1.  D acu i d-teţmettil Babil Tameqrant?

2.  Melmi i glaq a d-yas Lmasiḥ?

3.  Asexdem n idammen i udawi

4.  D acu i d-yenna Wedlis Iqedsen ɣef lefraq ger wergaz ţ-ţmeṭṭut-is?

5.  Leɛyudat

6.  Lehlakat yeţţenṭaḍen

7.  Timsal yeɛnan ttjaṛa akk-d ccṛeɛ

 1. D acu i d-teţmettil Babil Tameqrant?

Ayɣer i nezmer a d-nini belli “Babil tameqwrant” teţmettil-ed ddyanat meṛṛa n lekdeb? (Aweḥḥi 17:5). A nwali tlata n ssebbat:

• Tḥuza ddunit meṛṛa. Adlis Iqedsen yenna-d belli Babil Tameqrant teqqim ɣef ‘yegduden, lɣaci akk-d leǧnas’, uyerna d neţţat i “gḥekmen igelliden n ddunit” (Aweḥḥi 17:15, 18).

• Ur d-teţmettil ara lbulitik neɣ ttjaṛa. “Igelliden meṛṛa n ddunit” akk-d “wid yetjaṛen” ad kemmlen ad idiren mbeɛd m’ara tenger (Aweḥḥi 18:9, 15).

• S lefɛayel-is, tessebɛad imdanen ɣef Ṛebbi. Adlis Iqedsen icebbeh Babil Tameqrant ɣer yir tameṭṭut yeznuzuyen iman-is axaṭer tesbedd leɛqud akk-d lḥukumat s yedrimen neɣ s wayen nniḍen (Aweḥḥi 17:1, 2). Ɣef lǧal-is, leǧnas meṛṛa ḍaɛen. Uyerna, d imelyunen n lɛibad i tenɣa (Aweḥḥi 18:23, 24).

Ad uɣaleɣ ɣer tmeɣri 13 asteqsi 6

 2. Melmi i glaq a d-yas Lmasiḥ?

Adlis Iqedsen icar-ed belli Lmasiḥ a d-yas ɣer taggara n 69 ledwaṛ (smanat) (ɣer-ed Danyil 9:25).

• Melmi i bdant 69 n smanat-agi? Di 455 uqbel Ɛisa (qb.Ɛ.), asmi i gewweḍ Naḥamya ɣer Yarucalim akken a s-iɛiwed lebni i temdint-agi (Danyil 9:25; Naḥamya 2:1, 5-8).

• Acḥal n lweqt i ṭṭfent 69 n smanat-agi? Di kra n licaṛat n Wedlis Iqedsen, yiwen wass yeţmettil-ed aseggas (Aneẓruf 14:34; Ḥizqiyal 4:6). Daɣneţţa, smana teţmettil-ed sebɛa n iseggasen. Ihi, 69 smanat ṭṭfent 483 n sna (69 x 7).

• Melmi i fukkent 69 n smanat-agi? Ma nebda leḥsab n 483 n sna-yagi seg useggas 455 uqbel Ɛisa, a d-naweḍ ɣer useggas 29 mbeɛd Ɛisa a (bɛ.Ɛ.). Deg useggas-agi swaswa i geţwaɣḍeṣ Ɛisa yerna yuɣal d Lmasiḥ! (Luqa 3:1, 2, 21, 22).

Ad uɣaleɣ ɣer tmeɣri 15 asteqsi 5

 3. Asexdem n idammen i udawi

Llan ṭṭebba i gessexdamen kra n ţţawilat bac ad dawin amuḍin s idammen-is. Kra si ţţawilat-agi ur ten-iqebbel ara umasiḥi. Ɣef lemtel, amasiḥi ur iqebbel ara ad yefk idammen-is i wayeḍ, ur iqebbel ara daɣen a s-d-kksen idammen bac a ten-xeznen i wasm’ara yexdem abaṛasyun (Asmekti 15:23).

Acu kan, ahat yezmer umasiḥi ad yeqbel kra n ţţawilat nniḍen. Ɣef lemtel, yezmer ad yeqbel a s-d-kksen idammen, neɣ ad yeqbel ţţawilat-agi yeţţusemman s tṛumit: “hémodialyse”, “hémodilution”, “récupération du sang épanché”, “l’usage d’un cœur-poumon artificiel”  b. Yewwi-d ɣef yal amasiḥi ad yeṭṭef leqrar amek ara ssexdmen idammen-is m’ara yexdem abaṛasyun, m’ara yesɛeddi fell-as ṭṭbib, neɣ m’ara s-d-yefk ṭṭbib ddwa neɣ ayen nniḍen ara t-yesseḥlun. Mkul ṭṭbib amek i gessexdam ţţawilat-agi. Ihi, ur yeţṛaǧu ara umasiḥi ass-nni n ubaṛasyun, neɣ ass-nni ideg ara yesɛeddi fell-as ṭṭbib, neɣ ass-nni ideg ara s-d-yefk ddwa, bac ad yeṭṭef leqrar ma ad yeqbel neɣ ala kra n ţţawil n udawi. Uqbel i s-ilaq ad inadi ad iẓer amek ara ssexdmen swaswa idammen-is. Mkul yiwen ilaq ad yesteqsi iman-is akkagi:

• Lukan a d-ţwijebden cwiṭ seg idammen-iw beṛṛa n lǧeţţa-w, yerna ur ţţuɣalen ara din din ɣer iẓuran-iw, a y-isemmeḥ lxaṭer-iw a d-iniɣ belli idammen-agi mazal-iten ţekkan deg-i, yerna ur d-yewwi ara ihi ‘ad azzlen di lqaɛa’? (Asmekti 12:23, 24).

