ADLIS IQEDSEN ur d-​yenni ara d acu-​t wass ideg i d-​ilul Ɛisa. Lameɛna, yefka-​d ţţeḥqiq ara ɣ-​iɛiwnen a namen belli ur d-​ilul ara deg waggur n bujambeṛ.

Meyyez ɣef wamek i tella liḥala n tegnawt di leǧwahi n bujambeṛ di Bit-​Liḥim, tamdint anda ilul Ɛisa. Ccheṛ n Iyahudiyen iwumi qqaren Kisliw (i d-​iṣebḥen ger wambeṛ d bujambeṛ) yeţţili deg-​s usemmiḍ akk-​d ugeffur (lehwa). Ccheṛ i t-​id-​itebɛen d Tibit (ger bujambeṛ d yennayer). D lweqt ideg yeţţismiḍ lḥal akteṛ akk ɣef lewqat nniḍen deg useggas, yerna imukan ɛlayen yeţɣummu-​ten tikwal wedfel. Wali d acu i d-​yeqqar Wedlis Iqedsen ɣef liḥala n tegnawt di leǧwahi n Bit-​Liḥim.

Ɛazra, yiwen ger wid yuran Adlis Iqedsen, issenɛet-​ed belli d ṣṣeḥ di ccheṛ n Kisliw yeţţili usemmiḍ d ugeffur. Yeḥka-​d belli nnejmaɛen-​d lɣaci di Yarucalim “ass wis ɛecrin seg waggur wis ţesɛa [Kisliw].” Mbeɛd, yenna-​d belli imdanen-​nni llan “ţţergigin seg [...] ugeffur i d-​ikkaten.” Ɣef wayen yeɛnan liḥala n tegnawt di lweqt-​nni, agdud s yiman-​is yenna-​d: “D lweqt n  igwefran; ur nezmir ara an-​neqqim di beṛṛa.” (Ɛazra 10:9, 13; Irmiya 36:22) Daymi i xeddmen ţţawil imeksawen n leǧwahi-​nni, m’ara d-​iqreb bujambeṛ, akken ur ten-​id-​yeţţaf ara lḥal di lexlawi, deg yiḍ, nutni ţ-​ţqeḍɛiyin-​nsen!

Adlis Iqedsen ibeggen-​ed belli iḍ-​nni ideg i d-​ilul Ɛisa, imeksawen llan ţɛassan tiqeḍɛiyin-​nsen di lexla. Luqa yessefhem-​ed belli, di lweqt-​nni, imeksawen “ţţilin di lexlawi, ţɛassan deg yiḍ ɣef tqeḍɛiyin-​nsen” ɣer tama n Bit-​Liḥim. (Luqa 2:8-12) Meyyez, twaliḍ belli imeksawen-​agi ţţilin di lexlawi; mačči kan d asufeɣ i ssufuɣen lmal-​nsen deg wass. Tiqeḍɛiyin-​nsen llant di lexlawi deg yiḍ. Imi Bit-​Liḥim d amḍiq ideg yeţţili ugeffur d usemmiḍ di bujambeṛ, eɛni zemren ad qqimen imeksawen deg yiḍ di lexla nutni d lmal-​nsen? Xaṭi, wagi d ayen ibanen. Ihi, leḥwayeǧ-​agi meṛṛa i d-​nwala, beggnent-​ed belli Ɛisa ur d-​ilul ara di ccheṛ n bujambeṛ. *

Awal n Ṛebbi yenna-​d swaswa melmi i gemmut Ɛisa, meɛna drus i d-​yehdeṛ ɣef wass n tlalit-​is. Ayagi yesmektay-​ed imeslayen n ugellid Sliman i d-​yennan: “Axiṛ cciɛa yelhan, zzit ɣlayen; axiṛ ass n lmut, ass n tlalit.” (Amusnaw 7:1) Ihi, mačči d ayen yessewhamen imi aṭas i d-​yeḥka Wedlis Iqedsen ɣef wayen akk yeɛnan leqdic akk-​d lmut n Ɛisa, meɛna drus i d-​yeḥka ɣef wass n tlalit-​is.