Xilla i gḥebbsen ur ţṛuḥun ara ɣer inejmuɛen n ddin axaṭer ufan belli ur ţţuwellhen deg wayen yeɛnan leḥwayeǧ n ṛṛuḥ ur ţţuṣebbren. Ayɣer ihi i glaq aţ-​ţḥeddṛeḍ i inejmuɛen i xeddmen Inagan n Yahwa? Acu ara d-​tesfaydiḍ seg-​sen?

Aţ-​ţfeṛḥeḍ m’ara tiliḍ ger yerfiqen n lɛali. Imasiḥiyen n lqern amezwaru ferqen ţ-​ţijemmuyaɛ. Ţnejmaɛen bac ad ɛebden Ṛebbi, bac ad ɣren Tira Iqedsen w’ad mseǧhaden. (Iɛebṛaniyen 10:24, 25) Tella gar-​asen leḥmala, yerna wa yeţḥebbiṛ ɣef wa; ţnejmaɛen akk-​d leḥbab n ṣṣeḥ, yeɛni atmaten ţ-​ţyessetmatin-​nsen di ddin. (2 Itisalunikiyen 1:3; 3 Yuḥenna 14, 15) Imi nettabaɛ lemtel-​nsen, ula d nekni neţţaf lfeṛḥ.

Aţ-​ţḥefḍeḍ amek ara teṭṭebbiqeḍ imenzayen n Wedlis Iqedsen. Ass-​a, irgazen, tulawin d warrac imecṭaḥ ţnejmaɛen lwaḥid, am wakken i llan xeddmen-​t iqeddacen n Ṛebbi di zzman n Wedlis Iqedsen. Deg inejmuɛen-​agi, llan iselmaden iẓewren i gessexdamen Adlis Iqedsen akken a ɣ-​ɛiwnen a nefhem amek ara neṭṭebbiq imenzayen-​is di temɛict-​nneɣ n yal ass. (Asmekti 31:12; Naḥamya 8:8) Mkul yiwen seg-​neɣ yezmer a d-​ibeggen liman-​ines akk-​d usirem-​ines m’ara d-​yeţţarra leǧwab neɣ m’ara icennu.—Iɛebṛaniyen 10:23.

Aţ-​ţafeḍ sseɛd m’ara yeǧhed liman-​ik. Yenna wemceggeɛ Bulus i iɛeggalen n tejmaɛt n lweqt-​nni-​ines: “Acḥal i bɣiɣ a kkun-​ẓreɣ, akken [...] a nemseǧhad wway gar-​aneɣ; kunwi s liman-​nwen, nekk s liman-​inu, imi yiwen n liman i ɣ-​isdukklen.” (Iṛumaniyen 1:11, 12, Awal n tudert, 2001) Ma yella nezga neţnejmaɛ akk-​d Inagan n Yahwa, ad yeǧhed liman-​nneɣ w’a neṭṭef leqrar akken a neţɛic ɛlaḥsab n imenzayen n Wedlis Iqedsen.

Tebɣiḍ aţ-​ţḥedṛeḍ yid-​neɣ i unejmuɛ i d-​iteddun akken aţ-​ţesfaydiḍ seg wayen akka iɣef i d-​nehdeṛ? A nesteṛḥeb yis-​ek akken ilaq! Ur teḥwaǧeḍ ara aţ-​ţxellṣeḍ bac aţ-​ţḥedṛeḍ; ur nessutur ara maḍi idrimen i wid i d-​iţţasen.

• Anwa lemtel i nettabaɛ deg wayen yeɛnan inejmuɛen-​nneɣ?

• Acu ara k-​d-​awin inejmuɛen-​nneɣ?