Twalaḍ di ţţeswiṛat n treẓẓit-​agi belli Inagan n Yahwa ţlusun akken ilaq m’ara ţṛuḥun ɣer inejmuɛen-​nsen? Ayɣer i neţţak annect-​a n lqima i llebsa-​nneɣ?

Axaṭer neţqadar Ṛebbi. D ṣṣeḥ, Ṛebbi ur iţmuqul ara ɣer ṣṣifa. (1 Camwil 16:7) Meɛna, m’ara t-​nɛebbed akk-​d wiyaḍ, nbeqqu seg wul a d-​nbeggen leqder ama i neţţa ama i wid ukud i neţnejmaɛ. Di lemtel, lukan a nɛeddi zdat n lqaḍi (anezzarfu), a nḥader amek ara nels imi i t-​neţqadar ɛlaǧal n wemkan-​nni i s-​iţţunefken. Akka daɣen ula deg inejmuɛen-​nneɣ: llebsa-​nneɣ teţbeggin-​ed belli neţqadar Win yellan d “Anezzarfu n ddunit meṛṛa”, yeɛni Yahwa Ṛebbi, yerna neţqadar amḍiq-​nni ideg i t-​neţţeɛbad.—Laṣel n ddunit 18:25.

Axaṭer neţqadar lumuṛ i nettabaɛ. Adlis Iqedsen yeţweṣṣi imasiḥiyen ad ţlusun llebsa “i d-​iţbegginen annuz akw-​d leḥya.” (1 Timutawus 2:9, 10) Acu i d lmeɛna n wayagi? A nels llebsa “i d-​iţbegginen annuz”, lmeɛna-​s ur d-​njebbed ara tamuɣli n medden s llebsa n zzux neɣ, di lemtel, s llebsa iɛerran neɣ izeyyṛen mliḥ. Ma d “leḥya” teţɛawan-​aɣ a nextiṛ llebsa icebḥen, ur nelli ara d llebsa ixeṛben neɣ iɛeddan tilas. Acu kan, lumuṛ-​agi ur a ɣ-​ţḥettimen ara a nels yiwen kan n ṣṣenf n llebsa: yella lxetyaṛ. S llebsa imeɛnen, nezmer “[a ncebbeḥ] di kullec aselmed n Yillu amsellek-​nneɣ” yerna “[a neḥmed] Sidi Ṛebbi” mebla ma neldi-​d imawen-​nneɣ. (Titus 2:10; 1 Buṭrus 2:12, Awal n tudert, 2001) Akka, imi i neţlusu akken ilaq deg inejmuɛen-​nneɣ, neţcebbiḥ leɛbada-​nneɣ i Yahwa.

Meɛna, ur ţɛemmid ara i llebsa aţ-​ţili d ayen ara k-​iqeḍɛen a d-​taseḍ ɣer inejmuɛen-​nneɣ! Ur ḥwaǧen ara iceṭṭiḍen ad ilin ɣlayit bac a d-​banen wulmen, zeddigit neɣ cebḥen.

• Ayɣer i tesɛa llebsa-​nneɣ azal m’ara neţţeɛbad Ṛebbi?

• Acu n lumuṛ i ɣ-​iţwellihen m’ara neţţextiṛi llebsa-​nneɣ?