Ɣef yiɣil uzemmur
TAQSIṬ TIS 98
Ɣef yiɣil uzemmur
ATAH Ɛisa ɣef yiɣil uzemmur. Ṛebɛa yergazen-agi yeqqimen yid-es d imceggɛen-is. Yella Andriyus akk-d gma-s Buṭrus, Yeɛqub akk-d gma-s Yuḥenna. Ayen akka i teţwaliḍ deffir-nsen d lemqam n Ṛebbi yellan di temdint n Yarucalim.
Tura ɛeddan yumayen segmi i gekcem Ɛisa Yarucalim ɣef weɣyul amecṭuḥ. Aql-aɣ deg wass n ţţlata. Ɛisa ikker, iṛuḥ ṣṣbeḥ zik ɣer lemqam. Dinna, lmuqeddmin nudan a t-ṭṭfen akken a t-nɣen. Lameɛna ugaden a s-xedmen kra imi t-ḥemmlen lɣaci.
Ɛisa yenna i lɛulama-yagi n ddin: ‘Ay izerman d ccetla n izerman! A kkun-iɛaqeb Ṛebbi ɣef leḥwayeǧ akk n diri i txedmem.’ Mbeɛd, Ɛisa iṛuḥ ɣer yiɣil uzemmur anda i t-steqsan ṛebɛa yemceggɛen-agi-ines i teţwaliḍ di ţţeswiṛa. Teẓriḍ ɣef wacu i t-steqsan?
Steqsan-t ɣef leḥwayeǧ i d-iteddun ɣer zdat. Imceggɛen-is ɛelmen belli Ɛisa ad ikkes cceṛ meṛṛa yellan ɣef lqaɛa. Lameɛna bɣan ad ẓren melmi ara d-yeḍru wayagi, yeɛni melmi ara d-yuɣal ad iḥkem am Ugellid.
Ɛisa yeẓra belli asm’ara d-yuɣal, ur ţţizmiren ara a t-walin inelmaden-is axaṭer nutni ad ilin di lqaɛa ma d neţţa ad yili deg igenni. Ɛisa ixebbeṛ ihi imceggɛen-is ɣef kra n leḥwayeǧ ara yeḍrun di lqaɛa asm’ara yuɣal d agellid deg igenni. Anta-tent kra si leḥwayeǧ-agi?
Atah wayen i sen-yenna Ɛisa: ‘Ad ilint lgirrat annect-ila-tent. Lɣaci ad helken yerna ad ṛwun laẓ. Aţ-ţili tmenɣiwt akk-d zzelzlat timeqranin. Lexbaṛ n lxiṛ n Tgelda n Ṛebbi ad iţţuberreḥ ɣef lqaɛa meṛṛa.’ Yella wasmi ḍrant leḥwayeǧ-agi di lweqt-nneɣ? Ih! Annect-agi ihi d lebyan belli Ɛisa la iḥekkem tura deg igenni. Qrib a d-yaweḍ lweqt anda ara yemḥu cceṛ meṛṛa yellan di lqaɛa.
Matta 21:46; 23:1-39; 24:1-14; Marqus 13:3-10.