TAQSIṬ TIS 88

Yeḥya yesseɣḍes Ɛisa

TWALAḌ titbirt-​agi i d-​yeţṣubbun ɣef uqerru n wergaz-​agi? Argaz-​a d Ɛisa. Tura yesɛa 30 n sna di leɛmeṛ-​is. Wagi yellan ɣer tama-​s d Yeḥya. Nemmeslay-​ed ciṭuḥ fell-​as uqbel. Tecfiḍ acu yeḍran asmi i tṛuḥ Meryem ɣer Ilicaba, tameṭṭut-​nni i s-​iţţilin? Llufan yellan di tɛebbuṭ-​is yefrawes si lfeṛḥ. Llufan-​agi d Yeḥya. Lameɛna, acu akka xeddmen dagi di sin yid-​sen?

Atan Yeḥya akken kan yebbeɣ Ɛisa deg wasif n Uṛdun. Ayen akka i s-​yexdem qqaren-​as aɣḍas. Lmeɛna-​s: amdan ad iţwabbeɣ deg waman s lekmal-​is, umbeɛd a d-​iţwakkes syenna. D ayen i gxeddem Yeḥya i lɣaci, daymi i s-​ssawalen Yeḥya aɣeṭṭas. Lameɛna, acu i t-​yewwin ad yesseɣḍes Ɛisa?

D Ɛisa s yiman-​is i s-​yessutren a t-​yesseɣḍes. Yeḥya yesseɣḍas wid akk yebɣan a d-​beggnen zdat n lɣaci belli nedmen di yir lefɛayel-​nsen. Lameɛna, yella wasmi yexdem Ɛisa lḥaǧa n diri iɣef yendem? Xaṭi, leɛmeṛ yexdim ayen n diri axaṭer yella d Mmi-​s awḥid n Ṛebbi i d-​yekkan seg igenni. Ɣef ssebba nniḍen ihi i geḍleb i Yeḥya a t-​yesseɣḍes. Anta-​ţ ssebba-​yagi? D ayen ara nwali tura.

Uqbel ad iṛuḥ ɣer Yeḥya, Ɛisa yella d aneǧǧaṛ. Aneǧǧaṛ d amdan ixeddmen leḥwayeǧ s wesɣar am ṭṭwabel d ikersiyen. Yusef, argaz n Meryem, yella d aneǧǧaṛ. D neţţa i gesseḥfḍen lxedma-​yagi i Ɛisa. Lameɛna Yahwa ur d-​iceggeɛ ara Mmi-​s ɣer lqaɛa iwakken ad yili d aneǧǧaṛ. Ɣef ccɣel nniḍen isɛan azal ameqran i t-​id-​iceggeɛ. Tura iwweḍ-​ed lweqt ad ibdu Ɛisa ccɣel-​agi. Iwakken a d-​ibeggen zdat n lɣaci belli iṛuḥ-​ed ad ixdem lebɣi n Baba-​s, yessuter i Yeḥya a t-​isseɣḍes. Ifṛeḥ Ṛebbi s wannect-​a?

Ifṛeḥ aṭas axaṭer mi d-​yeffeɣ Ɛisa seg waman, tekka-​d yiwet n taɣect seg igenni, tenna-​d: ‘Wagi d Mmi, deg-​s i gella lfeṛḥ-​iw.’ Imiren kan amzun ldin igenwan, dɣa tṣubb-​ed yiwet n tetbirt ɣef Ɛisa. Lameɛna, mačči ţ-​ţitbirt n ṣṣeḥ. D ṛṛuḥ iqedsen n Ṛebbi i d-​yersen s ṣṣifa n tetbirt.

Tura aṭas n leḥwayeǧ iɣef ilaq ad imeyyez Ɛisa. Ɣef wayagi i gṛuḥ weḥd-​es 40 n wussan ɣer yiwen n wemkan. Dinna, Cciṭan iqerreb-​ed ɣur-​es. Tlata iberdan i geɛreḍ ad yawi Ɛisa ad iɛaṣi lumuṛ n Ṛebbi. Lameɛna Ɛisa ur s-​issemḥess ara.

Umbeɛd, mi d-​yebren syenna, Ɛisa yemmuger-​ed kra n yergazen i guɣalen d inelmaden-​is imezwura. Inelmaden d wid yettabaɛen lateṛ n bnadem. Kra seg-​sen ţţusemman Andriyus, Buṭrus (iţţusemman daɣen Semɛun), Filbas akk-​d Natanahil (iţţusemman daɣen Bartelmay). Ɛisa d inelmaden-​agi ijdiden ṛuḥen ɣer tmurt n Jlili. Dinna ḥebsen di Kana, tamdint n Natanahil. Ɛisa iṛuḥ ɣer yiwet n tmeɣra tameqrant anda yexdem lbeṛhan amezwaru. Teẓriḍ d acu-​t? Yerra aman d ccṛab.

Matta 3:13-17; 4:1-11; 13:55; Marqus 6:3; Yuḥenna 1:29-51; 2:1-12.