Win akken i getɛeddan ɣef Fahima iḍegger-​iţ ɣer lqaɛa uqbel a d-​terr s lexbaṛ s wayen i s-​iḍerrun. Tenna-​d: “Xedmeɣ kullec bac a t-​stixxṛeɣ fell-​i. Ɛerḍeɣ ad ɛeggḍeɣ, meɛna ula d yiwen n ṣṣut ur d-​yeffiɣ. Demmreɣ, wteɣ s lbunya, xebceɣ, wteɣ s iḍarren-​iw. Imiren ḥusseɣ i lmus yenta deg weksum-​iw. Lǧehd-​iw akk iṛuḥ.”

Lukan i telliḍ deg wemkan-​is, acu ara txedmeḍ?

Ɣas ma yella yeţban-​am-​d am wakken theggaḍ iman-​im i wannect-​a, ahat imi teţḥadareḍ m’ara tţeffɣeḍ tameddit, ẓer belli kulci yezmer a d-​yeḍru. “Mačči d wid xfifen i grebḥen tazzla, [...] neɣ d wid i gzaden di tmusni i geţţafen lemzeyya; [axaṭer] mkul yiwen a d-​imlil tiswiɛin yelhan neɣ tiswiɛin n diri.”​—Amusnaw 9:11.

Kra n telmeẓyin, am Fahima, yetɛedda fell-​asent ubeṛṛani. Kra nniḍen, win yetɛeddan fell-​asent ţ-​ţamusni neɣ d yiwen si twacult. Di lemtel, Nabila yetɛedda fell-​as yiwen weqcic n lǧiran, asmi tesɛa ɛecṛ snin kan di leɛmeṛ-​is. Tenna-​d: “Imi ugadeɣ aṭas yerna nneḥcameɣ ayendin, di tazwara ur hdiṛeɣ ula i yiwen ɣef wannect-​a.”

Fahima mazal-​iţ ar ass-​a tţezzem deg yiman-​is. Tenna-​d: “Ţmektayeɣ-​d dima iḍ-​nni. Qqareɣ-​as, lukan kan i xdimeɣ akteṛ bac a t-​stixxṛeɣ fell-​i. Acu kan, mi yi-​d-​yewwet s lmus, tcekkel-​iyi tugdi. Ur ssawḍeɣ ara ad xedmeɣ ayen nniḍen, meɛna mazal-​iyi qqareɣ-​as: ‘Lukan kan!’”

Nabila daɣen tţezzem deg yiman-​is. Tenna-​d ula d neţţat: “Yella yelzem fell-​i ad ḥadreɣ akteṛ ɣef yiman-​iw. Imawlan-​iw llan bɣan-​aɣ i nekk d weltma a neţɣama jmiɛ m’ara nleɛɛeb di beṛṛa, meɛna ur sen-​uɣeɣ ara awal. Qqareɣ-​as belli d nekk i gefkan tagniţ i lǧaṛ-​iw a yi-​ixdem cceṛ. Taluft-​agi tewwi-​d leḥzen i twacult-​iw, yerna ţḥussuɣ belli d nekk i d ssebba n wayen i sen-​yeḍran. D ayagi i yi-​irḥan akteṛ.”

Ma yella teţḥussuḍ ayen i teţḥussu Fahima neɣ Nabila, mmekti-​d belli ur telliḍ ara tebɣiḍ annect-​nni. Kra n yemdanen ssemẓayen taluft, ţţafen-​d ssebba belli akka i ţwaxedmen yergazen yerna ma yetɛedda walbeɛḍ ɣef teqcict, d neţţat i gnudan fell-​as. Lameɛna, ulac win yestahlen ad tɛeddin fell-​as wiyaḍ. Ma yeḍra-​yam-​d uxessaṛ yecban wagi, mačči d kemm i d ssebba!

D ṣṣeḥ, yeshel a d-​tiniḍ “mačči d kemm i d ssebba”, meɛna yewɛeṛ aţ-​ţamneḍ imeslayen-​agi. Kra n tullas teffrent deg wulawen-​nsent ayen i sent-​yeḍran, ţɛicent di llum n yiman-​nsent akk-​d lḥisas nniḍen i tent-​iţsummun cwiṭ cwiṭ. Lameɛna, anwa ara yestenfɛen ma tessusmeḍ? D kemm neɣ d win yetɛeddan fell-​am? Ilaq-​am aţ-​ţxemmeḍ ɣer lḥel nniḍen.

Ɛlaḥsab n Wedlis Iqedsen, Yub, yiwen wergaz yellan d aḥeqqi, yenna-​d imeslayen-​agi mi d-​iɛedda di ccedda tameqrant: “Ad cetkiɣ, ad rnuɣ, ad hedṛeɣ, seg wakken taṛwiḥt-​iw teṛwa lemṛaṛ.” (Yub 10:1) Aţ-​ţafeḍ nnfeɛ ma txedmeḍ am neţţa. Ma teḥkiḍ i walbeɛḍ ideg i tesɛiḍ laman, aţ-​ţessiwḍeḍ cwiyya cwiyya aţ-​ţqebleḍ ayen i m-​yeḍran w’aţ-​ţessenqseḍ taɛkemt n lḥisas i kem-​iqerḥen.

