Ilaq “aţ-ţilim d iselmaden.” (Iɛeb. 5:12) Twalaḍ? Yahwa, Aselmad yifen akk wiyaḍ, iḍleb-aɣ-d i nekni a nesselmed i lɣir-nneɣ menhu-t! Mkul m’ara nesɛu tagniţ a nesselmed tideţ ɣef Yahwa, (di twacult, di tejmaɛt neɣ deg uberreḥ) d lemzeyya tameqrant i ɣ-yeţţunefken yerna d ccɣel ifazen iɣef i neţţuwekkel. Amek ara nessiweḍ a nexdem ccɣel-agi akken ilaq?

Leǧwab yella deg imeslayen i gura wemceggeɛ Bulus i Timutawus. Yenna-yas: “Lhu-d d leqraya, d nehhu, d uselmed.” Yenna-yas daɣen: “M’ara txedmeḍ akka, aţ-ţsellkeḍ iman-ik akw-d wid i k-iţḥessisen.” (1 Tim. 4:13, 16) Lexbaṛ i teţberriḥeḍ yeţsellik imdanen. Daymi i glaq i mkul yiwen ad yexdem lmeǧhud akken ad yeḥṛec mliḥ di leqraya akk-d uselmed. Tareẓẓit-agi teţwaxdem bac a k-tɛiwen deg wannect-a. Atentah kra si leḥwayeǧ yellan deg-s:

Ulac aselmad i gecban Yahwa. (Yub 36:22) Ɣas ma yella tareẓẓit-agi a k-tɛiwen akken aţ-ţissineḍ akteṛ aţ-ţeɣreḍ w’aţ-ţesseɣreḍ, ur ilaq ara aţ-ţeţţuḍ belli d Yahwa i d lɛinṣer n lexbaṛ i nesselmad, yerna d neţţa i d-ijebbden imdanen. (Yuḥ. 6:44) Ihi, ṭṭalab-as ṛṛuḥ iqedsen di tẓallit. Ssexdam daɣen aṭas Awal-is. Ţɛawan wid i k-d-yeţḥessisen ad rren ddehn-nsen ɣer Yahwa, mačči ɣer yiman-ik. Xdem lmeǧhud akken ad uɣalen ad ḥemmlen Yahwa.

Teţţunefk-ak tegniţ aţ-ţesseɣreḍ i medden lexbaṛ yesɛan azal akk meqqren, iɣef leɛmeṛ yeţţuwekkel wemdan. Neţţuqenneɛ belli ma tţekleḍ ɣef ‘tezmert i d-iţţak Ṛebbi’, aţ-ţxedmeḍ akken ilaq ccɣel-agi.​—1 Buṭ. 4:11.

Aql-aɣ yid-ek di ccɣel-agi n uselmed,

Asqamu amwellah n Inagan n Yahwa