KRA n leqrun uqbel ad kecmen wat Isṛayil ɣer Kanɛan, Yahwa yewɛed i jedd-​nsen Abṛaham belli ad kesben tamurt-​agi. At Isṛayil atnan tura kkren a d-​ḥellin, s ufus n Yacuɛa, Tamurt yewɛed Ṛebbi.

Ṛebbi iḥuseb Ikanɛaniyen. Yufa belli uklalen lmut imi ččuṛen tamurt-​nsen s leɛṛuṛ imeqranen akk-​d tmegraḍ. Ilaq-​asen ihi i wat Isṛayil ad ssengren s lekmal timdinin n wat Kanɛan.

Uqbel ad kecmen wat Isṛayil tamurt n Kanɛan, Yacuɛa iceggeɛ sin yergazen akken ad ssenqden tamdint n Yariḥu. Yiwet n tmeṭṭut yeţţusemman Raḥab tessekcem-​iten s axxam-​is yerna tḥureb fell-​asen ɣas akken teẓra wi ten-​ilan. Raḥab tesɛa liman di Yahwa axaṭer tesla amek i gsellek At Isṛayil. Tesgall irgazen-​nni akken a ţ-​menɛen neţţat ţ-​ţwacult-​is.

Kra n lweqt umbeɛd, At Isṛayil kecmen ɣer Kanɛan, dɣa ẓedmen ɣef temdint n Yariḥu. S lbeṛhan n Ṛebbi, ɣlin leṣwar n temdint-​nni. Irgazen yeddan d Yacuɛa ddehmen ɣer daxel n temdint, dɣa hudden-​ţ. Lameɛna, ur glin ara s Raḥab d wat wexxam-​is. Di seţţa iseggasen i d-​iḍefren, d iḥricen imeqranen n tmurt i gɣellin wa deffir wa ger ifassen n Yacuɛa. Syenna, tamurt teţwafreq i leɛṛac n wat Isṛayil.

Ɣer taggara n ddunit-​is, Yacuɛa yesnejmaɛ-​ed At Isṛayil. Yesmekta-​yasen-​d ayen yexdem Yahwa i lejdud-​nsen yerna yenha-​ten akken ad qedcen fell-​as. Ɣas akken, At Isṛayil ɛebden iṛebbiten n lekdeb mi gemmut Yacuɛa d yeqriben-​is. Deg wazal n 300 iseggasen, nutni ţɛaṣin rennun leqwanen n Ṛebbi. Yahwa iɛemmed ihi i yeɛdawen-​nsen, am Ifilistiyen, a ten-​qehren. Acu kan, mkul m’ara ɛeggḍen wat Isṛayil ɣer Yahwa, yeţceggiɛ-​asen leqwaḍi akken a ten-​isellek.

Taktabt n Inezzurfa, yellan deg Wedlis Iqedsen, tehdeṛ-​ed ɣef zzman-​agi ideg i msetbaɛen 12 n leqwaḍi wa deffir wa. Amezwaru deg-​sen d Ɛutniyil, aneggaru d Cimcun, argaz iǧehden akk ɣef wiyaḍ seg wasmi i d-​ixleq Ṛebbi ddunit. Aţţan tideţ yesɛan azal ameqran i neţţaf acḥal d abrid di tektabt-​agi n Inezzurfa: ṭṭaɛa i Yahwa tessasay-​ed lbaṛakat ma d aɛaṣi yeţţawi ɣer lhemm.

—Ayagi yers ɣef Yacuɛa; Inezzurfa; At Lewwi 18:24, 25.