• Lukan a yi-d-kksen cwiṭ seg idammen-iw, a ten-ṣeffin neɣ a sen-rnun kra, mbeɛd a yi-ten-id-rren ɣer lǧeţţa-w? Ad yerwi lxaṭer-iw i d-yeţţuṛebban s Wedlis Iqedsen? Neɣ a y-isemmeḥ lxaṭer-iw ad qebleɣ ţţawil-agi n udawi?

Ad uɣaleɣ ɣer tmeɣri 39 asteqsi 3

 4. D acu i d-yenna Wedlis Iqedsen ɣef lefraq ger wergaz ţ-ţmeṭṭut-is?

Awal n Ṛebbi ur yeţweṣṣi ara argaz ţ-ţmeṭṭut-is ad mfaraqen, meɛna yenna-d ɛinani belli ma mfaraqen ur sɛin ara lḥeqq ad ɛiwden zzwaǧ (1 Ikurintiyen 7:10, 11). Acu kan, llant liḥalat i gewwin timasiḥiyin ad mfaraqent d yergazen-nsent (neɣ imasiḥiyen ad mfaraqen ţ-ţlawin-nsen).

•   Aqerru n twacult ur yeqbil ara s ţţɛemda ad iɛeggec tawacult-is: Argaz ad yagi a d-yelhi ţ-ţwacult-is, alamma ur ufin ara ayen swayes ara ɛicen (1 Timutawus 5:8).

• Tiyitwin: Amezwaǧ-nni yeţţewten yerna yeţwajerḥen iwala belli d ayen ara iḍurren ṣṣeḥḥa-s neɣ yugad ad yemmet (Igalatiyen 5:19-21).

• Ma iban belli lɛalaqat n umasiḥi-nni akk-d Yahwa ad ţwaɣent: Argaz ad yagi maḍi ad yeǧǧ tameṭṭut-is aţ-ţeɛbed Yahwa (neɣ tameṭṭut aţ-ţagi maḍi aţ-ţeǧǧ argaz-is ad yeɛbed Yahwa) (Lecɣal 5:29).

Ad uɣaleɣ ɣer tmeɣri 42 asteqsi 3

 5. Leɛyudat

Imasiḥiyen ur ţɛeggiden ara leɛyudat ur neɛǧib ara i Yahwa. Meɛna di kra n liḥalat, ilaq-as i yal amasiḥi ad yeǧǧ lxaṭer-is i d-yeţţuṛebban s Wedlis Iqedsen a t-iɛiwen bac ad iẓer d acu i glaqen a t-yexdem. A d-nwali kra n liḥalat:

• Ma yenna-yak-d walbeɛḍ “ṣaḥḥa lɛid-ik!”. Tzemreḍ a s-tiniḍ ṣaḥḥit. Ma yella win yebɣan ad yefhem akteṛ, tzemreḍ a s-tessefhmeḍ ayɣer ur teţɛeggideḍ ara lɛid-agi.

• Ma teɛreḍ-ik-id tmeṭṭut-ik (neɣ argaz-im), ur nqeddec ara ɣef Yahwa, aţ-ţeččeḍ akk-d twacult-is ass n lɛid. Ma isemmeḥ-ak lxaṭer-ik aţ-ţṛuḥeḍ, tzemreḍ a s-tessefhmeḍ i tmeṭṭut-ik (neɣ i wergaz-im) belli ma tella-d kra n lɛadda icudden ɣer ddin n lekdeb, ur teţcarakeḍ ara.

• Ma yefka-yak-d wemɛellem-ik idrimen m’ara d-teḥdeṛ kra n lɛid. Eɛni ur ilaq ara a ten-tqebleḍ? Wissen. Ma tqebleḍ idrimen-agi, ad yeḥseb wemɛellem-ik belli teţɛeggideḍ lɛid-agi? Neɣ yefka-yak-ten-id axaṭer teɛǧeb-as lxedma-k?

• Ma yefka-yak-d walbeɛḍ lehdeyya di kra n lɛid. A k-d-yini: “Ẓriɣ belli ur teţɛeggideḍ ara lɛid-agi, meɛna bɣiɣ kan a k-fkeɣ lehdeyya.” Ahat ţ-ţideţ, wagi yebɣa kan a k-yexdem lxiṛ. Meɛna, i lukan d anadi i geţnadi a k-ijeṛṛeb di liman-ik neɣ yebɣa aţ-ţɛeggdeḍ lɛid-agi? Meyyez ɣef temsalt-agi, mbeɛd ẓer ma ilaq aţ-ţqebleḍ lehdeyya-nni neɣ ala. Mkul m’ara neṭṭef leqrar, ilaq ad yethedden lxaṭer-nneɣ w’a neqqim d unṣiḥen i Yahwa (Lecɣal 23:1).

