TIMERNA
D acu-ten ciyul akk-d hadis?
DL LLUƔAT n zik swayes yeţwakteb Wedlis Iqedsen, ssexdmen ameslay ciyul s tɛibṛanit akk-d umeslay hadis s tyunanit, akteṛ n 70 n tikkal. Imeslayen-agi sɛan yiwet n lmeɛna; cudden i sin ɣer lmut. Di kra n ṭrejmat n Wedlis Iqedsen ţwaṭerjmen-d “aẓekka”, “axenduq”, “tasraft”. Deg Wedlis Iqedsen s teqbaylit sṭerjmen-ten “laxeṛt”. Acu kan, amur ameqran n lluɣat ur sɛint ara ameslay ara d-yefken swaswa lmeɛna-nsen. Daymi i neţţaf di Ṭrejma n ddunit tajdiṭ (s tṛumit) imeslayen “ciyul” akk-d “hadis”. Acu i d lmeɛna-nsen ihi? A nẓer amek i ten-ssexdmen deg waṭas n yefyar n Wedlis Iqedsen.
Amusnaw 9:10 yenna-d: “Ulac la ccɣwel, la leḥsab, la tamusni, la lekyasa, di laxeṛt [ciyul] iɣer tţedduḍ.” Eɛni a d-nefhem seg wannect-a belli “ciyul” d albeɛḍ n iẓekwan ideg yeţwanṭel win i nḥemmel? Xaṭi. M’ara d-yehdeṛ Wedlis Iqedsen ɣef yiwen uẓekka, yessexdam imeslayen nniḍen n tɛibṛanit akk-d tyunanit, ur yessexdam ara “ciyul” akk-d “hadis”. (Laṣel n ddunit 23:7-9; Matta 28:1) Ur yessexdam ara daɣen ameslay “ciyul” bac a d-yebder yiwen wemḍiq anda i ţwaneṭlen kra n lɛibad lwaḥid, am uẓekka ideg i srusuyen iɛeggalen n twacult.—Laṣel n ddunit 49:30, 31.
Acu n wemḍiq ihi i d-yeɛna “ciyul”? Ɣef wayen yeɛnan ameslay “ciyul” neɣ “hadis”, Awal n Ṛebbi yessefham-ed belli mačči ţ-ţasraft kan ideg i ţwanṭalen kra n lɛibad, meɛna d lḥaǧa meqqren akteṛ. Ɣef lemtel, Icɛaya 5:14 issenɛet-ed belli ciyul “ildi axenfuc-is” yerna “issebṛaṛeḥ aḥelqum-is.” Ɣas akken nezmer a d-nini yessebleɛ lɛibad mebla leḥsab, iţban-ed amzun mazal-it yebɣa ad yernu. (Lemtul 30:15, 16) Aẓekka n ṣṣeḥ yezmer ad yawi kra kan n lmeggtin, ma d “laxeṛt [ciyul] akw-d tesraft n nnger ur ṛebbun ara.” (Lemtul 27:20) Lmeɛna-s, “ciyul” ur yesɛi ara tilisa; d lmuḥal ad yeččaṛ. Ihi, “ciyul”, neɣ “hadis”, mačči d amḍiq yellan s ṣṣeḥ deg walbeɛḍ n imukan. D aẓekka ideg i llan wid meṛṛa yemmuten, yeɛni d amḍiq i d-iţmettilen amkan ideg yeṭṭeṣ umur ameqran n lɛibad di lmut.
Aselmed i neţţaf deg Wedlis Iqedsen ɣef ḥeggu n lmeggtin yeţɛawan-aɣ a nefhem akteṛ lmeɛna n “ciyul” d “hadis”. Deg Wawal n Ṛebbi, “ciyul” d “hadis” cudden ɣer lmut iseg ara d-ḥyun lɛibad. * (Yub 14:13; Lecɣal 2:31; Aweḥḥi 20:13) Adlis Iqedsen yeţwerri-d daɣen belli di “ciyul”, neɣ “hadis”, llan wid iqedcen yakan ɣef Yahwa akk-d xilla n wid ur neqdic ara fell-as. (Laṣel n ddunit 37:35; Ahellil 55:16) Yesselmad belli ɣer taggara ad yili “ḥeggu n iḥeqqiyen akw-d imesbaṭliyen.”—Lecɣal 24:15.
^ § 1 Di tama nniḍen, yura belli wid ur d-nḥeggu ara si lmut ur llin ara di “ciyul”, neɣ “hadis”, meɛna di “ǧahennama.” (Matta 5:30; 10:28; 23:33) Am “ciyul” d “hadis”, ǧahennama mačči d amḍiq yellan s ṣṣeḥ.
