1, 2. Acu n lemḥayen i sɛeddayen yemdanen ass-​a, yerna amek i steqsayen iman-​nsen xilla n lɛibad?

MI GEFRA imenɣi deg yiwet n tmurt iţwagezren si lgirra, d luluf n tlawin akk-​d warrac imecṭaḥ i gemmuten. Ţwameḍlen meṛṛa deg yiwet n tesraft iwumi i d-​zzin imidagen (ṣṣalib) imecṭaḥ. Yeţwakteb fell-​asen westeqsi-​yagi: “Acuɣer?” Wagi d asteqsi yakk qerriḥen iɣef i gezmer ad ixemmem walbeɛḍ. Lɣaci ţmeyyizen s leḥzen ɣef westeqsi-​ya m’ara d-​teḥdeṛ twaɣit, lgirra, lehlak neɣ timenɣiwt. Leḥwayeǧ-​a ţţawint wid ɛzizen fell-​asen, ţhuddunt ixxamen-​nsen neɣ ssasayent-​asen-​d lemḥayen ur iqebbel leɛqel. Beqqun ad ẓren iwacu i d-​yeɣli fell-​asen lhemm.

² Acuɣer i gɛemmed Ṛebbi ad ilint lemḥayen? Ma yella Yahwa Ṛebbi d bu tezmert, yeččuṛ d leḥmala, d ukyis yerna d aḥeqqi, ayɣer i teɛmeṛ ddunit-​agi d lkeṛh akk-​d lbaṭel? Yella wasmi i testeqsaḍ iman-​ik akka?

3, 4. a) Acu i d-​iţwerrin belli mačči d leḥṛam a nesteqsi Ṛebbi ayɣer i geţɛemmid i lemḥayen? b) Acu i geţḥussu Yahwa m’ara iẓerr cceṛ d lemḥayen?

³ D leḥṛam ma nesteqsa ayɣer i geţɛemmid Ṛebbi ad ilint lemḥayen? Kra ugaden ad yili d liman i xuṣṣen  di Ṛebbi neɣ d leqder ur t-​ţqadaren ara. Lameɛna, m’ara teɣreḍ Adlis Iqedsen, aţ-​ţafeḍ belli llan yergazen unṣiḥen, yeţţagaden Ṛebbi, i gesteqsan iman-​nsen akka. Di lemtel, nnbi Ḥabaquq yenna i Yahwa: “Acuɣer i yi-​teǧǧiḍ ţwaliɣ leḥṛam? Acuɣer i teţnezziheḍ di lbaṭel? Ţ-​ţakkwerḍa kan akw-​d utɛeddi i ţwaliɣ, iqwa ccwal, teṭṭuqqet teɛdawit.”—Ḥabaquq 1:3.

⁴ Eɛni Yahwa ilumm Ḥabaquq yellan d unṣiḥ imi d-​yefka isteqsiyen-​agi? Xaṭi; Yahwa iga ţţawil akken ad ţwaketben deg Wedlis Iqedsen imeslayen-​agi i d-​yekkan seg wul n Ḥabaquq. Issefhem-​as-​d daɣen kra n leḥwayeǧ i gesseǧhden liman-​ines. D ayen i k-​yebɣa Yahwa ula i kečč. Adlis Iqedsen yenna-​d belli ‘iţḥebbiṛ fell-​ak.’ (1 Buṭrus 5:7) Ur teţţu ara aselmed-​agi. Ṛebbi yekṛeh, akteṛ akk n lɛibad, cceṛ akk-​d lemḥayen i d-​yeţţawi cceṛ-​agi. (Icɛaya 55:8, 9) Ihi, iwacu i llant wannect-​a n lmeḥnat di ddunit?

5. Amek i d-​ssefhamen kra n lɛibad ssebba n lemḥayen, meɛna acu yesselmad Wedlis Iqedsen?

⁵ Aṭas i gḍelben i lecyux n ddin-​nsen akk-​d wid i ten-​yesselmaden iwacu i llant wannect-​a n lemḥayen.  Ssefhamen-​asen-​d acḥal d abrid belli ayagi d lebɣi n Ṛebbi, belli d neţţa i gketben kulci uqbel a d-​iḍru, ula d lmuṣibat m’ara d-ɣlint. Aṭas iwumi nnan belli ulac win i gzemren ad ifhem iberdan n Ṛebbi, neɣ d Ṛebbi i gneqqen lɛibad, ula d imecṭaḥ, bac ad ilin yid-​es deg igenni. Meɛna, akken i t-​id-​tlemdeḍ, leɛmeṛ yelli Yahwa Ṛebbi d ssebba n cceṛ. Adlis Iqedsen yenna-​d: “Ḥaca! Illu yexḍa i lbaṭel; anezmar ixḍa i leḥṛam.”—Yub 34:10.

