Adlis Iqedsen ihdeṛ-​ed ɣef imasiḥiyen i geţţuwekklen ɣef kra n lecɣal di tejmaɛt: ibder-​ed “iɛessasen” akk-​d iqeddacen ‘imɛawnen.’ (Ifilibiyen 1:1) Di mkul tajmaɛt, neţţaf kra seg-​sen. Acu i xeddmen iqeddacen imɛawnen ɣef ddemma-​nneɣ?

Ţɛawanen lecyux. Iqeddacen imɛawnen, ama meqqrit ama meẓẓiyit, ṭṭfen di Yahwa, d wid iɣef yella leţkal yerna ţwenniɛen lecɣal-​nsen. Lehhun-​d d kra n lecɣal yesɛan azal yeɛnan lmeḥwiǧat n tejmaɛt. Xeddmen daɣen ayen iwulmen bac aţ-​ţeddu s nniḍam. Annect-​a yeţţak tagniţ i lecyux akken a d-​lhin d ccɣel i sen-​iţţunefken, yeɛni ad ksen tajmaɛt w’a ţ-​sselmden.

Xeddmen lecɣal iṣelḥen. Kra n iqeddacen imɛawnen ţţuwekklen bac ad steṛḥiben s wid i d-​iţţasen ɣer inejmuɛen. Wiyaḍ lehhun-​d d dduzan n ṣṣut neɣ d leḥsabat yeɛnan tukciwin n tejmaɛt, neɣ ţferriqen tizmamin akk-​d imeḍqan n uberreḥ i iɛeggalen n tejmaɛt. Ţţaken afus n lemɛawna bac ad ssizdgen Tazeqqa n Tgelda. Tikwal, ṭṭalaben-​asen lecyux ad bedden ɣer imasiḥiyen i gmeqqren di leɛmeṛ. Akken bɣun ilin lecɣal i sen-​iţţunefken i iqeddacen imɛawnen, xeddmen-​ten seg wul. Ɣef wayagi i ten-​ţqadaren iɛeggalen meṛṛa n tejmaɛt.—1 Timutawus 3:13.

D lemtul n lɛali. Iqeddacen imɛawnen ţwaxtaṛen imi sɛan ṣṣifat yelhan i glezmen i umasiḥi. Lxeṭbat i d-​ţţaken deg inejmuɛen sseǧhadent liman-​nneɣ. Imi i ɣ-​llan d lemtul n lɛali deg uberreḥ, ţɛawanen-​aɣ a nesɛu leḥṛaṛa. Afus n lemɛawna i ţţaken i lecyux iţţawi-​d lfeṛḥ ţ-​ţdukli. (Ifasusiyen 4:16) M’ara iɛeddi lweqt, zemren ad kesben ṣṣifat ilezmen bac ad uɣalen d lecyux.

• Acu-​tent ṣṣifat i glaq ad sɛun iqeddacen imɛawnen?

• Acu i xeddmen akken aţ-​ţeddu akken ilaq tejmaɛt?