad awḍen ɣer temdint n Yarucalim.
Yiwen wass, Yusef d Meryem kkren ad uɣalen ɣer Naṣaret mi gfukk Lɛid n Usuref. Lameɛna aseggas-agi aṭas yid-sen i llan. Ɛisa yesɛa aṭas n watmaten ţ-ţyessetmatin mecṭuḥen. Yusef d Meryem ilaq-asen ihi ad lhun yid-sen meṛṛa. M’akken i llan deg webrid, ɣilen yedda Ɛisa ţ-ţerbaɛt nniḍen axaṭer ur t-walan ara ɣer tama-nsen. Lameɛna, mi ḥebsen tikli tameddit, ur ufin ara Ɛisa. Qellben fell-as ger wid akk i sen-yeţţilin d leḥbab-nsen, lameɛna ulac lexbaṛ-is. Ihi, uɣalen ɣer temdint n Yarucalim iwakken ad nadin fell-as.
Ɣer taggara ufan Ɛisa di lemqam, yeqqim ger lecyux, ismeḥsis-asen yerna isteqsay-iten. Lɣaci meṛṛa wehmen di lefhama-s. Lameɛna Meryem tenna-yas: ‘A mmi, acuɣer i ɣ-txedmeḍ akka? Nekk d baba-k neṛwa aḥebbeṛ, acḥal i nqelleb fell-ak.’
Ɛisa yerra-yasen: ‘Acuɣer i teţqellibem fell-i? Eɛni ur teẓrim ara belli ilaq-iyi ad iliɣ deg wexxam n Baba?’
Ɛisa iḥemmel imeḍqan anda yezmer ad iḥfeḍ aṭas n leḥwayeǧ ɣef Ṛebbi. Mačči d imeḍqan-agi i ɣ-ilaq a nḥemmel ula d nekni? Mi d-yuɣal ɣer Naṣaret, Ɛisa iḥeddeṛ mkul dduṛt (smana) i inejmuɛen yeɛnan leɛbada. Dinna yeţţak dima tameẓẓuɣt, daymi i geḥfeḍ aṭas n leḥwayeǧ ɣef Wawal n Ṛebbi. Yelha mliḥ ma netbeɛ lemtel n Ɛisa.