TAQSIṬ TIS 6

Yiwen d umɛin wayeḍ d amcum

MUQEL tura Kayin d Habil. Uɣalen d imeqranen. Kayin yuɣal d afellaḥ i d-​issemɣayen nneɛma, lxedṛa d lfakyat.

Habil, neţţa, yuɣal d ameksa. Iḥemmel ad ilhi d izamaren i geţţuɣalen d akraren (ixaṛfiyen). Akka, kra kra Habil yewweḍ armi yesɛa taqeḍɛit tameqrant.

Yiwen wass Kayin d Habil wwin lweɛda i Ṛebbi. Kayin yewwi si lɣella i s-​d-​ifka wakal, ma d Habil yewwi ayen akk ifazen si tqeḍɛit-​is. Habil d lweɛda-​s ɛeǧben i Yahwa ma d Kayin d lweɛda-​s ur s-ɛǧiben ara. Teẓriḍ acuɣer?

Axaṭer lweɛda n Habil tif tin n Kayin. Lameɛna tella ssebba yugaren tagi. Habil yeɛǧeb i Ṛebbi axaṭer d argaz yelhan i gḥemmlen Yahwa akk-​d gma-​s. Ma d Kayin, neţţa d amcum ur nḥemmel ara gma-​s.

Ihi, Ṛebbi iḍleb i Kayin ad ibeddel tikli. Lameɛna ur s-​iḥess ara. Izɛef aṭas axaṭer Ṛebbi iḥemmel Habil akteṛ-​is. Dɣa Kayin yenna i gma-​s: ‘Kker a nṛuḥ ɣer lexla!’ Mi llan weḥd-​nsen dinna, Kayin iwet gma-​s s lǧehd armi i t-​inɣa. Mačči d lmuṣiba wayen akka yexdem Kayin?

Ɣas akken Habil yemmut, mazal yecfa Ṛebbi fell-​as. Habil d argaz yelhan yerna d lmuḥal ad yeţţu Yahwa amdan am neţţa. Yiwen wass a t-​id-​iḥyu Yahwa Ṛebbi. Imiren Habil ur iţţuɣal ara yakk ad yemmet. Ad iɛic i lebda ɣef lqaɛa. Mačči d ayen ara ɣ-​issefṛḥen asm’ara nissin imdanen yecban Habil?

Lameɛna Ṛebbi ur iḥemmel ara wid yeţcabin ɣer Kayin. Ɣef waya, asmi i genɣa gma-​s, iɛuqeb-​it Ṛebbi, issebɛed-​it ɣef wat wexxam-​is. Asmi i gṛuḥ ihi Kayin ad iɛic deg wemḍiq nniḍen, yewwi yid-​es yiwet si yessetma-​s i guɣalen ţ-​ţameṭṭut-​is.

Kra n lweqt umbeɛd, Kayin ţ-​ţmeṭṭut-​is sɛan-​d dderya. Arrac ţ-​ţullas nniḍen n Adam d Ḥewwa zewǧen. Uɣalen sɛan-​d dderya ula d nutni. S lemɣawla lqaɛa teččuṛ d imdanen. A nwali tura ayen i nezmer a t-​nissin ɣef kra seg-​sen.

Laṣel n ddunit 4:2-26; 1 Yuḥenna 3:11, 12; Lecɣal 24:15.