MBEΣD lmut n Cimcun, yiwen wergaz iwumi qqaren Camwil yuɣal d nnbi di tmurt n Isṛayil. At Isṛayil ţḥawaten deg-s akken ad sεun agellid ara iḥekmen fell-asen am leǧnas nniḍen. S wayen akka i xedmen amzun d rregmat i regmen Yahwa axaṭer d neţţa i d agellid-nsen n ṣṣeḥ. Xas akken, Yahwa yefka lameṛ i Camwil akken a sen-yeddu di lebɣi. Ṛebbi yextaṛ ihi yiwen wergaz yesεan annuz yeţţusemman Cawul. Lameεna, mi gεedda kra n lweqt, Cawul yuɣal d amnefxi yerna yeţεaṣi Ṛebbi. Yahwa iḍerref-it, dɣa yenna i Camwil ad yextiṛ yiwen ilemẓi yeţţusemman Dawed akken ad yuɣal d agellid. Acu kan, armi d asmi i εeddan kra n iseggasen i geṭṭef akersi n lḥekma.

Yiwen n wass, mi t-mazal ahat d ilemẓi, Dawed iṛuḥ ad iẓer atmaten-is yellan di lεeskeṛ n Cawul. Gulyat, yiwen n weεdaw yesεan azal n tlata n lmitrat di lqedd, yesseɣli-d rrehba ɣef iεsekṛiwen meṛṛa n wat Isṛayil. Yezga yecqirriw-iten ama d nutni ama d Ṛebbi-nsen. Annect-a yesserfa mliḥ Dawed, dɣa yeqbel ad yennaɣ neţţa d lɣul-agi. Mi geffeɣ ɣer imenɣi, yewwi kan ildi d kra n yeblaḍen yid-es. Gulyat iqejjem di Dawed. Dawed yerra-yas belli leslaḥ-is ɣelben wigad-is imi s yisem n Yahwa Ṛebbi ara t-iqabel. Umbeεd, Dawed yenɣa-t s yiwen weblaḍ kan, yekkes-as ssif-is yerna yegzem-as yis aqerru. Iεsekṛiwen n Ifilistiyen ikcem-iten lxuf, dɣa rewlen.

Tirrugza n Dawed tessewhem Cawul, dɣa yerra-t d aqerru ɣef lεeskeṛ-is. Lameεna, imi yerbeḥ Dawed aṭas n lgirrat, annect-a yessemɣi-d tismin tisemmamin deg wul n Cawul. Dawed iţţuḥettem ihi ad yerwel neɣ m’ulac ad immet. Acḥal d aseggas Cawul yeţnadi a t-ineɣ, meεna Dawed yeqqim d unṣiḥ ɣer ugellid-is. Yenna deg wul-is belli d Yahwa Ṛebbi i gerran Cawul d agellid. Γer taggara, Cawul immut di lgirra. Cwiṭ n lweqt umbeεd, Dawed yuɣal d agellid akken i t-yewεed Yahwa.

Tura m’akka yuɣal Dawed d agellid, ibɣa ad ibnu lemqam i Yahwa. Acu kan, Yahwa yenna-yas belli d yiwen seg warraw-is ara t-ibnun. Isem-is Sliman. Lameεna Ṛebbi iǧuza Dawed. Amek? S leεqed-agi ifazen i gexdem yid-es: si twacult-is a d-ffɣen igelliden ara yawin ɣer Zzerriεa-nni i gewεed Ṛebbi di Σidin. Amsellek-agi i gextaṛ Ṛebbi ad yili d Lmasiḥ, yeεni “Win iţwadehnen.” Yahwa iwεed belli Lmasiḥ-agi ad yili d aqerru ɣef yiwet lḥukuma, neɣ Tagelda, ara idumen i dima.

Ul n Dawed yeččuṛ d asteεṛef, dɣa ijmeε-ed aṭas n sselεa akk-d ddheb d lfeṭṭa i lebni n lemqam. S ṛṛuḥ n Ṛebbi, Dawed yura daɣen ayendin n ihellilen. Daεneţţa, atan wayen i d-yenna mi qrib ad yemmet: “D ṛṛuḥ n Yahwa i d-ihedṛen seg-i, awal-is ɣef yiles-iw.”—2 Camwil 23:2.

—Ayagi yers ɣef 1 Camwil; 2 Camwil; 1 Amezruy; Icεaya 9:7; Matta 21:9; Luqa 1:32; Yuḥenna 7:42.