Ṛebbi yeḍleb i yemdanen meṛṛa ad qerrben ɣur-es s tẓallit. (Ahellil 65:3) Lameɛna, ur iţḥessis ara i tẓilla meṛṛa, yeɛni ur tent-iqebbel ara irkelli. Argaz i gḥeqren tameṭṭut-is yezmer ur ţwaqbalent ara tẓilla-ines. (1 Buṭrus 3:7) Asmi i ggumman wat Isṛayil ad ǧǧen yir lefɛayel-nsen, Ṛebbi yugi ad iḥess i tẓilla-nsen. Acu kan, Ṛebbi iqebbel tiẓilla n win ituben si ddnub i gexdem (yeɛni yendem ɣef wayen i gexdem), ɣas ma yella ddnub-agi-ines d ameqran. Taẓallit d lemzeyya tameqrant sɣur Ṛebbi.​—Ɣer Icɛaya 1:15; 55:7.

 Wali bidyu Eɛni Ṛebbi yeţḥessis i tẓilla meṛṛa?

 Taẓallit tţekka di leɛbada. Ilaq ihi a neţẓalla i Uxellaq-nneɣ kan, Yahwa. (Matta 4:10; 6:9) Uyerna, imi ur nekmil ara, ilaq-aɣ a neţẓalla s yisem n Ɛisa axaṭer yemmut ɣef ddemma n ddnubat-nneɣ. (Yuḥenna 14:6) Yahwa ur ibɣi ara a d-neţɛawad i tẓilla i neḥfeḍ neɣ i tẓilla i geţwaketben. Yebɣa a d-kkent tẓilla-nneɣ seg wul.​—Ɣer Matta 6:7; Ifilibiyen 4:6, 7.

 Axellaq-nneɣ isell-aɣ-d ula m’ara s-neţẓalla deg wul-nneɣ. (1 Camwil 1:12, 13) Iḍleb-aɣ-d a s-neẓẓall melmi i nebɣa. Ɣef lemtel, m’ara d-nekker ṣṣbeḥ neɣ uqbel a neṭṭeṣ; m’ara nṛuḥ a nečč neɣ m’ara d-nemmager iɣeblan.​—Ɣer Ahellil 55:23; Matta 15:36.

 Ur yeshil ara a nqerreb ɣer Ṛebbi axaṭer lɛibad i ɣ-d-yezzin ur ţţamnen ara yis, yerna ţmesxiṛen ɣef lweɛd-ines yeɛnan lehna ɣef lqaɛa. (2 Timutawus 3:1, 4; 2 Buṭrus 3:3, 13) Neḥwaǧ ihi a neţnejmaɛ akk-d iqeddacen  nniḍen n Ṛebbi iwakken a ɣ-sseǧhden; yerna, nutni daɣen ḥwaǧen-aɣ.​—Ɣer Iɛebṛaniyen 10:24, 25.

 M’ara neţnejmaɛ d wid i gḥemmlen Ṛebbi, ayagi yeţɛawan-aɣ a nqerreb ɣur-es. Inejmuɛen n Inagan n Yahwa ţ-ţiswiɛin ifazen i ɣ-d-iţţunefken iwakken a ɣ-sseǧhden wiyaḍ s liman-nsen.​—Ɣer Iṛumaniyen 1:11, 12.

 Tzemreḍ aţ-ţqerrbeḍ ɣer Yahwa ma teţţaṭṭafeḍ lweqt bac aţ-ţxemmeḍ ɣef wayen i tlemmdeḍ deg Wawal-is. Xemmem ɣef lefɛayel-is, lewṣayat-is akk-d lewɛud-is. Taẓallit d umeyyez a k-ɛiwnen iwakken aţ-ţcekkiṛeḍ dima Ṛebbi ɣef ddemma n leḥmala-ines akk-d lekyasa-ines.​—Ɣer Yacuɛa 1:8; Ahellil 1:1-3.

 Bac aţ-ţiliḍ tqerbeḍ ɣer Ṛebbi, d lwaǧeb aţ-ţţekleḍ fell-as, aţ-ţesɛuḍ liman deg-s. Lameɛna, liman icuba imɣi i geḥwaǧen a t-nessway akken ad yegmu. Ihi, iwakken aţ-ţesswayeḍ liman-inek, ilaq aţ-ţeţmeyyizeḍ ɣef wayen is i teţţamneḍ akk-d ssebbat i k-yeǧǧan teţţamneḍ.​—Ɣer Matta 4:4; Iɛebṛaniyen 11:1, 6.

 Yahwa yeţḥebbiṛ ɣef wid i t-iḥemmlen. Yezmer ad iḥareb fell-ak seg wayen akk i gzemren ad yessefcel liman-ik w’a k-yesṛuḥ asirem i tessarameḍ aţ-ţɛiceḍ i dima. (Ahellil 91:1, 2, 7-10) Yeţweṣṣi-k akken aţ-ţexḍuḍ i iberdan ara d-yawin lemḍerra i ṣṣeḥḥa-inek, ara k-yekksen daɣen lfeṛḥ-inek. Yesselmad-ak amek ara tesɛuḍ tamɛict ţ-ţaxlaft.​—Ɣer Ahellil 73:27, 28; Yeɛqub 4:4, 8.