Fahima tufa belli annect-​a d ṣṣeḥ. Tenna-​d: “Ḥkiɣ i yiwet n teḥbibt-​iw. Tweṣṣa-​yi ad hedṛeɣ i sin lecyux n tejmaɛt-​iw. Feṛḥeɣ imi xedmeɣ ayen iɣef i yi-​tweṣṣa. Walan-​iyi acḥal ţ-​ţikkelt yerna nnan-​iyi-​d ayen swaswa i lliɣ ḥwaǧeɣ a s-​sleɣ: yeɛni mačči d nekk i d ssebba. Ur lliɣ d ssebba n wacemma.”

Nabila tehdeṛ i imawlan-​is. Tenna-​d: “Ɛawnen-​iyi. Weṣṣan-​iyi a d-​ḥkuɣ ayen yeḍran yid-​i. Ayagi isemmeḥ-​iyi a d-​ssufɣeɣ cwiṭ si leḥzen akk-​d zzɛaf yellan deg wul-​iw.”

Taẓallit daɣen d ţţawil i d-​yewwin ṣṣber i Nabila. Tenna-​d: “Tɛawen-​iyi ad hedṛeɣ i Ṛebbi, abeɛda di lewqat ideg i ḥusseɣ belli ur zmireɣ ara ad ḥkuɣ i lɛebd. M’ara ẓẓalleɣ, zemreɣ a d-​iniɣ kullec. Ayagi yeţţawi-​yi-​d lehna akk-​d talwit, mačči d kra.”

Tzemreḍ ula d kemm aţ-​ţafeḍ belli yella “lweqt i [ḥellu].” (Amusnaw 3:3) Bedd ɣer ṣṣeḥḥa n lǧeţţa-​m d leɛqel-​im. Steɛfu ayen ilezmen n lweqt. Uyerna, ţkel ɣef Yahwa, Ṛebbi n kra yellan d ṣṣber.​—2 Ikurintiyen 1:3, 4.

Ma yeţdemmir-​ikem walbeɛḍ n warrac aţ-​ţxedmeḍ ayen ur neṣfi ara, ulac uɣilif ma tenniḍ-​as: “Ur xeddem ara akka!” neɣ: “Kkes akin afus-​ik!” Ur ilaq ara aţ-​ţessusmeḍ axaṭer tugadeḍ a m-​iṛuḥ wemdakkel-​im. Ma yella yeǧǧa-​kem ɛlaǧal n wannect-​a, akken axiṛ! Testahleḍ argaz n ṣṣeḥ, argaz ara iqadren lǧeţţa-​m akk-​d imenzayen-​im.

“Di llakul, arrac jebbden-​iyi-​d deffir si llebsa-​w yerna qqaren-​iyi-​d kra n imeslayen swayes ara yi-​sneḥcamen. Di lemtel, qqaren-​iyi-​d belli ad feṛḥeɣ aṭas lukan ad ṭṭṣeɣ yid-​sen.”​—Nawal.

Ɛlaḥsab-​ik, arrac-​nni bɣan:

1. 1. Ad qeṣṣren kan yid-​es?

2. 2. A s-​ɛeǧben?

3. 3. Ad tɛeddin ɣef lḥeṛma-​s?

“Di lkaṛ, yiwen weqcic yenna-​yi-​d kra n leḥwayeǧ iɛefnen yerna yeṭṭef-​iyi-​d. Kkseɣ afus-​is, nniɣ-​as ad iṛuḥ akin fell-​i. Imuqel-​iyi-​d am win ara yi-​d-​yinin: ‘Waqila tagi tehbel?’”​—Kenza.

Ɛlaḥsab-​ik, aqcic-​nni yebɣa:

1. 1. Ad iqeṣṣer kan yid-​es?

2. 2. A s-​yeɛǧeb?

3. 3. Ad yetɛeddi ɣef lḥeṛma-​s?

“Akken bɣuɣ xedmeɣ bac ad stixxṛeɣ yiwen weqcic fell-​i, neţţa yezga yeqqar-​iyi-​d belli ɛeǧbeɣ-​as yerna yebɣa ad ffɣeɣ yid-​es. Tikwal yeslufuy-​iyi-​d i yiɣil-​iw. Qqareɣ-​as ad yeḥbes, neţţa yeggumma. Yiwen wass, lliɣ la ţcudduɣ lexyuḍ n isebbaḍen-​iw, yefka-​yi-​d tiyita ɣer tmeccact.”​—Fariza.

Ɛlaḥsab-​ik, aqcic-​nni yebɣa:

1. 1. Ad iqeṣṣer kan yid-​es?

2. 2. A s-​yeɛǧeb?

3. 3. Ad yetɛeddi ɣef lḥeṛma-​s?

Leǧwab iṣeḥḥan i tlata yesteqsiyen-​agi d wis 3.

Ayɣer albeɛḍ yeţnadin ad yetɛeddi ɣef lḥeṛma yemxallaf ɣef win yeţnadin ad yeɛǧeb neɣ win yeţqeṣṣiren kan?

Atɛeddi ɣef lḥeṛma itekk-​ed seg yiwet n lǧiha kan, yeɛni dima d yiwen i geţnadin ad yetɛeddi ɣef wayeḍ. Yeţkemmil ɣas ma tenniḍ-​as i winna yetɛeddayen ad yeḥbes.

Atɛeddi ɣef lḥeṛma mačči d lḥaǧa menwala. Yezmer ad yessiweḍ ɣer lɛaṛ.