TAQSIṬ TIS 3

Argaz ţ-​ţmeṭṭut imezwura

ACU i neţwali tura ɣef ţţeswiṛa-​ya? Neţwali argaz ţ-​ţmeṭṭut imezwura. Teẓriḍ anwa i ten-​id-​ixelqen? D Ṛebbi. Tessneḍ isem n Ṛebbi? D Yahwa. Argaz-​agi d Adam, ma ţ-​ţameṭṭut-​agi d Ḥewwa.

Atah wamek i d-​ixleq Yahwa Adam. Iddem-​ed aɣebbar n wakal, yessufeɣ-​ed yis yiwet n lǧeţţa ur nesɛi ara lexṣaṣ, lǧeţţa n wergaz. Mbeɛd, Ṛebbi isuḍ deg wanzaren-​is, dɣa Adam yuɣal d amdan iddren.

Yahwa Ṛebbi ihegga ccɣel i Adam. Yenna-​yas ad yefk ismawen i lḥiwan. Ilaq-​as i Adam a ten-​imuqel nezzeh akken a sen-​d-​yaf ismawen ara sen-​d-​iṣebḥen. M’akken i sen-​iţsemmi i lḥiwan, Adam ifaq i yiwet n lḥaǧa. Teẓriḍ d acu-​ţ?

Iwala belli yal yiwen si lḥiwan yesɛa tamwanest. Yella ubabat ţ-​ţyemmaţ di twacult n lfilat. Yella ubabat ţ-​ţyemmaţ di twacult n yizmawen. Ma d Adam, neţţa, yella weḥd-​es. Ṛebbi yesseɣli-​d ihi yiwen n nadam fell-​as d ameqran, dɣa yekkes-​as-​d iɣes seg ubeṛdi. S yiɣes-​nni, Yahwa yexdem tameṭṭut i Adam.

Tura Adam yeččuṛ d lfeṛḥ! Nezmer a nxayel acḥal i tefṛeḥ Ḥewwa mi d-​tufa iman-​is di leǧnan-​agi icebḥen! Tura zemren ad sɛun dderya w’ad ɛicen akken di sseɛd.

Yahwa yebɣa i Adam d Ḥewwa tamɛict n lebda. Yebɣa daɣen ad rren lqaɛa meṛṛa am leǧnan-​nni ifazen n Ɛidin. Nezmer a nxayel acḥal i feṛḥen m’ara ţxemmimen ɣer ccɣel i ten-​iţṛaǧun! Lukan d ayen yellan deg ufus-​ik, aţ-​ţeţţekkiḍ di ccɣel-​agi ara yerren lqaɛa d leǧnan igerrzen? Lameɛna sseɛd-​nsen ur idum ara. A nwali acimi.

Ahellil 83:18; Laṣel n ddunit 1:26-31; 2:7-25.