ASTEQSI WIS 3
Amek i glaq ad heddṛeɣ i imawlan-iw?
ACU I TZEMREḌ AŢ-ŢXEDMEḌ?
Meyyez ɣef liḥala-yagi: Yiwen yiḍ, Fares, yesɛan 17 n sna di leɛmeṛ-is, ifukk ccɣel i s-yeţţunefken deg wexxam; iɛzel-ed taswiɛt bac ad yesteɛfu. Yecɛel tilibizyu, yeqqim deg wemkan i gḥemmel akken ad ifeṛṛeǧ.
Imir kan, ikcem-ed baba-s; iban-ed yezɛef.
“Fares! Ayɣer akka i la teţḍeggiɛeḍ lweqt-ik zdat n tilibizyu? Mačči ilaq aţ-ţɛiwneḍ gma-k di leqraya? Ur txeddmeḍ ara maḍi ayen i k-d-neqqar!
— Atan daɣen!”, i s-yenna Fares s ṣṣut ɛlayen cwiyya akken ara d-isel baba-s.
Baba-s yekna-d ɣur-es: “Acu i d-tenniḍ?
— Ur tesɛiḍ d acu i d-nniɣ”, i s-d-yerra Fares, allen-is refdent d asawen.
Tura, baba-s yezɛef s ṣṣeḥ. Yenna-yas: “Ur yi-d-heddeṛ ara akken!”
Lukan i telliḍ deg wemkan n Fares, amek ara txedmeḍ bac ur d-iḍerru ara wannect-a?
XEMMEM CWIYYA!
M’ara theddṛeḍ akk-d imawlan-ik, am wakken la tessenhaṛeḍ ṭṭumubil. Ma yegzem webrid, aţ-ţeṭṭfeḍ abrid nniḍen.
ƔEF LEMTEL:
Amal tenna-d: “Iwɛeṛ-iyi ad hedṛeɣ d baba. Tikwal a s-hedṛeɣ, kra n ddqayeq mbeɛd a yi-d-yini: ‘Semmeḥ-iyi, yid-i i la d-theddṛeḍ?’”
AMAL TEZMER AŢ-ŢEṬṬEF ALUKAN YIWEN N ṚṚAY GER TLATA-YAGI:
-
1. Aţ-ţɛeggeḍ ɣef baba-s.
Amal tɛeggeḍ: “Aha tura! Ilaq a yi-d-tḥesseḍ!”
-
2. Ur theddeṛ ara i baba-s.
Amal teḥbes, ur teţnadi ara aţ-ţehdeṛ ɣef wugur-is (taluft-is).
-
3. Aţ-ţeṛǧu taswiɛt iwulmen bac aţ-ţehdeṛ i baba-s.
Cwiyya n lweqt mbeɛd, Amal tehdeṛ i baba-s mi gella weḥd-es.
Anwa ṛṛay ara tefkeḍ i Amal?
XEMMEM CWIYYA: Baba-s n Amal la yeţxemmim ɣer wayen nniḍen: ur yefhim ara d acu i gqellqen yelli-s. Ihi ma textaṛ ṛṛay amezwaru (1), yezmer ad yewhem acuɣer i ţ-yeffeɣ leɛqel. Amal ur teţdemmir ara baba-s a s-d-iḥess, yerna ur s-teţmuddu ara leqder akk-d lɛezz i gestahel. (Ifasusiyen 6:2) Xaṭi, ṛṛay-agi ur yeṣliḥ ara maḍi.
Akken i tzemreḍ a d-tafeḍ abrid nniḍen ansi ara tɛeddiḍ ma yella yegzem webrid i d-ttebɛeḍ, i tzemreḍ a d-tafeḍ amek ara theddṛeḍ akk-d baba-k d yemma-k!
Ṛṛay wis sin (2) yezmer ad yili d ṛṛay isehlen, meɛna mačči d win iṣelḥen akteṛ. Acuɣer? Axaṭer, ma tebɣa Amal aţ-ţefru iɣeblan-is, ilaq-as a ten-teḥku i baba-s; neţţa, bac ad yizmir a ţ-iɛiwen, yelzem ad yeɛlem s wayen i gḍerrun di tudert n yelli-s. Ma teqsed ihi ur teqqar acemma i baba-s, ayagi mačči d lḥel.
Meɛna, s ṛṛay wis tlata (3), Amal ur teţţaǧǧa acemma a s-yili d aḥebbas, yeɛni a s-yegzem abrid. Aţ-ţnadi aţ-ţehdeṛ ɣef wugur-is di teswiɛt nniḍen. Tezmer daɣen aţ-ţekteb tabṛaţ i baba-s; ahat aţ-ţḥuss iman-is di lehna din din.
Tabṛaţ a s-tsemmeḥ aţ-ţekteb swaswa ayen i tebɣa a s-tini. M’ara iɣer baba-s tabṛaţ i s-tura, ad iẓer d acu i tebɣa a s-tini w’ad yefhem akteṛ d acu i ţ-iceɣben. Ihi, ṛṛay wis 3 yelha ama i Amal ama i baba-s. Ama s yimi i s-tehdeṛ ama s tebṛaţ, ṛṛay-agi yeɛdel akk-d lewṣaya n Wedlis Iqedsen i d-yeqqaren: “An-nadi ihi ayen i d-iţţawin lehna.”—Iṛumaniyen 14:19.
Acu n ṛṛay nniḍen i tezmer a t-teṭṭef Amal?
Ma yusa-yak-d yiwen di lbal, ssken-ed acu i gezmer a d-yawi.
ḤADER ƔEF LMEƐNA N IMESLAYEN-IK
Ur teţţu ara belli ayen i d-teqqareḍ mačči d ayen i fehhmen dima imawlan-ik.
DI LEMTEL:
Imawlan-ik a k-id-steqsin ayɣer i d-teţbaneḍ tḥezneḍ. A sen-tiniḍ: “Ur bɣiɣ ara a d-ḥkuɣ.”
Meɛna, nutni ad fehmen: “Ur ţkileɣ ara mliḥ fell-awen. Ad hedṛeɣ i yemdukkal-iw ɣef wugur-iw, mačči i kenwi.”
I lukan a d-temmagreḍ yiwen wugur d ameqran w’a k-inin imawlan-ik a k-nɛiwen. Meɛna, kečč a sen-tiniḍ: “Ur tqelliqet ara, zemreɣ ad qableɣ ayagi weḥd-i.”
-
Acu i zemren ad fehmen imawlan-ik?
-
D acu i axiṛ a sen-tiniḍ?
