ƔER ajeṛnan i k-​yehwan, wali tiliẓri, neɣ ḥess i ṛṛadyu: aţ-​ţesleḍ ala i tmenɣiwt, i lgirrat d rrebrab. Xemmem i iɣeblan i d-​teţmagareḍ. Izmer lḥal imeḥḥen-​ik lehlak neɣ teqreḥ-​ik lmut n win i tḥemmleḍ. Ahat teţḥussuḍ ayen i gḥuss Yub, yellan d argaz n lɛali. Yenna-​d: “Ṛwiɣ lḥif.”—Yub 10:15.

Steqsi iman-​ik:

• D annect-​agi i yi-​ibɣa Ṛebbi? D annect-​a i sen-​ibɣa i lɛibad meṛṛa?

• Anda ara afeɣ lemɛawna akken ad fruɣ cceddat i d-​ţmagareɣ?

• A d-​yas wass ideg ara tili lehna ɣef lqaɛa?

Adlis Iqedsen yeţţak-​ed leǧwab ara k-​iqennɛen.

“A sen-​yesfeḍ imeṭṭawen, ur teţţili lmut, ur yeţţili leḥzen, ur yeţţili umeǧǧed ur yeţţili lqeṛḥ.”—Aweḥḥi 21:4, Awal n tudert (2001)

“Aqudar ad iţjellib am izerzer.”—Icɛaya 35:6

“Imiren a d-​yuɣal yeẓri i iderɣalen.”—Icɛaya 35:5

 “Wid meṛṛa yellan deg iẓekwan . . . a d-​ffɣen.”—Yuḥenna 5:28, 29

“Ulac win ara d-​yinin: ‘Uḍneɣ!’”—Icɛaya 33:24

“Ad ɛumen yirden ɣef lqaɛa.”—Ahellil 72:16, Traduction du monde nouveau (MN)

Ur ɣeṣṣeb ara a s-​tiniḍ belli liḥalat i d-​iţţuweṣṣfen di tewriqin iɛeddan ţ-​ţargit kan. Ṛebbi iwɛed-​ed belli a tent-​isseḍru, yerna Adlis Iqedsen yessefhem-​ed amek ara yexdem ayagi.

Adlis Iqedsen yesselmad akteṛ n waya. Yeqqar-​ed amek ara nɛic d iseɛdiyen si tura. Xemmem cwiṭ ɣer inezgumen d cceddat i d-​teţmagareḍ: iɣeblan n yedrimen, iɣeblan n twacult, lqella n ṣṣeḥḥa neɣ lmut n win ɛzizen fell-​ak. Ass-​a, Adlis Iqedsen yezmer a k-​iɛiwen akken a ten-​tɣelbeḍ, yerna yezmer a k-​iṣebber s leǧwab ara k-​d-​ifk ɣef yesteqsiyen am wigi:

• Ayɣer i netmeḥḥin?

• Amek ara neɣleb inezgumen?

• Amek ara izad sseɛd di twacult-​nneɣ?

• Amek ara teḍru yid-​neɣ m’ara nemmet?

• A nuɣal a nẓer wid ɛzizen fell-​aneɣ i gemmuten?

• Amek ara neḍmen belli Ṛebbi ad yeṭṭef di lewɛud-​is?

 Imi la teqqareḍ taktabt-​agi, tesbeggneḍ-​d belli tebɣiḍ aţ-​ţeẓreḍ d acu yesselmad Wedlis Iqedsen. A k-​teṣleḥ mliḥ. Aţ-​ţafeḍ isteqsiyen icudden ɣer tseddaṛin. D imelyan n yemdanen iwumi yeɛǧeb ţţawil-​agi n yesteqsiyen m’ara heddṛen ɣef Wedlis Iqedsen nutni d Inagan n Yahwa. Neţmenni a k-​yeɛǧeb ula d kečč. Simmal aţ-​ţeţţissineḍ ayen yesselmad s ṣṣeḥ Wedlis Iqedsen simmal a k-​yeţţeɛǧab w’aţ-​ţesfaydayeḍ seg-​s. Nessaram a k-​ibarek Ṛebbi di ccɣel-​agi!