Win akken i getεeddan ɣef Fahima iḍegger-​iţ ɣer lqaεa uqbel a d-​terr s lexbaṛ s wayen i s-​iḍerrun. Tenna-​d: “Xedmeɣ kullec bac a t-​stixxṛeɣ fell-​i. Σerḍeɣ ad εeggḍeɣ, meεna ula d yiwen n ṣṣut ur d-​yeffiɣ. Demmreɣ, wteɣ s lbunya, xebceɣ, wteɣ s iḍarren-​iw. Imiren ḥusseɣ i lmus yenta deg weksum-​iw. Lǧehd-​iw akk iṛuḥ.”

Lukan i telliḍ deg wemkan-​is, acu ara txedmeḍ?

Γas ma yella yeţban-​am-​d am wakken theggaḍ iman-​im i wannect-​a, ahat imi teţḥadareḍ m’ara tţeffɣeḍ tameddit, ẓer belli kulci yezmer a d-​yeḍru. “Mačči d wid xfifen i grebḥen tazzla, [...] neɣ d wid i gzaden di tmusni i geţţafen lemzeyya; [axaṭer] mkul yiwen a d-​imlil tiswiεin yelhan neɣ tiswiεin n diri.”​—Amusnaw 9:11.

Kra n telmeẓyin, am Fahima, yetεedda fell-​asent ubeṛṛani. Kra nniḍen, win yetεeddan fell-​asent ţ-​ţamusni neɣ d yiwen si twacult. Di lemtel, Nabila yetεedda fell-​as yiwen weqcic n lǧiran, asmi tesεa εecṛ snin kan di leεmeṛ-​is. Tenna-​d: “Imi ugadeɣ aṭas yerna nneḥcameɣ ayendin, di tazwara ur hdiṛeɣ ula i yiwen ɣef wannect-​a.”

Fahima mazal-​iţ ar ass-​a tţezzem deg yiman-​is. Tenna-​d: “Ţmektayeɣ-​d dima iḍ-​nni. Qqareɣ-​as, lukan kan i xdimeɣ akteṛ bac a t-​stixxṛeɣ fell-​i. Acu kan, mi yi-​d-​yewwet s lmus, tcekkel-​iyi tugdi. Ur ssawḍeɣ ara ad xedmeɣ ayen nniḍen, meεna mazal-​iyi qqareɣ-​as: ‘Lukan kan!’”

Nabila daɣen tţezzem deg yiman-​is. Tenna-​d ula d neţţat: “Yella yelzem fell-​i ad ḥadreɣ akteṛ ɣef yiman-​iw. Imawlan-​iw llan bɣan-​aɣ i nekk d weltma a neţɣama jmiε m’ara nleεεeb di beṛṛa, meεna ur sen-​uɣeɣ ara awal. Qqareɣ-​as belli d nekk i gefkan tagniţ i lǧaṛ-​iw a yi-​ixdem cceṛ. Taluft-​agi tewwi-​d leḥzen i twacult-​iw, yerna ţḥussuɣ belli d nekk i d ssebba n wayen i sen-​yeḍran. D ayagi i yi-​irḥan akteṛ.”

Ma yella teţḥussuḍ ayen i teţḥussu Fahima neɣ Nabila, mmekti-​d belli ur telliḍ ara tebɣiḍ annect-​nni. Kra n yemdanen ssemẓayen taluft, ţţafen-​d ssebba belli akka i ţwaxedmen yergazen yerna ma yetεedda walbeεḍ ɣef teqcict, d neţţat i gnudan fell-​as. Lameεna, ulac win yestahlen ad tεeddin fell-​as wiyaḍ. Ma yeḍra-​yam-​d uxessaṛ yecban wagi, mačči d kemm i d ssebba!

D ṣṣeḥ, yeshel a d-​tiniḍ “mačči d kemm i d ssebba”, meεna yewεeṛ aţ-​ţamneḍ imeslayen-​agi. Kra n tullas teffrent deg wulawen-​nsent ayen i sent-​yeḍran, ţεicent di llum n yiman-​nsent akk-​d lḥisas nniḍen i tent-​iţsummun cwiṭ cwiṭ. Lameεna, anwa ara yestenfεen ma tessusmeḍ? D kemm neɣ d win yetεeddan fell-​am? Ilaq-​am aţ-​ţxemmeḍ ɣer lḥel nniḍen.

Σlaḥsab n Wedlis Iqedsen, Yub, yiwen wergaz yellan d aḥeqqi, yenna-​d imeslayen-​agi mi d-​iεedda di ccedda tameqrant: “Ad cetkiɣ, ad rnuɣ, ad hedṛeɣ, seg wakken taṛwiḥt-​iw teṛwa lemṛaṛ.” (Yub 10:1) Aţ-​ţafeḍ nnfeε ma txedmeḍ am neţţa. Ma teḥkiḍ i walbeεḍ ideg i tesεiḍ laman, aţ-​ţessiwḍeḍ cwiyya cwiyya aţ-​ţqebleḍ ayen i m-​yeḍran w’aţ-​ţessenqseḍ taεkemt n lḥisas i kem-​iqerḥen.