6. Ayɣer xilla n medden i gesbabbayen i Ṛebbi lemḥayen n ddunit?

⁶ Teẓriḍ acuɣer i s-​sbabbayen i Ṛebbi lemḥayen n ddunit? Axaṭer xilla i genwan belli d neţţa i ţ-​iḥekmen. Ur ssinen ara yiwen uselmed yesɛan azal i d-​yekkan seg Wedlis Iqedsen. Aselmed-​agi isehlen, tḥefḍeḍ-​t deg yixef wis 3: lḥakem n ṣṣeḥ n ddunit-​agi, d Cciṭan Iblis.

7, 8. a) Amek i d-​teţban ccexṣiyya n Cciṭan di ddunit iɣef yeḥkem? b) Imdanen ur kmilen ara, yerna “mkul yiwen a d-​imlil tiswiɛin yelhan neɣ tiswiɛin n diri.” Amek i d-​irennu waya lemḥayen?

⁷ Adlis Iqedsen iqqar-​ed ɛinani: “Ddunit meṛṛa aţţan ddaw n leḥkwem n Wemcum.” (1 Yuḥenna 5:19) Lukan a nxemmem ciṭuḥ, mačči d ṣṣeḥ ayagi? Neţwali ɣef lqaɛa kamel ccexṣiyya (ṭṭbiɛa) n Cciṭan “yeţɣurrun ddunit meṛṛa.” (Aweḥḥi 12:9) Cciṭan yeččuṛ d lkeṛh, d lexdeɛ akk-​d leqseḥ. Daymi, ddunit, i gellan ddaw n ufus-​is, teččuṛ uma d neţţat d lkeṛh, d lexdeɛ akk-​d leqseḥ. Tagi ihi d yiwet n ssebba ɣef waydeg i llant wannect-​a n lmeḥnat.

⁸ Ssebba tis snat iɣef i llant wannect-​a n lmeḥnat, nwala-​ţ-​id yakan deg yixef wis 3: lɛibad ur kmilen ara, d imednuben seg wasmi i d-​teḍra lmeɛṣeyya-​nni di leǧnan n Ɛidin. Imdanen imednuben zgan ţnaɣen ɣef leḥkem; ayagi igellu-​d s lgirrat d cceddat akk-​d lemḥayen. (Amusnaw 4:1; 8:9) Adlis Iqedsen yeqqar-​ed belli “mkul yiwen a d-​imlil tiswiɛin yelhan neɣ tiswiɛin n diri.” Ţ-​ţagi i d ssebba tis tlata iɣef i llant lemḥayen. (Ɣer-​ed Amusnaw 9:11.) Imi mačči d Yahwa i d lḥakem n ddunit-​agi bac ad  iḥareb fell-​as, ţţilin lɣaci i getmeḥḥinen axaṭer iţţaf-​iten-​id lḥal di yir amkan d yir taswiɛt.

9. Iwacu i nezmer a netḥeqqeq belli Yahwa isɛa ssebba tameqrant iɣef i geǧǧa lemḥayen ad ilint?

⁹ D ayen iţṣebbiren imi neɛlem belli mačči d Ṛebbi i d ssebba n lemḥayen. Mačči d neţţa i d-​yeţţaken lgirrat, timenɣiwt, cceddat akk-​d twaɣiyin, i geţmeḥḥinen lɛibad. Acu kan, neḥwaǧ a nefhem ayɣer i geǧǧa lemḥayen ad ilint. Imi d Bab n Tezmert, yezmer a tent-​yekkes. Acuɣer ihi ur tent-​yekkis ara? Bla ccekk, Ṛebbi i nessen tura, i geččuṛen d lemḥibba, yesɛa ssebba tameqrant iɣef i tent-​yeǧǧa.—1 Yuḥenna 4:8.

