Adlis Iqedsen ixebbeṛ-​ed belli mbeɛd lmut n Lmasiḥ a d-​kkren iselmaden n lekdeb ger imasiḥiyen imezwura w’ad sluɣen tideţ n Wedlis Iqedsen. (Lecɣal 20:29, 30) D ayen swaswa i geḍran. Ssexlḍen ixemmimen ur nelli ara di ddin amasiḥi i wayen yesselmed Ɛisa; annect-​a ixleq-​ed ddin amasiḥi n lekdeb. (2 Timutawus 4:3, 4) Amek ihi i nezmer a netḥeqqeq belli ass-​a nefhem akken ilaq ayen yesselmad s ṣṣeḥ Wedlis Iqedsen?

Yewweḍ-​ed lweqt. Yahwa icar-​ed belli di “lweqt n taggara [...] tamusni aţ-​ţzid.” (Danyil 12:4) Di 1870, kra n yemdanen yeţnadin tideţ fehmen belli xilla si leḥwayeǧ, i sselmadent ddyanat, ur llint ara deg Wedlis Iqedsen. Nudan ihi ad fehmen acu i gesselmad wedlis-​agi di laṣel. Yahwa iɛawen-​iten.

Asenqed n Wedlis Iqedsen. Inelmaden n Wedlis Iqedsen llan qqaren adlis-​agi tamsalt tamsalt; d ţţawil-​agi i nessexdam ula d ass-​a. Ma yella iwɛeṛ-​asen ad fehmen yiwen n weḥric seg Wedlis Iqedsen, ţnadin ifyar nniḍen ara t-​id-​issefhmen. Ma ifat fehmen yiwet n temsalt iɛedlen d wayen yesselmad Wedlis Iqedsen, ţţarun-​ţ. Imi ǧǧan Adlis Iqedsen a d-​issefhem iman-​is s yiman-​is, ɛawden ssekflen-​d tideţ ɣef yisem n Ṛebbi, ɣef Tgelda-​s, ɣef lebɣi-​s yeɛnan lqaɛa d lɛibad, ɣef liḥala ideg i llan wid yemmuten akk-​d usirem n ḥeggu n lmeggtin. Ayen akka i d-​ufan yessukkes-​iten-​id seg waṭas n leḥwayeǧ n lekdeb is i llan ţţamnen, isellek-​iten-​id daɣen si lefɛayel n diri.—Yuḥenna 8:31, 32.

Di 1879, Inelmaden n Wedlis Iqedsen fehmen belli yewweḍ-​ed lweqt ad sselmden tideţ i waṭas n medden. Ihi, bdan ssufuɣen-​d tasɣunt yeţţusemman Lbeṛǧ n Tɛessast yeţxebbiṛ-​ed ɣef Tgelda n Yahwa. Mazal nessufuɣ-​ed tasɣunt-​agi ar ass-​a. Tura, neţwerri tideţ n Wedlis Iqedsen di 240 n tmura akk-​d imeḍqan deg wakteṛ n 750 lluɣat. Leɛmeṛ i tzad (teṭṭuqqet) tmusni n tideţ am wass-​a!

• Acu i geḍran i tideţ n Wedlis Iqedsen mbeɛd lmut n Lmasiḥ?

• Amek i tɛawed tufrar-​ed tideţ-​agi?