Fahima tufa belli annect-​a d ṣṣeḥ. Tenna-​d: “Ḥkiɣ i yiwet n teḥbibt-​iw. Tweṣṣa-​yi ad hedṛeɣ i sin lecyux n tejmaεt-​iw. Feṛḥeɣ imi xedmeɣ ayen iɣef i yi-​tweṣṣa. Walan-​iyi acḥal ţ-​ţikkelt yerna nnan-​iyi-​d ayen swaswa i lliɣ ḥwaǧeɣ a s-​sleɣ: yeεni mačči d nekk i d ssebba. Ur lliɣ d ssebba n wacemma.”

Nabila tehdeṛ i imawlan-​is. Tenna-​d: “Σawnen-​iyi. Weṣṣan-​iyi a d-​ḥkuɣ ayen yeḍran yid-​i. Ayagi isemmeḥ-​iyi a d-​ssufɣeɣ cwiṭ si leḥzen akk-​d zzεaf yellan deg wul-​iw.”

Taẓallit daɣen d ţţawil i d-​yewwin ṣṣber i Nabila. Tenna-​d: “Tεawen-​iyi ad hedṛeɣ i Ṛebbi, abeεda di lewqat ideg i ḥusseɣ belli ur zmireɣ ara ad ḥkuɣ i lεebd. M’ara ẓẓalleɣ, zemreɣ a d-​iniɣ kullec. Ayagi yeţţawi-​yi-​d lehna akk-​d talwit, mačči d kra.”

Tzemreḍ ula d kemm aţ-​ţafeḍ belli yella “lweqt i [ḥellu].” (Amusnaw 3:3) Bedd ɣer ṣṣeḥḥa n lǧeţţa-​m d leεqel-​im. Steεfu ayen ilezmen n lweqt. Uyerna, ţkel ɣef Yahwa, Ṛebbi n kra yellan d ṣṣber.​—2 Ikurintiyen 1:3, 4.

Ma yeţdemmir-​ikem walbeεḍ n warrac aţ-​ţxedmeḍ ayen ur neṣfi ara, ulac uɣilif ma tenniḍ-​as: “Ur xeddem ara akka!” neɣ: “Kkes akin afus-​ik!” Ur ilaq ara aţ-​ţessusmeḍ axaṭer tugadeḍ a m-​iṛuḥ wemdakkel-​im. Ma yella yeǧǧa-​kem εlaǧal n wannect-​a, akken axiṛ! Testahleḍ argaz n ṣṣeḥ, argaz ara iqadren lǧeţţa-​m akk-​d imenzayen-​im.

“Di llakul, arrac jebbden-​iyi-​d deffir si llebsa-​w yerna qqaren-​iyi-​d kra n imeslayen swayes ara yi-​sneḥcamen. Di lemtel, qqaren-​iyi-​d belli ad feṛḥeɣ aṭas lukan ad ṭṭṣeɣ yid-​sen.”​—Nawal.

Σlaḥsab-​ik, arrac-​nni bɣan:

1. 1. Ad qeṣṣren kan yid-​es?

2. 2. A s-​εeǧben?

3. 3. Ad tεeddin ɣef lḥeṛma-​s?

“Di lkaṛ, yiwen weqcic yenna-​yi-​d kra n leḥwayeǧ iεefnen yerna yeṭṭef-​iyi-​d. Kkseɣ afus-​is, nniɣ-​as ad iṛuḥ akin fell-​i. Imuqel-​iyi-​d am win ara yi-​d-​yinin: ‘Waqila tagi tehbel?’”​—Kenza.

Σlaḥsab-​ik, aqcic-​nni yebɣa:

1. 1. Ad iqeṣṣer kan yid-​es?

2. 2. A s-​yeεǧeb?

3. 3. Ad yetεeddi ɣef lḥeṛma-​s?

“Akken bɣuɣ xedmeɣ bac ad stixxṛeɣ yiwen weqcic fell-​i, neţţa yezga yeqqar-​iyi-​d belli εeǧbeɣ-​as yerna yebɣa ad ffɣeɣ yid-​es. Tikwal yeslufuy-​iyi-​d i yiɣil-​iw. Qqareɣ-​as ad yeḥbes, neţţa yeggumma. Yiwen wass, lliɣ la ţcudduɣ lexyuḍ n isebbaḍen-​iw, yefka-​yi-​d tiyita ɣer tmeccact.”​—Fariza.

Σlaḥsab-​ik, aqcic-​nni yebɣa:

1. 1. Ad iqeṣṣer kan yid-​es?

2. 2. A s-​yeεǧeb?

3. 3. Ad yetεeddi ɣef lḥeṛma-​s?

Leǧwab iṣeḥḥan i tlata yesteqsiyen-​agi d wis 3.

Ayɣer albeεḍ yeţnadin ad yetεeddi ɣef lḥeṛma yemxallaf ɣef win yeţnadin ad yeεǧeb neɣ win yeţqeṣṣiren kan?

Atεeddi ɣef lḥeṛma itekk-​ed seg yiwet n lǧiha kan, yeεni dima d yiwen i geţnadin ad yetεeddi ɣef wayeḍ. Yeţkemmil ɣas ma tenniḍ-​as i winna yetεeddayen ad yeḥbes.

Atεeddi ɣef lḥeṛma mačči d lḥaǧa menwala. Yezmer ad yessiweḍ ɣer lεaṛ.