Ssexdam lexbaṛat iɣef yella leţkal. Yal m’ara k-teţţunefk tegniţ, ɣer-ed qbala ayen yuran deg Wedlis Iqedsen akken aţ-ţreṣṣiḍ ayen i tesselmadeḍ ɣef Wawal n Ṛebbi. Ma tbedreḍ-d kra n lexbaṛ swayes i tesliḍ, neɣ yeḍran s ṣṣeḥ, neɣ icudden ɣer tussna, neɣ d ayen nniḍen, yerna tqesdeḍ a d-tessefhmeḍ yis kra n uxemmim, tḥeqqeq qbel belli ayen ara d-tiniḍ mazal-it iṣeḥḥa yerna yella fell-as leţkal.

Ssexdam akken ilaq lexbaṛat ara d-tefkeḍ. Ssefham-ed ifyar ɛlaḥsab n yefyar nniḍen i sen-d-yezzin, ɛlaḥsab n lexbaṛ yellan deg Wedlis Iqedsen akk-d tezmamin n ‘wakli unṣiḥ aɛeqli.’ (Matta 24:45) Ma tewwiḍ-d kra n lexbaṛ ur d-nekki ara seg Wedlis Iqedsen neɣ si tezmamin-nneɣ, ssexdem-it akken ilaq. Ur s-ţbeddil ara lmeɛna i gesɛa di laṣel, ur d-qqar ara daɣen ayen yemxallafen ɣef wayen i gebɣa a t-id-yini bab n lexbaṛ-agi.

Ssexdam lexbaṛat-agi bac a d-tessefhmeḍ akken ilaq ayen i tesselmadeḍ. Mbeɛd mi d-teɣriḍ afir, neɣ mi d-tbedreḍ yiwen lexbaṛ, efk-ed kra n yesteqsiyen s ḍḍrafa, neɣ ssefhem-ed axemmim-inek s kra n lemtul akken aţ-ţɛiwneḍ wid i k-d-yeţḥessisen a d-afen weḥḥed-sen ayen i glaq a t-fehmen.