Nuḥ yebna yiwen lbabuṛ
TAQSIṬ TIS 9
Nuḥ yebna yiwen lbabuṛ
NUḤ yesɛa tameṭṭut d tlata warrac. Ismawen n warrac-agi d Cim, Ḥam akk-d Yifit. Zewǧen i tlata. Swakka, Nuḥ ţ-ţwacult-is meṛṛa llan di tmanya yid-sen.
Yiwen wass, Ṛebbi yenna i Nuḥ ad ixdem yiwet n lḥaǧa issewhamen. Yumeṛ-as ad ibnu yiwen lbabuṛ annect-ila-t ara yesɛun ṣṣifa n usenduq ameqran. Yenna-yas Ṛebbi: ‘Bnu leɛli amezwaru, wis sin akk-d wis tlata, tferqeḍ-ten ţ-ţixxamin.’ Tixxamin-agi ad ilint i Nuḥ ţ-ţwacult-is, i lḥiwan d lqut ara ḥwiǧen.
Ṛebbi yenna daɣen i Nuḥ ad yesleɣ lbabuṛ-nni akken ur t-keččmen ara waman. Ṛebbi yenna-d: ‘Aql-i a d-sseɣliɣ aḥemmal n waman ameqran w’ad ssengreɣ ddunit meṛṛa. Win ur neţţili ara di lbabuṛ-agi ad immet.’
Nuḥ d warraw-is uɣen awal i Yahwa, ssyin bdan lebni. Lameɛna, lɣaci ţmesxiṛen fell-asen, ggumman ad beddlen. Nuḥ ixebbeṛ-iten ɣef wayen ara yexdem Ṛebbi. Lameɛna ulac win i t-yumnen.
Nuḥ d warraw-is sɛeddan aṭas n lweqt di lebni n lbabuṛ-nni axaṭer meqqer nezzeh. Iɛedda acḥal d aseggas d wamek i fukken lebni-nni. Tura, Ṛebbi yeḍleb i Nuḥ ad issekcem lḥiwan ɣer lbabuṛ-nni. Yenna-yas ad iddem tayuga si kra kan n leṣnuf n lḥiwan, mkul dkeṛ s nnta-s. Lameɛna si leṣnuf nniḍen, yenna-yas ad iddem sebɛa seg-sen. Ṛebbi yenna diɣen i Nuḥ ad issekcem leṣnuf meṛṛa n yefṛax. Nuḥ ixdem ayen akk i s-d-yumeṛ Ṛebbi.
Ɣer taggara, Nuḥ ţ-ţwacult-is kecmen ula d nutni ɣer lbabuṛ-nni, dɣa yeɣleq Ṛebbi tawwurt. Nuḥ ţ-ţwacult-is ţṛaǧun zdaxel. Xayel aql-ak telliḍ daxel n lbabuṛ-nni yerna teţṛaǧuḍ yid-sen. Dɣa ţ-ţideţ a d-yas uḥemmal n waman akken i t-id-yenna Ṛebbi?