AḤRIC WIS 17
Aselmed n Ɛisa
Ɛisa yesɣer aṭas n leḥwayeǧ i inelmaden-is, meɛna ţ-ţagelda n Ṛebbi i gellan d lsas n uselmed-ines
I WACU i d-iţţuceggeɛ Ɛisa ɣer lqaɛa? Yerra-d s yiman-is lǧawab i westeqsi-ya: “Ilaq-iyi ad ṛuḥeɣ ad beccṛeɣ lexbaṛ n lxiṛ n [tgelda] n Ṛebbi [...]! Ɣef wayagi i d-ţţuceggɛeɣ!” (Luqa 4:43) Atentah ṛebɛa leḥwayeǧ i gesselmed Ɛisa ɣef Tgelda-yagi yellan ţ-ţigejdit n uberreḥ-ines:
1. Ɛisa d Agellid i gextaṛ Ṛebbi. Ɛisa yenna-d ɛinani belli d neţţa i d Lmasiḥ-nni i gewɛed Ṛebbi. (Yuḥenna 4:25, 26) Issken-ed diɣen belli d neţţa i d Agellid-nni i gwala nnbi Danyil di yiwen uweḥḥi. Ɛisa yesseɛlem imceggɛen-is belli ad yeqqim “ɣef wukersi n lḥekma” yesɛan lɛaḍima yerna ad qqimen ula d nutni ɣef ikersiyen n lḥekma. (Matta 19:28) Issefhem-ed belli tarbaɛt-agi ara iḥekmen iḥseb-iţ am “tqeḍɛit[-is] tamecṭuḥt.” Lameɛna yenna-d daɣen belli yesɛa “ulli nniḍen” ur nţekki ara di terbaɛt-agi.—Luqa 12:32; Yuḥenna 10:16.
2. Tagelda n Ṛebbi a d-tawi lḥeqq n ṣṣeḥ. Ɛisa issken-ed belli Tagelda-ya aţ-ţekkes lbaṭel akk ameqran i d-yeḍran. Aţ-ţqeddes isem n Ṛebbi m’ara t-tezzizdeg si ddel i s-yeḍla Cciṭan seg wasmi i teḍra lmeɛṣegga-nni di Ɛidin. (Matta 6:9, 10) Di tama nniḍen, Ɛisa yesɣer argaz tameṭṭut, ameṛkanti d igellil mebla lxilaf. Isselmed At Cumrun (At Samarya) d wid ur nelli ara d Iyahudiyen, ɣas akken iţţuwekkel ad isɣer At Isṛayil kan. Ɛisa ur itbiɛ ara lemtel n lɛulama n ddin iɛacen di zzman-is. Ur iḥuseb ara lɣaci mebla ma yessen-iten yerna ur yexdim ara maḥyaf.
3. Tagelda n Ṛebbi mačči n ddunit. Ɛisa iɛac di zzman icewwlen aṭas, deg yiwet n tmurt yellan ddaw n lḥukuma tabeṛṛanit. Xas akken, asmi i nudan yemdanen a t-ssekcmen di lecɣal n tsertit (lbulitik), ur yeqbil ara. (Yuḥenna 6:14, 15) Yenna i yiwen lḥakem n ddewla: “Tagelda-w mačči n ddunit-agi.” (Yuḥenna 18:36) Ma d inelmaden-is, yenna-yasen: “Kunwi mačči n ddunit.” (Yuḥenna 15:19) Ɛisa ur sen-iɛemmed ara ad refden leslaḥ ula d asmi i nudan ad dafɛen fell-as.—Matta 26:51, 52.
“Iteddu yeţbecciṛ lexbaṛ n lxiṛ n [tgelda] n Ṛebbi [...] si taddart ɣer tayeḍ.”—Luqa 8:1.
4. Leḥkem n Lmasiḥ ad yers ɣef leḥmala. Ɛisa yewɛed ad iṣebber lɣaci yerna ad isnefsusi taɛkemt-nsen. (Matta 11:28-30) Ɛisa yeṭṭef deg wawal-is! Deg yiwet lxeṭba yeţţusemman “Aselmed deg wedrar”, ifka-yasen s leḥnana lewṣayat iṣelḥen akken ad qablen anezgum, akken ad sselhun lɛalaqat-nsen d wiyaḍ, akken ad xaṣmen leḥmala n cci w’ad afen sseɛd. (Matta ixef wis 5 alamma d wis 7) Imi yesɛa leḥmala, lɣaci n mkul ccetla ur kukran ara ad ṛuḥen ɣur-es. Ula d wid iţwarekḍen ţţasen ɣur-es d izumal axateṛ ţeklen belli a ten-iqabel s leqder d leḥnana. Mebla ccekk, ad yili d aneḥkam ara d-yekken nnig akk wiyaḍ!
Ɛisa yessexdem ţţawil nniḍen iǧehden akken ad isɣer lɣaci ɣef Tgelda n Ṛebbi. Ixdem xilla n lbeṛhanat. Acuɣer? Aḥric i d-iteddun a d-yerr lǧawab.