10. Acu i gerra Cciṭan di ccekk, yerna amek i gexdem aya?

¹⁰ Bac a nefhem ayɣer i geţɛemmid Ṛebbi i lemḥayen, ilaq a neqqel ɣer zzman ideg i d-​bdant. Asmi i gdemmer Cciṭan Adam d Ḥewwa akken ad ɛaṣin Yahwa, teḍher-​ed yiwet n temsalt yesɛan azal ameqran. Cciṭan ur yenkiṛ ara belli Yahwa yesɛa tazmert (lqeḍra); yeɛlem belli tazmert-​agi ur tesɛi ara tilisa. Yahwa yesɛa lḥeqq ad yeḥkem; d lḥeqq-​agi i gerra Cciṭan di ccekk. Asmi i geḥseb Ṛebbi d akeddab i geţḥeṛṛimen ayen yelhan i cceɛb-​is, yerra-​t amzun d yir lḥakem. (Ɣer-​ed Laṣel n ddunit 3:2-5.) Am wakken yenna-​d belli imdanen ad afen akteṛ n sseɛd bla leḥkem n Ṛebbi. S wayagi, iḍher-​ed belli ixuṣem Yahwa di leḥkem-​ines, yeɛni di lḥeqq i gesɛa ad yeḥkem.

11. Ayɣer Yahwa ur yessenger ara kan imɛuṣa-​nni di Ɛidin?

¹¹ Adam d Ḥewwa ɛuṣan Yahwa. Amzun nnan-​d: ‘Ur neḥwaǧ ara a ɣ-​iwelleh Yahwa. Ur nelli ara d imecṭaḥ; neẓra d acu yelhan d acu i diri.’ Amek i gezmer Yahwa ad yefru tamsalt-​agi? Amek i gezmer ad isselmed i yemdanen d lmalayekkat meṛṛa belli imɛuṣa-​nni ɣelṭen yerna d lexdayem-​is neţţa i getɛeddan? Kra zemren a d-​inin: ‘Axiṛ  lukan yessenger imɛuṣa-​nni yerna iɛawed-​ed kullec si lqaɛ.’ Acu kan, Yahwa yeqsed si zik ad iččaṛ lqaɛa s tarwa n Adam d Ḥewwa, yerna yebɣa aţ-​ţɛic tarwa-​yagi di lǧennet ɣef lqaɛa. (Laṣel n ddunit 1:28) Yahwa yeţţaweḍ dima ɣer lmeqsud-​is. (Icɛaya 55:10, 11) Uyerna, lemmer yenɣi imɛuṣa-​nni di Ɛidin, tili ur yessawaḍ ara ad yefru tamsalt-​nni i d-​iḍehren, i geɛnan lḥeqq i gesɛa bac ad yeḥkem.

12, 13. Ssefhem-​ed s yiwen n lemtel acuɣer i geǧǧa Yahwa ad yuɣal Cciṭan d lḥakem n ddunit yerna ayɣer i geǧǧa lɛibad ad sselḥun iman-​nsen.

¹² A d-​nefk yiwen lemtel. Xayel-​ed yiwen ccix n llakul la d-​issefham i inelmaden-​is amek ara frun yiwet n temsalt iweɛṛen. Yiwen weqcic iḥeṛcen, meɛna d amɛaṣi, la d-​yeqqar belli tifrat-​agi i d-​yefka ccix ur tṣeḥḥa ara. Yenwa yezmer ad yefru tamsalt-​agi xiṛ n ccix-​is, am wakken ccix-​agi ixuṣṣ. Kra seg wid yeqqaren yid-​es nwan-​as yesɛa lḥeqq, dɣa uɣalen d imɛuṣa ula d nutni. Acu ara yexdem tura ccix-​agi? Ma yella yessufeɣ-​iten ɣer beṛṛa, acu ara xemmen wid i d-​yeqqimen? Ur s-​qqaren ara belli aqcic-​nni amɛaṣi akk-​d wid yeddan yid-​es sɛan lḥeqq? Leqder-​nni i ţqadaren  ccix-​nsen a sen-​iṛuḥ, w’a s-​inin yugad a d-​iban belli yeɣleḍ. Xayel tura lukan ccix-​agi ad yeǧǧ aqcic-​nni amɛaṣi s yiman-​is a d-​iwerri i inelmaden amek ara yefru tamsalt-​agi.

¹³ Nezmer a d-​nini belli Yahwa yexdem am ccix-​agi. Mmekti-​d belli di Ɛidin, mačči d imɛuṣa-​nni kan i teɛna temsalt. D imelyan n lmuluk i gellan ţfeṛṛiǧen. (Yub 38:7; Danyil 7:10) Ayen ara yexdem Yahwa bac ad ifru tamsalt-​agi n lmeɛṣeyya, izmer a d-​yeǧǧ lateṛ d ameqran di lmalayekkat meṛṛa akk-​d lɛibad. Acu i gexdem ihi? Yeǧǧa Cciṭan a d-​issken amek ara yeḥkem lɛibad. Yeǧǧa daɣen imdanen ad sselḥun iman-​nsen, ddaw n leḥkem n Cciṭan.

