Ma yella teqqareḍ Adlis Iqedsen akk-​d Inigi n Yahwa, bla ccekk txeddmeḍ lmeǧhud bac a d-​theggiḍ ayen ara teɣreḍ yid-​es. D lɛali aţ-​ţxeddmeḍ daɣen akka uqbel aţ-​ţḥedṛeḍ i unejmuɛ, iwakken aţ-​ţesfaydiḍ mliḥ seg-​s. Yelha a d-​teţjabeḍ lweqt w’a k-​yili wayagi ţ-​ţannumi.

Xtiṛ taswiɛt d wemkan igerrzen. Anta taswiɛt ideg i teţţarraḍ ddehn-​ik akteṛ? Ṣṣbeḥ, uqbel aţ-​ţṛuḥeḍ ɣer lxedma, neɣ deg yiḍ, ma ifat ṭṭṣen warraw-​ik? Xas ur testufaḍ ara bac aţ-​ţeɣreḍ aṭas, ẓer acḥal n lweqt ara tesɛeddiḍ di leqraya-​yagi, yerna xdem ayen akk iwumi i tzemreḍ iwakken ur teţţaǧǧaḍ acemma a k-​isṛuḥ lweqt-​nni i d-​tɛezleḍ. Nadi-​d amkan ihennan yerna ssebɛed fell-​ak ayen akk i gzemren a k-​yessedhu. Ɣef lemtel, ssexsi (ssens) ṛṛadyu, tilibizyu akk-​d tilifun. Ẓẓall uqbel aţ-​ţeɣreḍ; annect-​a a k-​iɛiwen akken ur teţxemmimeḍ ara i iɣeblan i d-​temmugreḍ ass-​nni w’aţ-​ţṛekzeḍ ɣef Wawal n Ṛebbi.—Ifilibiyen 4:6, 7.

Sbin-​ed s westillu ixemmimen yesɛan azal yerna heggi-​d leǧwab. Di tazwara, ẓer ɣef wacu i d-​theddeṛ tmeɣri-​nni meṛṛa. Xemmem ɣef usentel-​ines, tnadiḍ lɛalaqa yellan ger usentel-​agi d yal asentel n tseddaṛin. Muqel daɣen ţţeswiṛat. Ɣer isteqsiyen n wesmekti yeɛnan ixemmimen yesɛan azal n tmeɣri-​nni. Mbeɛd, ɣer mkul taseddaṛt tqellbeḍ leǧwab i westeqsi i ţ-​yeɛnan. Ɣer daɣen ifyar i d-​iţţunefken tnadiḍ lɛalaqa yellan gar-​asen ţ-​ţemsalt i teqqareḍ. (Lecɣal 17:11) Mi d-​tufiḍ leǧwab i westeqsi di tseddaṛt, ɛellem kra n imeslayen ara k-​iɛiwnen a t-​id-​temmektiḍ. Ma yella tebɣiḍ, m’ara tiliḍ deg unejmuɛ, tzemreḍ aţ-​ţrefdeḍ afus-​ik iwakken a d-​tefkeḍ leǧwab awezlan. Ur teţţuḥettmeḍ ara aţ-​ţessexdmeḍ imeslayen swaswa yuran di tseddaṛt-​nni.

M’ara tessenqadeḍ timsal i neqqar mkul smana deg inejmuɛen, aţ-​ţernuḍ tiwiztin tijdidin i ugerruj-​ik n tmusni, yeɛni tamusni n Wedlis Iqedsen.—Matta 13:51, 52.

• Amek ara taɣeḍ tannumi a d-​teţjabeḍ lweqt bac a d-​tessewǧadeḍ inejmuɛen?

• Amek i tzemreḍ a d-​theggiḍ leǧwab i unejmuɛ?