TIMERNA
Tideţ ɣef Ubabat, ɣef Umemmit akk-d Ṛṛuḥ Iqedsen
WID yeṭṭfen deg uselmed n Talut qqaren belli Ṛebbi deg-s tlata: Ababat, Amemmit akk-d Ṛṛuḥ Iqedsen. Qqaren daɣen belli yal yiwen ţ-ţimitelt n wayeḍ, sɛan akk tazmert yerna llan si lebda. Ar ɣur-sen, Ababat d Ṛebbi, Amemmit d Ṛebbi, Ṛṛuḥ Iqedsen d Ṛebbi, meɛna i tlata d yiwen n Ṛebbi.
Aṭas n wid i geţţamnen s Talut steɛṛfen belli ur zmiren ara a d-ssefhmen aselmed-agi. Ɣas akken, nwan-as ahat belli yella di Tira Iqedsen. Meɛna, ameslay-agi “Talut” ulac-it akk deg Wedlis Iqedsen. Neţţaf deg-s kra n uselmed icudden ɣer Talut? Bac a d-nerr lǧawab, iwulem a nessenqed yiwen wafir i ssexdamen wid yeṭṭfen deg uselmed n Talut bac a d-beggnen belli tḥeqqen s wayen is i ţţamnen.
“AWAL YELLA D ILLU”
Yuḥenna 1:1 yeqqar-ed: “Di tazwara yella Wawal, Awal yella aked Yillu, Awal yella d Illu.” (Awal n tudert) Kra n yefyar umbeɛd, amceggeɛ Yuḥenna ibeggen-ed ɛinani belli “Awal” d Ɛisa. (Yuḥenna 1:14) Acu kan, imi “Awal” yeţţusemma Illu, yeɛni Ṛebbi, kra ɣilen belli Amemmit akk-d Ubabat llan d yiwen n Ṛebbi.
Ur teţţu ara belli di laṣel, aḥric-agi n Wedlis Iqedsen iţwakteb s tyunanit (tagrikit); armi d umbeɛd i d-iţwaṭerjem. Kra n ṭrejmanat ur ssexdmen ara imeslayen-a: “Awal yella d Illu.” Ayɣer? Ayen i ssnen di tyunanit n zik, swayes yeţwakteb Wedlis Iqedsen, yessaweḍ-iten ad fehmen belli ilaq a d-sṭerjmen imeslayen-agi akken nniḍen. Amek i ten-id-sṭerjmen? Atnan kra n lemtul: “Awal yella akk-d Ṛebbi yerna yella am neţţa.” (Lɛahd ajdid n ṭrejman, s teglizit) “Awal yella d yiwen n ṛebbi.” (Ṭrejma n ddunit tajdiṭ, s tṛumit) Ɛlaḥsab n ṭrejmat-agi, “Awal” ur yelli ara d Ṛebbi s yiman-is. a Imi “Awal” yesɛa amkan ɛlayen ger lexliqat meṛṛa n Yahwa, yeţţusemma “yiwen n ṛebbi.” Dagi, imeslayen-agi “yiwen n ṛebbi”, lmeɛna-nsen “yesɛa tazmert.”
JMEƐ-ED LEBYAN NNIḌEN
Amur ameqran si lɛibad ur ssinen ara lluɣa tayunanit n zik, swayes yura Wedlis Iqedsen. Amek ihi i tzemreḍ aţ-ţeẓreḍ ayen i gebɣa a d-yini wemceggeɛ Yuḥenna? Meyyez ɣef lemtel-agi: Yiwen n ccix n llakul la yessefham yiwet n temsalt i inelmaden-is. Mbeɛd, inelmaden-nni ur msefhamen ara wway gar-asen ɣef wayen akken i sen-d-yenna. Amek i zemren ad frun ayagi? Zemren ad ḍelben i ccix-nsen a sen-d-issefhem akteṛ. M’ara ẓren lebyan nniḍen, ad fehmen akteṛ tamsalt-nni. Akken ula ţ-ţamsalt n Yuḥenna 1:1; bac aţ-ţfehmeḍ lmeɛna-s, tzemreḍ aţ-ţḥewwseḍ di Linǧil-agi leḥwayeǧ nniḍen i d-isskanayen amkan i gesɛa Ɛisa. Ma tessenqdeḍ mliḥ tamsalt-agi, aţ-ţeẓreḍ d acu yellan d ṣṣeḥ, d acu yellan d lekdeb.