14. Yahwa yeǧǧa lɛibad ad sseddun iman-​nsen. Deg wacu ara yeṣleḥ wannect-​a?

¹⁴ Di lemtel-​agi i d-​nefka tura, ccix yeẓra belli aqcic-​nni akk-​d wid yeddan yid-​es ɣelṭen. Yeɛlem daɣen belli ma yeǧǧa-​ten a d-​beggnen ma sɛan lḥeqq neɣ ala, wid akk yellan dinna ad sfaydin s wayagi. M’ara xesṛen yemɛuṣa-​nni, inelmaden meṛṛa iwumi yeṣfa wul ad ḥṣun belli d ccix-​nni kan i gzemren a ten-​iwelleh. Ad fehmen ayɣer ara yessufeɣ umbeɛd imɛuṣa-​nni. Kifkif daɣen deg wayen yeɛnan Yahwa. Yeẓra belli imdanen d lmalayekkat meṛṛa yeṣfan ad sfaydin m’ara ḥṣun belli Cciṭan akk-​d yemɛuṣa-​nni nniḍen xesṛen, belli lɛibad ur zmiren ara ad sseddun iman-​nsen. Am Irmiya zik-​nni, ad lemden aselmed-​agi n tideţ yesɛan azal: “Ḥṣiɣ, [a Yahwa]! Amdan, mačči deg ufus-​is i tella tikli-​s; m’ara ileḥḥu, mačči d neţţa i geţwellihen iqeddimen-​is.”—Irmiya 10:23.

15, 16. a) Ayɣer i gɛemmed Yahwa i lemḥayen ad ilint seg wacḥal aya? b) Acimi Yahwa ur yexdim ara kra iwakken ur ţţilint ara, ɣef lemtel, tmenɣiwin?

¹⁵ Lameɛna, ayɣer i gɛemmed Yahwa i lemḥayen ad ilint  seg wacḥal aya? Acimi ur yexdim ara kra bac ur d-ɣellin ara lehmum? A d-​nwali snat leḥwayeǧ ur yexdim ara ccix-​nni iɣef i d-​nemmeslay di lemtel iɛeddan. Tamezwarut, ur s-​iḥeṛṛem ara i weqcic-​nni amɛaṣi ad yeɛreḍ a d-​ibeggen ma yesɛa lḥeqq. Tis snat, ur t-​iɛawen ara di ccɣel-​agi. Kifkif, llant daɣen snat leḥwayeǧ i geqsed Yahwa ur tent-​ixeddem ara. Tamezwarut, ur s-​iḥeṛṛem ara i Cciṭan d wid yeddan yid-​es ad ɛerḍen a d-​beggnen ma sɛan lḥeqq. Ihi iwulem ad iɛeddi lweqt. Di luluf n iseggasen iɛeddan, imdanen ɛerḍen mkul ṣṣenf n leḥkem. Tqeddmen di tussna (lɛilm) akk-​d wayen nniḍen, meɛna lbaṭel, timmuɣbent, timenɣiwt akk-​d lgirrat zaden akteṛ akk ɣef zik. Tura iţwabeggen-​ed belli leḥkem n wemdan ur yerbiḥ ara.

¹⁶ Tis snat, Yahwa ur iɛawen ara Cciṭan akken ad isselḥu ddunit. Ɣef lemtel, lukan yexdim kra bac ur ţţilint ara tmenɣiwin, ur d-​iţban ara amzun yedda si lǧiha n yemɛuṣa-​nni? Ur d-​iţban ara am wakken lɛibad zemren ad sselḥun iman-​nsen bla ma yeḍra yid-​sen uxessaṛ? Lemmer yexdim akka Yahwa, tili iţekka di lekdeb. Meɛna, Ṛebbi “ur iskiddib ara.”—Iɛebṛaniyen 6:18.

17, 18. Acu ara yexdem Yahwa i cceṛ meṛṛa i d-​yewwi Cciṭan akk-​d leḥkem n lɛibad?

