Ɛisa ilul-ed deg udaynin
TAQSIṬ TIS 85
Ɛisa ilul-ed deg udaynin
TEẒRIḌ anwa-t llufan-agi? D Ɛisa. Atan tura kan i d-ilul deg udaynin. Akken i teţwaliḍ di ţţeswiṛa-yagi, Meryem tṛuḥ aţ-ţesgen Ɛisa di lmedwed, amkan anda srusuyen ahicuṛ (asaɣur) i lmal. Lameɛna, acu akka i txeddem Meryem neţţat d Yusef deg udaynin-agi? Mačči d amkan anda i d-ţlalen llufanat, neɣ ala?
Wagi d ayen ibanen! Aţah ihi ssebba i ten-id-yewwin ɣer dagi: Ugusti Qayṣer yellan d aneḥkam n Ṛuma, yessufeɣ-ed yiwen n lqanun i gumṛen i mkul yiwen ad yuɣal ɣer temdint anda ilul akken ad iţţujerred yisem-is deg yiwet n tektabt. Yusef iṛuḥ ihi ad iţţujerred di Bit-Liḥim (Bitelḥem), tamdint anida ilul. Lameɛna mi yewweḍ neţţa d Meryem ɣer dinna, ur ufin ara amkan anda ara nsen. D annect-a i ten-id-yewwin ɣer udaynin-agi. Ass-nni swaswa ideg i wwḍen i d-ilul Ɛisa! Meɛna akken i t-teţwaliḍ, ur t-yuɣ wara.
Twalaḍ imeksawen-inna i d-iteddun ad ẓren Ɛisa? Uqbel a d-ṛuḥen, llan di lexla ţɛassan lmal-nsen deg yiḍ. Lameɛna ciṭ kan akka, tecceɛceɛ-ed yiwet n tafat, tezzi-yasen-d meṛṛa. Teẓriḍ d acu i walan? D yiwen n lmelk! Imeksawen-nni ikcem-iten lxuf d ameqran. Lameɛna lmelk-nni yenna-yasen: ‘Ur ţţagadet ara! Aql-i wwiɣ-awen-d lexbaṛ n lxiṛ. Ass-a di Bit-Liḥim, ilul-ed Ɛisa Lmasiḥ, amsellek n yemdanen! Aţ-ţafem llufan-agi yeţţel yerna yeṭṭeṣ di lmedwed.’ Imiren kan usant-ed waṭas n lmalayek, bdant ţḥemmident Ṛebbi. S lemɣawla imeksawen-nni qellben ɣef Ɛisa armi i t-ufan.
Teẓriḍ ayɣer yesɛa Ɛisa azal ameqran? Tɛelmeḍ anwa i gella s ṣṣeḥ? Tecfiḍ? Di teqsiṭ tamezwarut n wedlis-agi, nehdeṛ-ed ɣef lxelq amenzu n Ṛebbi i geḥseb am mmi-s. Mmi-s-agi iɛawen Yahwa asm’akken i d-ixleq igenwan, lqaɛa d leḥwayeǧ meṛṛa nniḍen. D Ɛisa i d lxelq-agi amenzu!
Yahwa yeddem tudert n Mmi-s yellan deg igenni, iger-iţ di tɛebbuṭ n Meryem. Din din llufan-nni yebda yeţnerni am llufanat akk nniḍen. Lameɛna llufan-agi d Mmi-s n Ṛebbi! Ɣer taggara, Ɛisa ilul-ed di Bit-Liḥim, deg udaynin-agi ger lmal. Tfehmeḍ tura acimi i feṛḥent lmalayekkat m’akken i d-xebbṛent lɣaci s tlalit n Ɛisa?