Tebda fell-asen lmeḥna
TAQSIṬ TIS 5
Tebda fell-asen lmeḥna
SEG wasmi i d-ffɣen si leǧnan n Ɛidin, Adam d Ḥewwa mmugren aṭas n lemḥayen. Ilaq ad ɛetben aṭas iwakken ad ččen aɣrum-nsen. Anda ma ddan zzin-asen-d isennanen d ubuneqqar. Annect-a yeḍra-d imi ur uɣen ara awal i Ṛebbi yerna sṛuḥen tadukli i cerken yid-es.
Lameɛna tella lexsaṛa yugaren akk tigi: Adam d Ḥewwa bdan ţmeţţaten. Tecfiḍ? Ṛebbi iɛeggen-asen belli ass ideg ara ččen si ttejṛa-nni i sen-iḥeṛṛem ad mmten. Ihi, ass ideg i ččan, bdan ţmeţţaten. Mačči d lehbala imi ur uɣen ara awal i Ṛebbi?
Adam d Ḥewwa sɛan-d dderya di beṛṛa n leǧnan n Ɛidin iseg i ten-id-issufeɣ Ṛebbi. Ɣef waya, arraw-nsen ula d nutni ţţiwsiren yerna ţmeţţaten.
Ah! Lemmer Adam d Ḥewwa uɣen awal i Yahwa, tili ad ilin di sseɛd ama d nutni ama d arraw-nsen. Tili ad ɛicen ɣef lqaɛa di sseɛd i lebda. Tili ulaḥedd win ara yuɣalen d amɣar, ara ihelken neɣ ara yemmten.
Ṛebbi yebɣa ad ɛicen yemdanen di sseɛd i lebda. Iggull akka ara yili lḥal yiwen wass. Ass-nni, lqaɛa meṛṛa aţ-ţili d lǧennet yerna imdanen akk ad sɛun ṣṣeḥḥa n lɛali. Imdanen ad ilin d iḥbiben n Ṛebbi yerna ad ilin d iḥbiben wway gar-asen.
Lameɛna Ḥewwa tesṛuḥ tadukli i ţ-icerken d Ṛebbi. Annect-a yeţţawi-yas-d leɛtab d lqerḥ mkul m’ara d-terbu. Mebla ccekk temmuger aṭas n leḥzen imi ur tuɣ ara awal i Yahwa!
Adam d Ḥewwa sɛan-d aṭas n warrac ţ-ţullas. Semman-as i mmi-tsen amenzu Kayin, ma d wis sin Habil. Teẓriḍ d acu yeḍran yid-sen?
Laṣel n ddunit 3:16-23; 4:1, 2; Aweḥḥi 21:3, 4.