¹⁷ Lameɛna acu ara d-​nini ɣef cceṛ meṛṛa i geḍran seg wasmi yakk i d-​tebda lmeɛṣegga? Ur ilaq ara a neţţu belli Yahwa d Bab n Tezmert. Yezmer ihi ad ikkes lemḍerra i d-​wwint lemḥayen i lɛibad, yerna d ayen ara yexdem. Akken i t-​id-​neḥfeḍ, lexsaṛa i gḥuzan lqaɛa aţ-​ţeţwikkes asm’ara tuɣal lqaɛa-​yagi d lǧennet. Ayen i d-​yeǧǧa ddnub ad yeţwimḥu s liman deg wesfel n leslak n Ɛisa, ma d ṭṭerr i d-​tewwi lmut ad yekkes s ḥeggu n lmeyytin. Ṛebbi ad issexdem Ɛisa “iwakken ad ihudd lexdayem n Cciṭan.” (1 Yuḥenna 3:8) Ad yexdem ayagi yakk di lweqt iwulmen.  Nezmer a nefṛeḥ imi ur yexdim ara annect-​a uqbel, axaṭer ṣṣber-​ines isemmeḥ-​aɣ a nissin tideţ w’a t-​neɛbed. (Ɣer-​ed 2 Buṭrus 3:9, 10.) Taswiɛt-​a, Ṛebbi yeţnadi wid iwumi yeṣfa wul akken ad ilin d iqeddacen-​is yerna yeţɛawan-​iten ad ṣebren i lemḥani i geţɛeddayen fell-​asen di ddunit-​agi yenhewwalen.—Yuḥenna 4:23; 1 Ikurintiyen 10:13.

¹⁸ Kra steqsayen ahat iman-​nsen, qqaren-​as: “Iwakken ur ţţilint ara lemḥayen-​agi meṛṛa, mačči lukan axiṛ i d-​yexliq Ṛebbi Adam akk-​d Ḥewwa d imdanen ur nezmir ara maḍi ad ɛaṣin awal-​is?” Bac aţ-​ţafeḍ leǧwab i westeqsi-​yagi, yelzem a d-​temmektiḍ yiwet n tikci ɣlayen i k-​d-​yefka Yahwa.

19. Anta tikci ɣlayen i ɣ-​d-​yefka Yahwa, yerna acimi i glaq a s-​nefk lqima?

¹⁹ Akken i t-​id-​nenna deg yixef wis 5, mi d-​ţwaxelqen lɛibad, teţţunefk-​asen tlelli ad xtiṛen. Terriḍ-​d s lexbaṛ acḥal i ɣlayet tikci-​yagi? Ṛebbi ixleq-​ed geddac n lḥiwan, i gţeddun s tiḥḥeṛci. Lameɛna, ur zmiren ara ad xedmen lxilaf ger lxiṛ akk-​d cceṛ. Lɛibad ṣenɛen-​d iṛubuten, heggan-​ten iwakken ad ţţaɣen awal i mkul lameṛ ara sen-​iţţunefken. A ɣ-​yeɛǧeb lḥal lukan i ɣ-​d-​yexliq akka Ṛebbi? Xaṭi, nefṛeḥ imi ɣ-​d-​teţţunefk tlelli bac a nextiṛ acu n ṣṣenf n wemdan ara nili, acu n tudert ara nɛic, menhu ara yilin d aḥbib-​nneɣ akk-​d wayen nniḍen. Nḥemmel a nesɛu kra n tlelli, yerna d ayen i ɣ-​yebɣa Ṛebbi a t-​nesɛu.

20, 21. Amek ara nessexdem akken ilaq tilelli i nesɛa di lxetyaṛ, yerna ayɣer i ɣ-​ilaq a nebɣu ayagi?

 ²⁰ Yahwa ur yebɣi ara a t-​neɛbed s tin n bessif. (2 Ikurintiyen 9:7) A d-​nefk lemtel: D acu ara iɛeǧben i ubabat (neɣ i tyemmaţ)? Mmi-​s ara s-​yinin: “Ḥemmleɣ-​k” axaṭer yumeṛ-​as-​t-​id ḥedd, neɣ mmi-​s ara s-​t-​id-​yinin seg wul? Asteqsi iɣef i glaq ihi aţ-​ţmeyyzeḍ d wagi: amek ara tessexdmeḍ kečč tilelli i k-​d-​yefka Ṛebbi? Cciṭan, Adam akk-​d Ḥewwa ur ssexdmen ara maḍi akken ilaq tilelli-​yagi. Rran di ṭṭerf Yahwa Ṛebbi. I kečč d acu ara txedmeḍ?

²¹ Tzemreḍ aţ-​ţessexdmeḍ akken ilaq tikci-​yagi ifazen, yeɛni tilelli i tesɛiḍ di lxetyaṛ. Tzemreḍ aţ-​ţernuḍ ɣer imelyan n medden i geddan si lǧiha n Yahwa. Ssefṛaḥen Ṛebbi, axaṭer sskanayen-​d s lefɛayel belli Cciṭan d akeddab yerna leḥkem-​ines d lexsaṛa tameqrant. (Lemtul 27:11) Ula d kečč tzemreḍ a d-​tessekneḍ aya ma tewwiḍ abrid yelhan. D ayen ara d-​issefhem yixef ara d-​itebɛen.