Ad uɣaleɣ ɣer tmeɣri 44 asteqsi 1

 6. Lehlakat yeţţenṭaḍen

Amasiḥi iḥemmel wiyaḍ, ɣef wayagi i geţḥadar iwakken ur sen-yessenṭaḍ ara lehlak. Yeţḥadar, ama yeẓra belli d ṣṣeḥ yehlek, ama d ccekk kan i gcukk belli yehlek lehlak yeţţenṭaḍen. Swakka, yeţbeggin-ed belli yettabaɛ lameṛ-agi n Wedlis Iqedsen i d-yeqqaren: “aţ-ţḥemmleḍ lɣir-ik am yiman-ik” (Iṛumaniyen 13:8-10).

Amek i gezmer a d-ibeggen win ihelken belli iḥemmel wiyaḍ? Albeɛḍ i geẓran belli yehlek, ur yeţṛuḥu ara ad yemsalam d wiyaḍ neɣ a ten-id-yeṭṭef ger iɣallen-is. Ur iţeččeḥ ara daɣen m’ur t-id-yeɛriḍ ara walbeɛḍ yebɣan ad iḥareb ɣef twacult-is. Uqbel ad yeţwaɣḍeṣ, a s-yini i ccix n tejmaɛt, yellan d amsuddes n wesqamu n lecyux, belli yehlek. Swakka, ad yeţwaxdem wayen ilezmen iwakken ur yessenṭaḍ ara lehlak-is i wid nniḍen ara yeţwaɣeḍṣen. Ma icukk walbeɛḍ belli yesɛa lehlak yeţţenṭaḍen, neţţa yeqsed ad iɛaceṛ iwakken ad yezweǧ, ilaq ad iṛuḥ a d-yekkes idammen. Akka ara d-yesbeggen belli ‘ur iţnadi ara kan ɣef nnfeɛ-ines, lameɛna yeţnadi ɣef nnfeɛ n wiyaḍ’ (Ifilibiyen 2:4, Awal n tudert, 2001).

Ad uɣaleɣ ɣer tmeɣri 56 asteqsi 2

 7. Timsal yeɛnan ttjaṛa akk-d ccṛeɛ

M’ara msewwaqen sin, ɣas d imasiḥiyen, yelha ad ketben ɣef lkaɣeḍ ayen iɣef i msefhamen, axaṭer ayagi a ten-yessebɛed ɣef waṭas n wuguren (Irmiya 32:9-12). Acu kan, yezmer a d-yili wugur amecṭuḥ ger sin imasiḥiyen ɣef temsal yeɛnan idrimen neɣ ayen nniḍen. Ilaq ihi ad ssiwḍen ad frun tamsalt-agi s lemɣawla, di lehna, yerna gar-asen kan.

Meɛna, d acu ara nexdem di liḥalat iweɛṛen, ɣef lemtel ma yella win i d-yegren fell-aneɣ lekdeb iwakken a ɣ-yessemsex, neɣ ma yella win i ɣ-ixedɛen neɣ i ɣ-ikellxen? (ɣer-ed Matta 18:15-17). Ɛisa ibder-ed tlata n leḥwayeǧ i nezmer a nexdem:

1. Ɛreḍ aţ-ţefruḍ ugur-agi gar-ak yid-es (wali afir 15).

2. M’ur temsefhamem ara, awi yid-ek yiwen neɣ sin n imasiḥiyen yetɛeqqlen (wali afir 16).

3. Ma mazal daɣen ur temsefhamem ara, tzemreḍ aţ-ţessiwḍeḍ tamsalt-agi i lecyux (wali afir 17).

Atmaten ur ssawaḍen ara daymen ɣer ccṛeɛ timsal i d-yeţţilin gar-asen, axaṭer ayagi ur yeţɛuzzu la Yahwa wala tajmaɛt (1 Ikurintiyen 6:1-8). Acu kan, zemrent ad ilint temsal ara yessiweḍ ahat umasiḥi ɣer ccṛeɛ. Atentah kra seg-sent: berru, anwa uɣur ara d-tegri dderya, anwa ara yesteklfen s umeṣruf-nsen neɣ ayen yeɛnan lweṛt. Ma yessaweḍ umasiḥi tamsalt ɣer ccṛeɛ iwakken a ţ-yefru di lehna, ur iɛuṣa ara lewṣayat n Wedlis Iqedsen.

Ma yessaweḍ umasiḥi tiwaɣiyin timeqranin i lḥukuma, ur iɛuṣa ara daɣen lewṣayat n Wedlis Iqedsen. Ɣef lemtel, ma tella-d temgerṭ, ma tella-d tukkerḍa tameqrant, ma yella win yeţţewten, ma yella win i gxedmen lɛaṛ i imecṭaḥ, neɣ win i gxedmen lɛaṛ i wayeḍ yerna yekkes fell-as lḥeṛma.

Ad uɣaleɣ ɣer tmeɣri 56 asteqsi 3