Di lemtel, wali acu yura mbeɛd Yuḥenna deg yixef 1 afir wis 18: “Yiwen ur yeẓri Sidi Ṛebbi [Bab n Tezmert].” (Awal n tudert, 2001). Meɛna, aṭas n yemdanen i gwalan Ɛisa, Amemmit, axaṭer Yuḥenna yenna-d: “Awal [Ɛisa] yuɣal-ed d amdan, yerna yezdeɣ gar-aneɣ. Nwala lɛaḍima-s.” (Yuḥenna 1:14) Amek ihi i gezmer Umemmit ad yili d Ṛebbi Bab n Tezmert? Yuḥenna inna-d daɣen belli Awal yella “aked Yillu.” Amek i gezmer ad yili ḥedd akk-d walbeɛḍ w’ad yili daɣen d albeɛḍ-agi s timmad-is? Uyerna, akken yura di Yuḥenna 17:3, Ɛisa ibeggen-ed belli neţţa akk-d Baba-s n igenwan mxallafen mliḥ. Yenna i Baba-s: “Kečč, weḥdek, d Illu n ṣṣeḥḥ.” Ɣer taggara n Linǧil-ines, Yuḥenna ihdeṛ-ed ɣef temsalt-agi s imeslayen-a: “Ayen akk i d-yeţwajemɛen [...] yura-d iwakken aţ-ţamnem belli d Ɛisa i d Lmasiḥ, d Mmi-s n Ṛebbi.” (Yuḥenna 20:31, Awal n tudert, 2001) Akken i teţwaliḍ, Ɛisa ur iţţusemma ara dagi Ṛebbi, meɛna Mmi-s n Ṛebbi. Axemmim-agi nniḍen i d-iţţunefken di Linǧil n Yuḥenna yessenɛat-aɣ-d amek i glaq a nefhem Yuḥenna 1:1. Ɛisa, “Awal”, yesɛa amkan ɛlayen, daymi i geţţusemma “yiwen n ṛebbi.” Lameɛna, ur yelli ara d Ṛebbi Bab n Tezmert s timmad-is.
TḤEQQEQ BELLI LEBYAN-NNI IṢEḤḤA
A d-nuɣal ɣer lemtel-nni n ccix n llakul akk-d inelmaden-is. Xayel lukan kra seg inelmaden-nni mazal-iten sɛan ccekk ɣas akken ccix-nsen yessefhem-asen-d akteṛ. Acu i zemren ad xedmen? Zemren ad steqsin ccix nniḍen ɣef temsalt-nni. Ma yella ccix wis sin iɛawed-ed i wayen i d-yenna umezwaru, aṭas seg-sen iwumi ara yekkes ccekk. Ula d kečč, ma mazal-ik tesɛiḍ ccekk deg wayen i d-yenna s ṣṣeḥ Yuḥenna ɣef Ɛisa akk-d Ṛebbi Bab n Tezmert, tzemreḍ aţ-ţqellbeḍ lebyan deg weḥric nniḍen n Wedlis Iqedsen i gekteb wayeḍnin. Di lemtel, ẓer ayen yura Matta. Ibder-ed lehduṛ n Ɛisa yeɛnan taggara n ddunit, yenna-d: “Ayen yeɛnan tasaɛeţ nni neɣ ass nni, yiwen ur iɛlim yis-sen, la lmuluk, la Amemmit, lameɛna siwa Ababat weḥdes.” (Matta 24:36) Amek i d-ţbegginen imeslayen-agi belli Ɛisa mačči d Ṛebbi Bab n Tezmert s timmad-is?
Ɛisa yenna-d belli d Ababat i geẓran akteṛ n leḥwayeǧ ɣef taggara n ddunit wala Amemmit. Lukan Ɛisa d Ṛebbi Bab n Tezmert s timmad-is, tili yessen ayen akk i gessen Baba-s. Ihi, Ababat d Umemmit ur zmiren ara ad ilin kifkif-iten. Kra zemren a d-ǧawben: “Ɛisa yenna-d ayagi asmi i gella kan d amdan ɣef lqaɛa.” Meɛna, ɣas lukan d ṣṣeḥ, acu ara d-nini ɣef ṛṛuḥ iqedsen? Ma yella ṛṛuḥ iqedsen akk-d Ṛebbi Ababat d yiwen, ayɣer ur d-yenni ara Ɛisa belli ṛṛuḥ-agi yessen ayen i gessen Ubabat?
Ma teţkemmileḍ tessenqadeḍ Adlis Iqedsen, a d-tafeḍ aṭas n yefyar nniḍen ara k-iɛiwnen aţ-ţfehmeḍ tamsalt-agi. Ifyar-agi rennun ţbegginen-d tideţ ɣef Ubabat d Umemmit akk-d ṛṛuḥ iqedsen.—Ahellil 90:2; Lecɣal 7:55; Ikulusiyen 1:15.
a Bac aţ-ţfehmeḍ akteṛ Yuḥenna 1:1, ẓer aḥric yeţţusemman: “La Parole était-elle ‘Dieu’ ou bien ‘un dieu’?” n Lbeṛǧ n Tɛessast n 1 wambeṛ 2008 (s tṛumit), i d-ssufɣen Inagan n Yahwa.
