Ɛisa yusa-d am ugellid
TAQSIṬ TIS 97
Ɛisa yusa-d am ugellid
MI GƐEDDA cwiṭ n lweqt segmi i gesseḥla sin iderɣalen-nni, Ɛisa ikemmel abrid-is ɣer yiwet n taddart tamecṭuḥt iqerben tamdint n Yarucalim. Mi qrib ad yaweḍ, yenna i sin ger inelmaden-is: ‘Ṛuḥet ɣer taddart-ihin. Aţ-ţafem dinna aɣyul amecṭuḥ, brut-as-d tawim-iyi-t-id.’
Mi s-d-wwin aɣyul-nni, Ɛisa irkeb fell-as, iṛuḥ ɣer Yarucalim. Mi qrib ad yaweḍ ɣer din, mmugren-t-id waṭas n lɣaci. Azgen ameqran deg-sen kksen llebsa-nsen, ssan-ţ deg webrid. Ma d wiyaḍ gezmen tiseḍwa n tezdayin, ssan-tent ula d nutni deg webrid. Ţɛeggiḍen: ‘Iţţubarek ugellid i d-yusan s yisem n Yahwa!’
Zik-nni di tmurt n Isṛayil, igelliden ijdiden keččmen tamdint n Yarucalim ɣef weɣyul amecṭuḥ iwakken ad beggnen iman-nsen i wegdud. D ayen i gxeddem dagi Ɛisa. Lɣaci-yagi atnan sskanayen-d belli bɣan ad yuɣal d agellid-nsen. Meɛna mačči d medden meṛṛa i gebɣan annect-a. Iban-ed waya deg wayen akken yeḍran mi gṛuḥ Ɛisa ɣer lemqam.
Di lemqam, Ɛisa yesseḥla iderɣalen d iquḍaren. Mi walan annect-a, arrac imecṭaḥ bdan ţḥemmiden-t s taɣect ɛlayen. Lameɛna ayagi yesserfa lmuqeddmin, dɣa nnan i Ɛisa: ‘Tesliḍ d acu akka i qqaren warrac-agi?’
Ɛisa yerra-yasen: ‘Sliɣ, ih. Leɛmeṛ teɣrim ayagi deg Wedlis Iqedsen: “Ṛebbi a d-yessufeɣ leḥmadi seg yimawen n warrac imecṭaḥ?”’ Dɣa arrac-nni kemmlen ţḥemmiden agellid yesbedd Ṛebbi.
Mebla ccekk nebɣa a nɛaned arrac-agi imecṭaḥ. Izmer lḥal kra ad ɛerḍen a ɣ-qeḍɛen ameslay ɣef Tgelda n Ṛebbi. Meɛna a nkemmel a nheddeṛ i wiyaḍ ɣef leḥwayeǧ ifazen ara yexdem Ɛisa.
Mačči asm’akken yella di lqaɛa i glaq ad yebdu Ɛisa leḥkem-is. Melmi ara yeḍru ihi waya? Inelmaden-is nudan ad afen lǧawab i westeqsi-yagi. D ayen ara nɣer umbeɛd.
Matta 21:1-17; Yuḥenna 12:12-16.